Olevelela Wa yehova Ontaphulelani Wa Nyuwo?
Yehova, ‘Muluku òmoriwa ikharari òpisa onanariwa . . . , òlevelela sottheka ni itampi’.—OKHUM. 34:6, 7.
MOONE WAAKHULIWA WA MAKOHO ALA
Yehova oonenle sai soottheka sa Davidi ni Manasé, nave nthowa xeeni?
Xeeni Yehova aaphunke awe myaha sa anaIsarayeli mwa enamuna yoovirikana?
Nipakeke exeeni wira nileveleliwe ni Yehova?
1, 2. (a) Mikhalelo xeeni Yehova Muluku oonihenrye awe wa nloko na Isarayeli? (b) Makoho xeeni anikhumelela mmwaha ola?
MAHIKU a Nehemiya, aLevi akina yaahivekela eriyari ya atthu khooniherya wira amuhavinre aya ‘yahikhotta wiwelela soruma’ sa Yehova. Masi, khula okathi Yehova ahooniherya okhala ‘Muluku òlevelela, òrera murima ni òmoriwa ikharari, òpisa onanariwa ni òsareya othunku’. Wa ale yaatthikenle oYerusalemu mahiku a Nehemiya, Yehova aanivikaniha waalevelela.—Neh. 9:16, 17.
2 Khuta mmosa a hiyo aikoheke so: ‘Olevelela wa Yehova entaphulelani wa miyo?’ Wira nikhaliheriwe waakhula nikoho nna, nrowe nithokorerye moota Muluku aakhapelenle awe mamwene manli yaaleveleliwe ni Yehova: Davidi ni Manasé.
YOOTTHEKA YUULUPALE YA DAVIDI
3-5. Moota xeeni Davidi aapanke awe etampi yuulupale?
3 Nnaamwi Davidi aari mutthu aamoova Muluku, owo aahipaka yoottheka yuulupale. Itampi iyo piili, siiranen’ye vatthokoni va Uriya ni Bathi-xeba. Yoottheka eyo yahaakumiherya maxakha atthu awo. Masi, moota Muluku aamuthokorenrye awe Davidi, onooniherya olevelela wuulupale wa Yehova. Nrowe niwehe etthu yiiranen’ye.
4 Davidi ahaarumiha anakhotto a wIsarayeli orowa orukurerya muttetthe muulupale w’oRaba, wira awane ekhotto ni atthu a wAmoni. Muttetthe owo waari epantta ya onikhuma nsuwa wa oYerusalemu, ohoolo wa Muro Yordani, etthu yowiiraka ikiloomo 80. Okathi owo, Davidi aryeene vasulu va epalaasio awe oYerusalemu, aahimoona Bathi-xeba arapaka. Aiyawe khiyaakhanle owaani. Davidi aahikuxeya murima mwaha wa onweha Bathi-xeba, khiruma wiihaniwa opalaasio wawe nto khiraruwa ni Bathi-xeba.—2 Sam. 11:1-4.
5 Nuumala Davidi osuwela wira Bathe-xeba aahirupala, owo aahiruma wira Uriya, iyawe Bathe-xeba atthikele oYerusalemu; nto Davidi uupuwela wira Uriya aamurupa ni mwaarawe. Masi Uriya khaaphavenle hata ophiya vapuwani vawe, nnaamwi Davidi aamananinhe opaka eyo. Nuumala-vo mwene aahimulepela epaphelo muhooleli aanakhotto wira Uriya ‘aholihiwe okhottoni nipuro ninvihexaya’, anakhotto akhwaawe emuhiye mekhawe wira aiviwe. Tthiri Davidi ampakenle palano wira Uriya aiviwe okhottoni tthiri Uriya kukhwa mukhottoni. (2 Sam. 11:12-17) Nto yoottheka ya mwene yaahisariheleya mwaha wa omwiiviha mulopwana ahaarina nthowa.
DAVIDI AAHIRUKUNUXA MUUPUWELO AWE
6. Yehova oonenle sai soottheka sa Davidi, nto eyo enooniherya mukhalelo xeeni wa Yehova?
6 Nto Yehova aahiweha itthu sotheene siiranen’ye. (Mir. 15:3) Nnaamwi mwene ole aamuthenle Bathe-xeba, ‘masi Apwiya [Yehova] yahinanariwa n’itthu sìralyawe’. (2 Sam. 11:27) Nto Muluku oonenle sai yoottheka yuulupale ya Davidi? Aahimuruma profeta awe Natani orowa wa Davidi. Mwaha wa okhala Muluku oolevelela, Yehova aahiphavela enamuna ya ommorela ikharari. Munnoona wira othokorerya wuulupale wa Yehova onooniherya ophenta ni murima awe wotheene? Yehova khaamukhanyerenrye Davidi ohimya itampi sawe, masi aamurumme Natani orowa wa mwene ole khulavula ehantisi yoonihenrye otakhala wa itampi sawe. (Mmusome 2 Samuweli 12:1-4.) Nnaamwi mwaha ole waatempe ovila ophuka, mwaha ole waahiphukiwa saana!
7. Davidi oonenle sai ntakiheryo Natani aapanke awe?
7 Ntakiheryo na Natani, naahimwiiriha mwene opaka maphukelo a xariya. Davidi aahinviruwela mulopwana ole thaaciri a ntakiheryo, khimuleela Natani wira: ‘Ntoko ekhweli wira Muluku òkhala, mulopwana owo inre siso onniphwanela wiviwa’. Nave-tho, Davidi aahilavula wira ole otthekeliwe, ohaana oliviwa mwaha wa itthu sawe sihononiwe. Masi, mwaha ola waahimurukunuwela Davidi ntoko nivaka. Natani aahilavula oriki: ‘Mulopwana owo ti yenyu’! Mwaha wa soottheka sawe, Davidi aahileeliwa wira ‘nivaka khinarowa omala opwexa vatthokoni vawe’, vamosa ni ohaawa wa emusi awe. Nave aarowa wuulihiwa muru ohoolo wa atthu mwaha wa itampi sawe. Davidi aahisuwela wira yoottheka awe yaari yuulupale; aheemya otheka wawe oriki: ‘kihatthekela Apwiya’ Yehova.—2 Sam. 12:5-14.
NIVEKELO NA DAVIDI, NI OLEVELELA WA YEHOVA
8, 9. Moota xeeni Esalimo 51 enooniherya aya moonelo wa Davidi, nto nniixutta exeeni voohimya sa Yehova?
8 Masu a nsipo na mwene Davidi anooniherya ottharuwa wawe ni murima wotheene. Esalimo 51 yookhalana masu a Davidi oovara murima anvekela awe oleveleliwa ni Yehova, ni weemya itampi sawe. Owo aahittharuwa soottheka sawe. Davidi aanivaha efaita yuulupale wataana wawe ni Muluku. Owo aahihimya wira: ‘Apwiya! Kihotthekelani nyuwo, nyuwo pahi’. Aahinvekela Yehova ariki: ‘Muluku! Kivaheni Murima woloka: Mukiruhele-tho eroho y’ekekhai . . . . Apwiya, mukòpole! Mukivahe-tho otteliwa murima: mulipihe murim’aka, mukhalihe wowìleva’. (Esal. 51:1-4, 7-12) Niireke nyuwo munnihula murima anyu khiyamuleela Yehova itampi sanyu?
9 Yehova khaamalamalinhe maxakha yaakumiheriwe ni yoottheka ya Davidi. Mixankiho sawe saarowa ovikaniha mookumini motheene. Nto okhala wira Davidi ahiittaruxa, Yehova aahimulevelela mwaha wa ‘wojeya wawe’. (Musome Esalimo 32:5; Esal 51:17) Muluku oowerya sotheene, onnisuwela muupuwelo wa khula mutthu ni ele enimwiiriha mutthu ottheka. Ohiya ophukeliwa wira aiviwe, ntoko Nlamulo na Moise naahimya aya, Yehova aahimmorela ikharari Davidi ni Bathe-xeba. (Onam. 20:10) Nto Muluku aahimwiiriha Salomoni mwaana a Davidi ni Bethe-xeba okhala mwene wIsarayeli.—1 Wah. 22:9, 10.
10. (a) Exeeni yaamwiirinhe Yehova omulevelela Davidi? (b) Exeeni enimwiiriha Yehova ommorela mutthu ikharari?
10 Waaniheryasa, etthu ekina yaamwiirinhe Yehova omulevelela Davidi mwaha wommorela ikharari Sawuli. (1 Sam. 24:4-7) Yesu aahitthokiherya oriki moota onaathokorerya ahu akwiihu, Yehova onnithokorerya–tho siiso. ‘Muhalamuleke akhw’inyu: siso Muluku khanrowa wolamulani. Tthiri nlamulo ninrowanyu walamula akhw’inyu, Muluku onrowa wolamulani nyuwó, nave-tho mweryo onrowa anyu waphimela akhw’inyu, Muluku onrowa wophimelani yowo’. (Math. 7:1, 2) Etthu yoohakalaliha osuwela wira Yehova onniwerya olevelela soottheka sahu, hata suulupale ntoko oraruwa wala wiiva! Owo onrowa onilevelela akhala wira ninnaaleveleka akina, akhala wira ninnihimya soottheka sahu ohoolo wa Yehova, nto khiyattharuwa miteko sootakhala. Yaale anooniherya ottharuwa wekeekhai, ‘sinnittipihiwa itampi saya’ ni Yehova.—Musome Miteko 3:19.
OTTHEKA WUULUPALE WA MANASÉ, NI WIITTARUXA WAWE
11. Enamuna xeeni Mwene Manase aapanke awe itthu sootakhala vamaithoni va Muluku?
11 Nthokorerye-tho yowiiraneya ekina eri mBiibiliyani enooniherya olevelela wuulupale wa Yehova. Nuuvira iyaakha 360, nuumala Davidi opacerya olamulela, Manasé aahikhala mwene oYudeya. Etthu yowiiraka iyaakha 55 alamulelaka, owo aanipaka itthu sinci sootakhala, Yehova aanyokha awe. Itthu sikina Manasé aapaka awe tiiya: aahimutekela altari muluku iihaniwa Bayali, ‘okokhorela itheneri sothene sa wirimu, ni orumela’, nave anaapaha anamwane ntoko mukuttho. Tthiri Manasé ‘ahitepa wira sonanara vamaithoni v’Apwiya’.—2 Wah. 33:1-6.
12. Manasé aatthikenle sai wa Yehova?
12 Muhoolo mwaya Manasé aahivariwa khikumihiwa elapo awe anarowa oBabilonia ntoko namutthukiwa. Aryeene oBabilonia, waaniheryasa aahuupuwela masu a Moise aalenlyawe anaIsarayeli wira: ‘Mwakhala movelavelani, mwiraka muhawalene itthu iya sothene, weso munohokolowela w’Apwiya Muluku anyu, munimwìwelela masu aya’. (Otum. 4:30) Manasé aahimutthikela Yehova. Moota xeeni? ‘Owo ahìyeviha’, nave aahivikaniha ‘onvekela Muluku’ (ntoko sooniheriwe aya epaaxina 21). (2 Wah. 33:12, 13) Khaavo masu alempwe a nivekelo na Manasé, masi hiyo pooti okupali wira nivekelo nawe ninlikana ni nle na Mwene Davidi niri muSalimo 51. Tthiri, Manasé aahiittaruxa ni murima wothene.
13. Xeeni Yehova amulevelelaka Manasé?
13 Yehova aakhunle sai mavekelo a Manasé? “Muluku ahiwiriyana mavekelo awe, ahimmorela ikharari”. Ntoko Davidi Manasé aahikupali wira aahittheka nto khittharuwa itampi sawe. Ti maana aya Muluku aamulevelenle awe Manasé, amuttikiherya omwene awe oYerusalemu. Nto ‘Manasé aahisuwela wira [Yehova] pahi ti Muluku èkekhai’. (2 Wah. 33:13) Ti voolipiha osuwela wira Muluku ahu a ikharari, onalevelela paahi yaale aniittharuxa mweekeekhai!
NIIREKE OLEVELELA WA YEHOVA KHONIMALA?
14. Exeeni enimwiiriha Yehova omulevelela mulipa oottheka?
14 Olelo, arumeyi vakhaani paahi a Muluku, tantthuneya oleveleliwa mwaha wa soottheka suulupale ntoko sa Davidi ni Manasé. Hata vari siiso, mwaha wa Yehova waalevelela mamwene ala manli, enninikhaliherya osuwela wira Muluku ahu onnilevelela soottheka suulupale mutthu aittaruxa mweekeekhai.
15. Ninsuwela sai wira Yehova khanimulevelela mutthu mahala?
15 Ekeekhai, khinikhanle oohimya wira Yehova onnimulevelela khuta mutthu ohinipaka etthu wira oleveleliwe Nkahaya noone ovirikana okhanle wa mweettelo wa Davidi, Manasé ni atthu akina a wIsarayeli ni oYudeya. Muluku aahimuruma Natani wira ampwapwele Davidi, nto owo aahittharuwa. Mooxukhurela, Davidi aaheemererya nikhaliheryo. Okathi Manasé samphwannye aya mixankiho suulupale, ahiittaruxa vanceene. Ikwaha sinceene atthu a wIsarayeli ni oYudeya, khiyaattharuwa itampi saya. Nto Yehova khaalevelela. Masi ikwaha sinci Yehova anaaruma maprofeta awe ohimya moota waamunanara awe mweettelo woohiiwelela. (Mmusome Nehemiya 9:30.) Pooti nuumala otthika weepotthani oBabilonia, erowaka elapo aya, Yehova aahivikaniha waakumiherya atthu oororomeleya, ntoko mulipa a mukuttho Ézira, ni profeta Malakhiya. Okathi atthu yaamwiiwelela aya Yehova, awo yaanihakalala vanceene.—Neh. 12:43-47.
16. (a) Mwaha wa ohittharuwa itampi saya exeeni yiiranen’ye ni nloko na Isarayeli? (b) Exeeni khuta mutthu a wIsarayeli aatthuneya awe opaka wira aataane ni Yehova?
16 Nuumala Yesu orwa valaponi, owo oovaha mukuttho onoopola. (1 Yoh. 4:9, 10) Ntoko pinaatamu, Yehova aanikhalana moonelo wa Atithawe vaavo aalavunle awe masu oovara murima ani: ‘Yerusalemu! Nyuwo Yerusalemu! Nyuwo muniwivakasa maprofeta, munavonyakasa maluku atthu a Muluku òrumihenlyaweni. Imara ikavi siphavenlyaka wathukumanya atthu anyu, ntoko mwalyakhu onathukumanyawe axan’awe mmapuphani? Nto nyuwo khuhitthuna!’ Vano Yesu aahilavula wira: ‘Tivó emp’anyu enokhala milepé’. (Math. 23:37, 38) Nloko nle nahaattharuxa, naahirantteliwa ni Isarayeli oomunepani. (Math. 21:43; aGal. 6:16) Nto khula mutthu ari mwIsarayeli aatthuneya opaka exeeni? Khula mutthu a nloko nle, amwaataana ni Yehova ni oleveleliwa itampi orweela mwa omwaamini Muluku ni mukuttho wa Yesu Kristu. Eparakha eyo enimwaaphwanya ale akhwiiye ehinatthi ottharuwa itampi saya, vaavo anrowa aya ohihimuxiwa elapo esya.—Yoh. 5:28, 29; Mit 24:15.
OTTOTTELA MUREERELO OLEVELELA WA YEHOVA
17, 18. Nihaana opaka exeeni wira nileveleliwe ni Yehova?
17 Nxukhureleke sai olevelela wuulupale wa Yehova? Nimutakiheke Davidi ni Manasé. Nihaana weemereryaka okathi onittheka ahu, ottharuwa soottheka sahu, onvekela vanceene wira Yehova anlevelele, ni onvekela wira anivahe murima wooreera. (Esal. 51:12) Akhala wira noopaka etampi yuulupale, nivekeleke nikhaliheryo nomunepani wa axitokwene. (Yak. 5:14, 15) Moohicikha etthu sa makhalelo ahu, ti voolipiha wuupuwela wira Yehova ori Muluku aikharari ntoko silavunle awe Moise ariki: ‘Miyo k’Apwiya, Muluku omoriwa ikharari ni òvilela òpisa onanariwa, òrera murima ni òroromeleya. Miyo kinnarerela murima atthu n’anaya n’osulu aya mpakha oholo onkelelahu; Miyo kinnileva sottheka saya n’uhìwelela waya n’itampi saya.’ Nto Yehova khonaturuke olevelela.—Okhum. 34:6, 7.
18 Arumeelaka ntakiheryo nuulupale, Yehova aahilaiherya waalevelela anaIsarayeli wira aarowa ovenxa soottheka saya nnaamwi saari ‘sophilivila ntoko ekottokhwa’, owo aarowa oreeriha ntoko ‘olikana n’otthú’ wala ephepa. (Mmusome Yesaya 1:18.) Nto vano, olevelela wa Yehova ontaphulela exeeni wa hiyo? Nihaana ovekela musammaha mwaha wa soottheka sahu, nooniheryaka oxukhurela nlevelelo orweela mwa wiittaruxa wekeekhai.
19. Exeeni enirowa ahu othokorerya mwa yoosoma enittharelana?
19 Okhala wira hiyo ninnileveleliwa ni Yehova, nto naathokoreryeke sai akhwiihu? Ninkela osyaka sai okhootta omulevelela yoole opanke etampi yuulupale masi khiittaruxa mwekeekhai? Yoosoma enittharelana enoonikhaliherya otokosa mirima sahu wira niwerye olikana ni Tiithi ahu, Yehova yoowo ori ‘òrera murima ni òlevelela’.—Esal. 86:5.
[Elatarato epaaxina 26]
Mwaha wa oleveleliwa ni Yehova, Manasé aahittikiheriwa Omwene awe oYerusalemu.