Mwiikasoope Wira musyake Miraakho Sa Satana!

‘Mmoomole Satana n’ulavilavi awe’.​—AÉF. 6:11.

MWAAROWA WAAKHULA SAI?

Moota xeeni murumeyi a Yehova okhanle awe oosyaka muraakho wa ophenta muhakhu?

MaKristau oothelana anrowa osyaka sai omorela mulittini na mararuwo?

Xeeni munikupali anyu wira ti vooloka osyaka ophenta mihakhu ni oraruwa?

1, 2. (a) Xeeni Satana ohinaamorela awe ikharari maKristau oothanliwa ni “ipwittipwitthi sikina?” (b) Mwa yoosoma ela ninrowa othokorerya miraakho xeeni sa Satana?

SATANA DIABO khonaamorela ikharari apinaatamu, vanceenexa arumeyi a Yehova. Tthiri onniwana ekhotto ni maKristau oothanliwa ari valaponi. (Wis. 12:17) Maana okhuma khalai maKristau awo anilaleya ihapari sa Omwene moororomeleya, mpakha vano, mohoova annihimya wira olumwenku ola onilamuleliwa ni Satana. Nave-tho Diabo khaniphenta “ipwittipwitthi sikina” seiyo sinaakhaliherya anna oothanliwa ni sinilipelela okumi woohimala. Masi Satana khorina yoolipelela eyo. (Yoh. 10:16) Tivonto oonanariwa vanceene! Khiivo etthu yooreera eniphavela awe wa hiyo. Tthiri oniphavela waahapuxa arumeyi a Muluku, pooti ale arina nlipelelo na orowa wiirimu, wala mparayiisu valaponi.​—1 Ped. 5:8.

² Wira Satana onihapuxe, onnireya miraakho sa khula enamuna. Okhala wira onniwiiriha ohoona atthu yaale ahinaamini, atthu awo khaneemya ihapari sooreera ni khaniwerya woona miraakho sa Satana. Nave, Diabo onnaavara akina mwa yaale yeemerenrye ihapari sa Omwene. (2 aKor. 4:3, 4) Yoosoma evinre ehooniherya moota woosyaka miraakho miraru sa Satana: (1) olavula ohuupuwenle, (2) woova, ni okhanyereriwa opaka soohiloka ni (3) wiixoonaka otepa ohiloka mwaha wa ottheka. Nto vano, nrowe nithokorerye moota woosyaka miraakho sikina miili: ophenta muhakhu ni oraruwa.

OSIVELIWA MIHAKHU TI MURAAKHO ONIPHINYAKA

3, 4. Moota xeeni weeteteyaxa ni itthu sa vathi oniwiiriha aya akina ophenta muhakhu?

³ Yesu aahilavula ntakiheryo nimosa na mmiso onaaliwa eriyari ya miiwa. Yesu aalavunle wira mutthu owo onniiwa nuulumo, ‘masi weteteyexa wawe ni itthu sa vathí ni wototha wa muhakhu onnivuvurya wala ophinyaka masu awo’. (Math. 13:22) Tthiri osiveliwa muhakhu muraakho onirumeeliwa ni nwanani ihu Satana.

⁴ Inamuna iya piili sinnivuvurya masu. Enamuna emosa tiila: ‘weteteyexa ni itthu sa vathí’. ‘Mahiku ala oxanka’, sihaavo itthu sinci sinimwiiriha mutthu weeteteyaxa. (2 Tim. 3:1) Mwaha woovila ophwanya musurukhu wala muteko, nyuwo pooti woona oxankiha ophwanya soolya. Nyuwo pooti oxankiheyaka-tho muupuwelaka so: ‘Kiireke kinookhalana itthu siniphiyerya waphiya okathi woohiya muteko’? Nto mwaha wa oxankiheya iwo, akina anniithukumanyerya mihakhu yoonaka wira musurukhu tonrowa owoopola.

5. “Wototha wa mihakhu” oniwerya sai omuhapuxa mutthu?

⁵ Yesu aahilavula enamuna ekina ariki: “wototha wa muhakhu”. Masu ala, anivarihana ni weeteteyaxa oniphinyaka masu. Biibiliya onnilavula wira “Wettihiwa n’ankhili ti worera ovikana wettihiwa ni mihakhu”. (Mus. 7:12) Mutthu aankhili khahiyo ole onithukumanya mihakhu. Maana atthu anceene aahoona wira wiimananiha othukumanya mihakhu, onnatepiha okela mmuraakhoni wa ophenta muhakhu. Nto akina annipakeya ipottha sa mihakhu saya.​—Math.6:24.

6, 7. (a) Moota xeeni ophenta muhakhu oryaaya muraakho wowoopiha wa ole oniphavela muteko? (b) Itthu xeeni muKristau aarowa awe wuupuwela akhala wira onivahiwa muteko wa mahiku otheene?

⁶ Ophenta mihakhu onipacerya vakhaani-vakhaani. Ntoko ntakiheryo, muupuwele yowiiraneya ela. Patarau anyu pooti wooleelani so: “Kihaana ihapari sooreera! Empresa ahu yoophwanya muteko onrowa okumiherya musurukhu munceene. Nto eyo enitaphulela wira nihaana ovaraka muteko mahiku otheene myeeri iya sinttharelana. Masi musurukhu onaakhela anyu onimuncereriwa”. Mwaarowa woonela sai muteko owo? Ekeekhai wira muritti wa ovaha yoolya ni musurukhu etthoko anyu, etthu yootthuneya; masi musuwele saana wira muteko anyu khahiyo ovaha yoolya paahi etthoko anyu. (1 Tim. 5:8) Sihaavo-tho myaha sikina sintthuneya anyu othokorerya. Muhaana okohaka so: khamunrowa otepaka oviriha okathi munceene nvaraka muteko? Muteko owo khonrowa owoocelihani miteko sa Muluku ntoko orowa mithukumano sa mmulokoni, ni Omulompa Muluku Vatthokoni?

⁷ Okathi woopaka yoothanla, etthu xeeni yaarowa anyu ovaha efaita yuulupale, ovara muteko wira muncererye musurukhu anyu obanko, aahiiso ocalela miteko sa Muluku? Niireke ophavela wuncererya musurukhu, onrowa owoceelihani ohela nipuro noopacerya Omwene mookumini mwanyu? Munniweha moota ophenta muhakhu waarowa aya owiirihani ohicalela wataana orina anyu ni Muluku vamosa ni etthoko anyu? Akhala wira etthu ela enniiraneya, munrowa opaka exeeni wira musyake ovariwa ni muraakho wa ophenta mihakhu?​—Mmusome 1 Timótheyo 6:9, 10.

8. Matakiheryo xeeni a mBiibiliyani anrowa onikhaliherya ovarerya saana makhalelo ahu?

⁸ Wira musyake ophinyakiwa ni mihakhu, ikwaha sikina nvareryeke makhalelo anyu. Muheererye omutakihaka Esawu yoowo ahaacalenle itthu somunepani. (Maph. 25:34; aHéb. 12:16) Tthiri muhiphaveleke olikana ni thaaciri yoole aaleeliwe wira atumihe mihakhu sawe aakawele amasikhini wira amutthareke Yesu. Owo khaapanke ele yaaleeliwe awe, masi mulopwana owo “ahirowa aripiwe ene murima, mana kharèrena mihakhu”. (Math. 19:21, 22) Mwaha woovareya ni mihakhu, aahiyeleela eparakha yuulupale ya omutthara Yesu Kristu! Tivonto, mukhalane ephoole wira muhiyeleele okhala mutthareli a Yesu Kristu.

9, 10. Biibiliya onoonela sai mihakhu?

⁹ Wira moone ohitthuneya waya oxankiheya ni mihakhu, muthokorerye yoolopola ela ya Yesu: “Muhithanané mwiraka nilye exeeni? Niwurye exeni? Niware exeni? Ahinimusuwela Muluku t’anetta ephavelaka itthu iyo sothene. Masi nyuwo, Atith’inyu ari wirimu annisuwela wira sothene iya sinnohalelani”.​—Math. 6:31, 32; Luka 21:34, 35.

¹⁰ Nto wira muhootothiwe ni owerya wa mihakhu, muhaana omananiha otthara miruku sa mulipa oomulepa Biibiliya Agur oni: “Muhikivahé othajiri nnákhala omasikhini: mukivahe simphiyerya ekumi aka”. (Mir. 30:8) Veekeekhai Agur aanisuwela wira musurukhu onnitthuneya, masi aanisuwela-tho wira musurukhu woototha. Nisuweleke wira weeteteyaxa ni itthu sa elapo ela, ni owoka wa mihakhu, onnihonona wataana wahu ni Yehova. Otepexa oluttuweliwa ni mihakhu onnihonona okathi munceene ni ikuru sahu, nto khihiyakhalana okathi wala ikuru wira nvare miteko sa Omwene. Nto mwiimananihe wira muhiphinyakiwe ni muraakho wa Satana, wa ophenta mihakhu!​—Mmusome aHéberi 13:5.

ORARUWA ONLIKANA NI NLITTI NIHINOONEYA

11, 12. Moota xeeni omutekoni muKristau aarowa awe omorela mmuraakho wa oraruwa?

¹¹ Alipa ooxaya aniphavela onvara mwaaxinama ootupa, awo anithipa nlitti wala ekhokwe mumphitoni munvira axinama. Wira axinama ahoone, vasulu va nlitti nlo, oniheliwa-vo miri soohilipa, malaxi ni etthaya. Muraakho mmosa muulupale Satana onirumeela awe vanceene, onlikana ni nlitti nenlo. Muraakho ene ti yoottheka ya oraruwa. (Mir. 22:14; 23:27) MaKristau manci aamorela munlittini-mmo, mwaha wohikhootta mweettelo waasuwela aya wira pooti waatthekiha. MaKristau akina athelanne, annimuhiya ole othelanne aya enapacerya osiveliwa ni mutthu mukina mpakha oraruwa.

¹² Osiveliwa woohiloka ni mutthu mukina ikwaha sikina onipacerya omutekoni. Tthiri, yootokosa emosa epakiwe enihimya wira nimeya nimosa na athiyana ni alopwana ari anamararuwa, etthu yowiiraka 3 wala 4, osivelana waya woohiloka waapacenrye omutekoni. Niireke muteko onivara anyu onitthuneya ovara ni athiyana wala alopwana? Akhala wira ti siiso, niireke munnikhalana ephoole? Niireke opatthana wanyu ti wa muteko paahi, aahiiso ehaavo etthu ekina? Mwa ntakiheryo, nuumala murokora muKristau ikwaha sinceene ovaanela ni mulopwana onivarana awe muteko, owo pooti opaceryaka omuleela isiiri sawe, aahiiso mixankiho sirina awe ni aiyawe. Nave-tho mulopwana muKristau nuumala opatthana ni muthiyana onivarana awe muteko, owo pooti opacerya wuupuwela so: “Muthiyana ola khanreera ovaha efaita muupuwelo aka, tthiri onniwiriyana saana okathi onilavulana aka. Nave onnikoona oreera. Owaani nkinvahiwa efaita siisa”! Munniweha moota sowiiraneya iya saarowa aya omwiiriha muKristau oraruwa?

13. Moota xeeni osivelana woohiloka onikhumelela aya mmulokoni?

¹³ Osivelana woohiloka pooti okhumelela-tho mmulokoni. Thokoreryani etthu ela etonko wiiraneya. Danieli ni amwaarawe Sara,a yaari mapioneero ookilaatheya. “Khiivo etthu yakhootta awe wa axitokweene”. Danieli aaneemererya khuta eparakha ya muteko aavahiwa awe. Mmuteko awe woolaleerya, owo aanaasomiha Biibiliya amiravo athanu, nto araru yaahibatiziwa. Masi munna ookiserya obatiziwa, aanitthuneya okhaliheriwa vanci. Nto okathi Danieli samwaattela aya miteko mmulokoni, murokora Sara, aanimukhaliherya mmiravo ole. Nto moohipisa yaahikhumelela etthu ela: mmiravo ole aatthuneya okhaliheriwa mwa enamuna yoophenta, nto Sara taavaha nikhaliheryo nlo. Nave-tho Sara aaniphavela ophentiwa, nto mmiravo ole tamphenta Sara. Nto waahikhumelela muraakho oniiva. Danieli onihimya so: “Miyeeri seiye amwaaraka yaivahererya aya waakhaliherya amiravo ale, awo yaahihonona wataana waya ni Muluku. Eyo yahiiraneya mwaha wooliyalela waakhapelela amwaaraka, nto khikhumelela etthu yootakhala. Amwaaraka yaahiraruwa ni mmiravo ole kaamusomiha aka Biibiliya. Mwaha woovarexexa miteko sa mmulokoni paahi, amwaaraka yaahittheka kiwoonaka”. Nyuwo munrowa osyaka sai ehasara ela owiiraneelani?

14, 15. Itthu xeeni sinrowa waakhaliherya maKristau athelanne osyaka nlitti na oraruwa?

¹⁴ Wira nisyake muraakho ola wa oraruwa, nihaana wuupuwela saana ele enitaphulela aya waakhulela othelana. Yesu aahimmyale so: “Yeyo Muluku ephitanyalyawe mutthu ahimwalanyihé-tho”. (Math. 19:6) Muhikhala-khale muupuwelaka wira miteko sinivahiwa anyu mmulokoni ti sootepa otthuneya onvikana ole othelanne anyu. Ohiya vo, musuwele-tho wira omakela weetta khiyaviriha okathi munceene omurakamenle ene ole othelanne awe, pooti omutteettheiha ole othelanne awe, wala omwiiriha opaka etampi yuulupale.

¹⁵ Akhala wira nyuwo mutokweene a mmulokoni, nto munikhapelela sai ipwittipwitthi? Murummwa Pedru aahilepa wira: “Mulyiheke orattene ipwittipwitthi sinnyereriwanyu ni Muluku. Musukeke n’utthuna wanyu wothene, ntoko Muluku sintthunawe, vohikhala ntoko munokhanyereriwa. Muhisukeké mphavelaka musurukhu, masi vowivahererya seiyo”. (1 Ped. 5:2) Tthiri muhiliyaleke waakhapelela anna a mmulokoni. Masi, khamunrowa ovara saana muteko anyu wa okukhula akhala wira khamunimuthokorerya saana mwaarinyu. Opaka eyo, onooniherya ololo wuulupale, okhala wira munikhapelela muloko paahi, khiyaahiya amwaarinyu wala etthoko anyu “evoliwaka etala yomunepani”. Danieli yoole onihimya so: “Mutthu okhapelela emusi awe teri etthu yootepexa okhalana efaita, ovikana miteko sinivahiwa ahu mmulokoni”.

16, 17. (a) Exeeni muKristau oothela wala otheliwe enireerela awe opaka opuro onivara awe muteko wira asyake osivelana ni mutthu mukina? (b) Nvahe ntakiheryo na iliivuru sahu sinimukhaliherya muKristu osyaka oraruwa.

¹⁶ Ikwaha sinceene erevista Owehaweha ni Despertai ennivaha miruku sinceene, seiyo sinaakhaliherya maKristau athelanne osyaka muraakho wa oraruwa. Mwa ntakiheryo: A Sentinela 15 a Setembro 2006, aahivaha yoolopola ela ariki: “Opuro onivara anyu muteko wala khula opuro, mukhalaneke ephoole opatthanexa ni mutthu ohithelanne anyu. Mwa ntakiheryo omaliha okathi munceene ovaraka muteko ni mutthu ohithelanne awe nuumala anamuteko akina omwareya, eyo pooti okumiherya yoweeha yuulupale. Ntoko mutthu othenle wala otheliwe, muhaana wooniherya saana wira khamuniphavela mweettelo woohiloka. Ntoko mutthu oneettela malamulo a Muluku, muhaana osyaka olavula itthu sinooniherya osivelana ni mutthu ohithelanne awe, ohiya-vo muhaana owaraka moophwanelela . . . Opweha ifootu opuro onivara anyu muteko, enimookhaliheryani ohiliyala wira muhaana etthoko anyu. Nto mulakele vamurimani vanyu ohitumererya hata weemererya mweettelo onimwiiriha mutthu mukina woophavela”.

¹⁷ Erevista Despertai! ya Abril 2009, eni: “Fidelidade Marital—O Que Realmente Significa?” (Ororomeleya Mukasamentoni, Ontaphulela Exeeni?) wahooniherya otakhala waya olavula myaha seekhapa ni mutthu yoole ohithelanne awe. Erevista eyo yaahihimya wira mutthu onsiveliwa olavula myaha sa orupihana ni mutthu ohithelanne awe, onomwiiriha oraruwa. (Yak. 1:14, 15) Akhala wira nyuwo moothela wala otheliwa, vaamuloka ikwaha sikina wuuluula myaha sa erevista eyo vamosa ni ole othelanne anyu. Othelana okumiheriwe ni Yehova, tivonto nihaana ottittimiha. Orumeela okathi munceene wira nvaaneleke ni mwaarinyu wala iyanyu, etthu yooloka enooniherya ottittimiha wanyu itthu sa efaita yuulupalexa.​—Maph. 2:21-24.

18, 19. (a) Maxakha xeeni anikumiherya aya mararuwo? (b) Oororomeleya ni ole athelanne awe onikumiherya exeeni?

¹⁸ Moona wira moopacerya osiveliwa ni mutthu ohithelanne anyu, muhaana wuupuwelaka maxakha anikumiheriwa ni mweettelo weekhapa wala oraruwa. (Mir. 7:22, 23; aGal. 6:7) Yaale aniraruwa, annimutthekela Yehova ni omukumiherya maxakha ole othelanne aya ni wiihooxa mmensaya. (Mmusome Malakhiya 2:13, 14.) Masi ale aniisuumaaliha annihakalala vanceene. Ohiya mwaha wa okumi woohimala paahi anrowa aya waakhela, masi-tho vano, okhala waya ti wootteeliha murima ni khanuukhuwa mwaha wa etampi etonko aya opaka.​—Musome Miruku 3:1, 2.

¹⁹ Nasalimo aahiipa ariki: “Ale amphenta ikano sanyu àkhalana murettele mulupale: khivo etthu enakwattuliha”. (Esal. 119:165) Nto, mphenteke ekeekhai nave “muthokorerye orattene mwettelo anyu. Muhetteke ntoko alolo: mwetteke ntoko atthu a miruku”. (aÉf. 5:15, 16) Iphiro sinivira ahu, Satana oopweha miraakho sinceene wira aavare ale animurumeela Muluku. Masi hiyo nihiixuttihiwa wira niikasoopeke. Yehova oonivaha “ikuru” wira “niwerye ottipiha matthere a moro anvonyiwa ni mutakhali”!—aÉf. 6:11, 16.

[Enoota]

[Elatarato epaaxina 29]

Ophenta mihakhu onniphinyaka wataana wahu ni Muluku. Nto musyake wira muhihomphwe

[Elatarato epaaxina 32]

Wooniherya osiveliwa mutthu ohinrowa awe othelana, pooti okumiherya mararuwo.