Nyuwo Anamuyari Nwiixuttiheke Aniinyu Okhuma Onamwane Aya
‘ANIHU nivahiwé ni [Yehova]; nayaraka anihu noreriwa’. (Esal. 127:3) Ti maana aya axitiithi maKristau anitteeliwa aya murima okathi oniyariwa awe mwaana.
Nnaamwi vahakalalihaka omuyara mwaana, owo onnivaha muritti muulupale. Wira mwaana annuwe orineene ekumi yooloka mpakha okhala mutthu muulupale, vanitthuneya onvahaka yoolya ni omukhapelelaka. Nave wira mwaana alipiherye okokhorela weekeekhai, owo onitthuneya onvahaka yoolya yomunepani vaavo anamuyari aniilipiha aya omwiixuttiha malakiheryo a Muluku. (Mir. 1:8) Nto silini onireerela aya opacerya omwiixuttiha mwaana nave itthu xeeni sinireerela omwiixuttiha.
ANAMUYARI ANITTHUNEYA MALAKIHERYO
Moone etthu yiiranen’ye ni mulopwana a nloko na Dani iihaniwa Manowa yoowo aakhala esidade ya oZoreya wIsarayeli a khalai. Nlaikha na Yehova naahaaleela amwaarawe Manowa, yaawo yahaayara, wira yaarowa omuyara mwaana mulopwana. (Makh. 13:2, 3) Tthiri Manowa ni amwaarawe yaahitteeliwa murima vanceene mwaha wa nlipelelo nle. Hata vari siiso, awo yaanisuwela muritti muulupale yaarowa aya okhalana. Nto Manowa aahivekela ariki: ‘Xontte, [Yehova]! Mutth’uwo a Muluku onirumihalyanyu ahokoloweleke wa hiyo, anileleke sintthunahu omwiriha mwan’owo ayariwa vale’. (Makh. 13:8) Manowa ni amwaarawe yaaphavela omukhapelela saana mwaana owo. Moohaaniherya awo yaahimwiixuttiha malamulo a Muluku mwanaya owo iihaniwa Sansoni, nto wiilipiha waya waahikhumela saana. Biibiliya onnilavula ariki: ‘Vano [munepa wa Yehova] wahikelela omwettiha Sansoni’. Mwaha waivaavo, Sansoni aanivara miteko suulupale ntoko mmosa a akhulupale a wIsarayeli.—Makh. 13:25; 14:5, 6; 15:14, 15.
Nto okathi xeeni onipaceriwa awe wiixuttihiwa mwaana? ‘Okhuma enamwane awe’ Timootheyo aahiixuttihiwa ni amamawe yiihaniwa Eunisi ni apiipi awe Loide. (2 Tim. 1:5; 3:15) Tthiri Timootheyo aapacenrye onamwane awe wiixuttihiwa Soolempwa sa mBiibiliyani.
Ti va miruku anamuyari onvekelaka Yehova wira aavaheke miruku sa moota woowiixuttiha anaaya ‘okhuma enamwane aya’. Miruku 21:5 onihimya so: ‘Ovara muteko ni otthokelela onnisarya nikuphi’. Ahinatthi oyariwa mwaana, ti vooloka anamuyari wiitthokiha saana. Awo ahaana oweha itthu sinrowa omukhaliherya mwaana. Nave etthu ya efaita ompaka palano a miteko somunepani. Yoolakela ya anamuyari ori omwiixuttiha mwanaya okhuma wanipacerya.
Eliivuru eniihaniwa Early Childhood Counts—A Programming Guide on Early Childhood Care for Development (Mapacereryo a Moota Wowaakhapelela Anamwane—Eprograma ya Makhapelelo Oopacerya wa Anamwane Okhuma Onamwane Wira Yinnuweke) enihimya so: “Myeeri seiye sa onamwane, ti sooxankiha vaavo onipacerya aya ottoopare okhoomala. Okathi ene owo misiphe ni mapuro anikhomanyiwa anninnuwa vanceene”. Tthiri ti va miruku anamuyari ottottela mureerelo okathi yoowo wira muheleke mmuruni mwa anamwane masu a Muluku!
Alavulaka sa mwanawe muthiyana, maama mmosa ori pioneero ookilaatheya, onihimya so: “Miyo kaanimukuxa mwanaka nnaamwi aarina mwaakha mmosa okathi kaarowa aka olaleerya. Nnaamwi owo ahaasuwela, kinnikupali wira mwanaka owo aahiixutta etthu. Nuuvira okathi, vaavo aarina awe iyaakha piili owo aanipacerya okawa itratato mmuteko woolaleerya”.
Owiixuttiha anamwane okhuma onamwane aya onnikumiherya mireerelo. Masi, anamuyari annisuwela wira khivanikhweya owiixuttiha anamwane, maana sinnikhala mixankiho.
‘MPHAVELEKE OKATHI’
Onnikhala muxankiho muulupale okhala wira anamwane khaniiwaxexa oratteene. Muxankiho mukina okhala wira muupuwelo wa anamwane waakuva ohapuwela itthu sikina. Mwaha woowi anamwane awo osiveliwa itthu sinceene, awo anniphavela oweha itthu sotheene siniiraneya mulaponi. Anamuyari anrowa waakhaliherya sai anaaya wira yiiweke saana ele eniwiixuttiha aya?
Moone ele Moise olavunle awe. Otumererya 6:6, 7 onihimya so,“Ala molumo anovahakani olelo: mulepe mmuruni ni mmurimani mwanyu, mwalakiheryeke an’inyu. Nwixuttihe mukilathiki owannyu walá mwettaka mukwaha, mumpathiki walá nvenyaka”. Nuulumo noowi “mwalakiheryeke”, ninhela muhina wiixuttiha etthu mutthu atthikelaka ikwaha sinceene etthu emosaru. Nto mwaana mwaamukhaani onitthuneya omwiixuttiha mwa enamuna eyo ntoko okhuwari mwiri. Ntoko siisaale mutthu muulupale onittottela awe mureerelo wuupuxeriwa etthu, nave anamwane annittottela mureerelo yuupuxeriwaka!
Owiixuttiha anamwane ikeekhai sa Muluku, vanitthuneya oviriha okathi naawo. Okhala wira mikhalelo sa olumwenku ola sinnirukunuwa, ophavela okathi wa owiixuttiha anamwane pooti okhala wooxankiha. Masi murummwa Paulo aahihimya wira vanitthuneya ‘ophavela okathi’ wa ovara miteko sa eKristau. (aÉf. 5:15, 16) Vaniweryaneya sai othuma wala ophavela okathi? Okhalana moonelo wooloka voohimya sa ophavela okathi wa owiixuttiha anamwane, ni ovara miteko somunepani, ni miteko sa mulaponi, waanimuxankiha vanceene mutokweene mmosa muKristau yoowo amwaarawe ari pioneero ookilaatheya. Awo anrowa okhalana sai okathi wa omwiixuttiha mwanaya muthiyana? Tiithi owo onihimya so: “Khula voosiisu ahinatthi orowa ovara muteko, amwaaraka ni miyo naanisoma eliivuru enii: Eliivuru Aka ya Myaha sa Biibiliya. Oxekuwa, ninniimananiha oweha akhala wira noosoma yoolepa nihinatthi orowa orupa, wala olaleerya. Khanimphavela oyeleela okumi awe iyaakha iya soopacerya”.
‘ANINYU ANLIKANA NI MATTHERE’
Tthiri nimphavela wira aniihu ainuweke ni aweryeke opaka soothanla sooloka. Masi yoolakela ahu ya owiixuttiha anamwane ori wunnuuherya omphenta waya Muluku ni murima aya wotheene.—Mar. 12:28-30.
Esalimo 127:4 enihimya so: ‘Anamwane anlikana ni matthere mmatatani mwa nakhotto’. Anamwane annilikanyihiwa ni mareetthe anvonyiwa wira ehome etthu. Elikanyihiwaka ni mareetthe, anamwane aniviriha okathi vakhaani ni anamuyari aya vate okhala wira anrowa okhuma. Nto okathi owo ohaana orumeeliwa wira yiixuttihiwe saana malakiheryo a Muluku.
Aalavulaka anaawe oomunepani murummwa Yohani aahilepa ariki: ‘Kaiwaka wira anaka annettela ekekhai, kinnitteliwa murima vancene: khivo etthu ekina enkitteliha murima siso’. (3 Yoh. 4) Anamuyari maKristau, okathi onaaweha aya anaaya ‘yettelaka ekekhai’, anoolavula moohakalala masu ntoko awo a Yohani.
[Elatarato epaaxina 15]
[Elatarato epaaxina 17]
Manowa aahinvekela Yehova malakiheryo a moota woomuhuwa mwaana aarowa awe omuyara