Muhikhalakhale ‘Munviruwelaka’ Yehova
‘Mulolo onnikela mmansawe ephiro y’oxanka, nto ommalela onviruwela [Yehova]’.—MIR. 19:3.
MWAAROWA WAAKHULA SAI?
Exeeni ekhanle oniiriha opacerya ‘onviruwela [Yehova]’?
Iponto xeeni thanu sinnikhaliherya osyaka onanariwa ni Muluku?
Okathi sinniphwanya aya mixankiho nihaana wuupuwelaka exeeni?
1, 2. Xeeni vahinloka aya onvaha nthowa Yehova mwaha wa mixankiho sa apinaatamu? Nvahe ntakiheryo.
NIHIMYE wira nyuwo mwa mulopwana oothela, nto mooviriha iyaakha sinceene muhakalalaka. Masi nihiku nimosa okathi munitthikela anyu owaani, khuphwanya itthu sotheene saakanyeren’yeene. Itthu ntoko ikhatera, meesa sookwanyuliwa, iparatho soopwexakasiwa, etapeti ya vasaala yookhereyasa ni khenlokihereya. Nto empa anyu yoopakeya opuro wa ehasara. Niireke mwaarowa olavula mootuthuwa muriki: “Amwaaraka apankenleni etthu ela”? Aahiiso mwaarowa okoha so: “Tani opanke etthu ela”? Moohaaniherya mwaarowa opaka nikoho nla na nenli. Mwaha wa xeeni? Mwaha woowi nyuwo moosuwela wira ole othelanne anyu onimphenta anyu, khokhanle oohonona itthu moota owo.
2 Olelo-va ninnoona itthoko sa apinaatamu sihononeyaka, sisarenn’ye ene owali ni ohiixuumaaliha. Hiyo nimmusoma Biibiliya ninnisuwela wira Yehova khonikumiherya mixankiho iyo. Owo aahipaka elapo ela wira ekhale eparayiisu yoohakalala. (Maph. 2:8, 15) Yehova ti Muluku oophenta. (1 Yoh. 4:8) Yosoma ahu ya Biibiliya yoonikhaliherya osuwela etthu eniiriha okhumela mixankiho sinceene molumwenkuni. Khuuvo mukina onikumiherya voohikhala Satana Diabo ‘mukhulupale olumwenku’.—Yoh. 14:30; 2 aKor. 4:4.
3. Vaniweryaneya sai muupuwelo ahu opacerya waakanyerereya?
3 Ekeekhai wira khaninrowa omureya nthowa Satana sootakhala sotheene siniiraneya. Mwaha wa xeeni? Mwaha woowi mixankiho sikina sinikhumelela mwaha wa soovonya sahu. (Mmusome Otumererya 32:4-6.) Hata vari siiso, nihaana okupali wira ohimalela wahu, pooti ohonona muupuwelo ahu mpakha orowa ephiro enikumiherya ehasara. (Mir. 14:12) Moota xeeni? Hiyo pooti opaceryaka onvaha nthowa Yehova ohiya wiivaha nthowa hiyo wala Satana. Wala, pooti opacerya ‘onviruwela’ wala onanariwa ni Yehova.—Mir. 19:3.
4, 5. Moota xeeni muKristau okhanle awe oopacerya ‘onviruwela [Yehova]’?
4 Vanniweryaneya tthiri ‘onviruwela’ Yehova? Masi opaka eyo yaarowa okhala etthu ehinafaita. (Yes. 41:11) Ninrowa ophwanya exeeni? Mulipa oolepa epoesia aahilavula ariki: “Matata anyu tootepexa okhuveya, khamuniwerya owana ni Muluku”. Nihikhala-khale nilavulaka moonanariwa wala omukhupanya Yehova. Nto Miruku 19:3 onihimya so: ‘Mulolo onnikela mmansawe ephiro y’oxanka, nto ommalela onviruwela [Yehova]’. Tthiri mutthu pooti opacerya onanariwa ni Muluku vamurimani vawe. Mweettelo owo pooti wooneyaka mwa enamuna yowiipitheya. Mutthu pooti opacerya onvaha nthowa ni onyoonyiheya ni Yehova. Eyo ennimwiiriha mutthu okhuma mmulokoni wala ohikhaliherya saana malakiheryo a okokhorela wa Yehova.
5 Exeeni eniiriha ‘onviruwela [Yehova]?’ Ninrowa osyaka sai muraakho owo? Ti vooloka osuwela waakhuliwa wa makoho ala. Okhala wira wataana wahu ni Yehova Muluku onnikela muhina!
EXEENI EKHANLE OONIIRIHA ‘ONVIRUWELAA [YEHOVA]’?
6, 7. Xeeni anaIsarayeli, okathi wa Moise yaapacenrye aya omukhupanya Yehova?
6 Exeeni ekhanle oomwiiriha mutthu owaamini a Yehova opacerya onvahaka nthowa Muluku? Nrowe nithokorerye iponto thanu, nave noone sowiiraneya sa mBiibiliyani sa khalai sinittittimiherya moota akina yaamorenle aya muraakho owo.—1 aKor. 10:11, 12.
7 Olavula woohiloka wa atthu akina, pooti onihonona. (Mmusome Otumererya 1:26-28.) AnaIsarayeli yiira erikookhumaru weepotthani wEgitu. Yehova ahaakumiherya mwa mutikiniho-vo ipahu wala ihasara nloko nootakhala, nuuvira-vo ampwetexa Farawo ni anakhotto awe mPhareya Yooxeerya. (Okhum. 12:29-32, 51; 14:29-31; Esal. 136:15) Atthu a Muluku yaarowa okela Elapo Yoolaiheriwa. Nto okathi ole wooxankiha, anaIsarayeli yaahipacerya omukhupanya Yehova. Exeeni yaakumihenrye othoiwa nroromelo mmoota owo? Miyuupuwelo saya saahinanarihiwa ni moonelo woohiloka wa atthu yaarummwe orowa ohottela elapo yoolaiheriwa. (Moth. 14:1-4) Exeeni yaakhumelenle? Nloko notheene khineemereriwe okela ‘elapo yorera’. (Otum. 1:34, 35) Niireke vanniloka malavulelo a atthu akina otteettheiha waamini wahu wira nipaceryeke omukhupanya Yehova moota onnikhapelela awe?
8. Exeeni yawiirinhe atthu a Muluku, mahiku a Yesaya opacerya omukhupanya Yehova mwa mixankiho saya?
8 Ohaawa ni mixankiho pooti onittikiherya ottuli. (Mmusome Yesaya 8:21, 22.) Mahiku a Yesaya, nloko na oYudeya naahikhalana mixankiho. Yaahirukureriwa ni awanani. Yoolya yaahithowa. Anamunceene yaanivoliwa etala. Masi, yookhala etala yuulupale yaari-vo, etala yomunepani. (Am. 8:11) Okathi wa mixankiho, awo yaahihiya ophavela nikhaliheryo wa Yehova, masi enapacerya ‘omukhupanya mwene aya ni Muluku aya’. Tthiri yaaninvaha nthowa Yehova wa mixankiho sotheene saaphwanya. Niireke wira okathi sinniphwanya aya mixankiho wala ihasara, ninrowa olavulaka so: ‘Yehova aari woowi okathi kaahaawaka?’
9. Xeeni anaIsarayeli a mahiku a Ezekiyeli yaarina aya muupuwelo woohiloka?
9 Khaninsuwela itthu sotheene siniiriha. Mwaha woohisuwela itthu sotheene, anaIsarayeli mahiku a Ezekiyeli yaahipacerya woonaka wira iphiro sa Yehova ‘khasilonke’. (Ezek. 18:29) Vaakhala wira awo yaipanke anamaphukela a Muluku, yoona wira miyuupuwelo saya ti suulupale onvikana Yehova, nto enamphukela moota yoonela aya itthu. Akhala wira okathi mukina khaniiwexenxe saana nuulumo niri mBiibiliyani wala moota itthu sinniiraneela aya nto niireke vanniloka wuupuwela wira iphiro sa Yehova ‘khasilonke’?—Yobi 35:2.
10. Moota xeeni akina anitthara aya ntakiheryo noohiloka na Adamu?
10 Ninnipacerya wiivaha nthowa mwaha wa soottheka sahu wala soovonya sahu. Wanipacerya wa apinaatamu, Adamu aahinvaha nthowa Muluku mwaha wa etampi awe. (Maph. 3:12) Nnaamwi Adamu aasuwenle saana mixankiho saarowa okhumelela mwaha wa otthekela moolakelela nlamulo na Muluku, masi owo aahinvaha nthowa Yehova. Owo aahilavula wira Yehova aahinvaha muthiyana oohiloka. Okhuma okathi yoole, atthu akina annitthara ntakiheryo na Adamu na onvaha nthowa Muluku mwaha wa soovonya wala itampi saya. Ti vooloka wiikoha so: Kiireke oxankiheya waka ni soovonya saka sihaana okiiriha ohisiveliwa ni malamulo a Yehova?
11. Exeeni enniixuttiha aya ntakiheryo na Yona?
11 Otepexa wiivaha efaita. Profeta Yona aahikhalana muxankiho mwaha wa Yehova waamorela ikharari atthu oNiinive. (Yona 4:1-3) Mwaha wa xeeni? Owo oovelela ohiiraneya ele aalaleya awe voohimya sa opwettexiwa waarowa wiiraneya. Nto Yona aanitepa ovaha efaita ottittimiheya wawe ovikana waamorela ikharari atthu yiittaruxale oNiinive. Niireke hiyo nihaana omutakiha owo nitepanaka wiivaha efaita mpakha onanariwa ni Yehova mwaha wa ohipwetexa mowaakuveya olumwenku ola wootakhala? Akhala wira nipacenrye khalai olaleerya wira nihiku na Yehova niri vakhiviru, niireke nihaana onanariwaka ni Yehova mwaha woowi akina anniniveeha vaavo ninlaleya ahu ele Biibiliya enihimya awe?—2 Ped. 3:3, 4, 9.
NINROWA OSYAKA SAI ‘ONVIRUWELA [YEHOVA]’
12, 13. Akhala wira murima ahu onnipacerya omukhupanya Yehova ni miteko sawe, nihaana opaka exeeni?
12 Ninrowa opaka exeeni akhala wira murima ahu woottheka onnipacerya ohoverya miteko sa Yehova? Muhaana osuwela wira opaka eyo ololo. Eversau ekina ya Biibiliya, eniihaniwa Byington, yoolepa ela ya Miruku 19: 3 enihimya so: “Mutthu oohicala, onnaakanyerya miteko sawe, nto owo onnitthimaka orowaka owana ni Yehova”. Nuupuwelaka eyo, nrowe nithokorerye iponto thanu sinrowa onikhaliherya osyaka oxankiheya wira nihinvaheke nthowa Yehova.
13 Muhihiyererye wataana wanyu ni Yehova. Nnoowerya osyaka itthu sootthekiha siniiriha onanariwa ni Muluku wira naataane ni Yehova. (Musome Miruku 3:5, 6.) Nihaana omuroromela Yehova. Nisyakeke wiisoona okhala a miruku wala otepa wiivaha efaita. (Mir. 3:7; Mus. 7:16) Opaka eyo enooniiriha waaniheryasa osyaka onvaha nthowa Yehova itthu soohiloka siniiraneya.
14, 15. Etthu xeeni enrowa onikhaliherya wira nihaakanyeriwe ni ovaanela woohiloka wa akina?
14 Muhihiye malavulelo oohiloka a atthu akina yoohapuxakani. Mahiku a Moise, anaIsarayeli yaahikhalana mathowa a omukupali Yehova wira aarowa waakhapelela mpakha Elapo Yooleiheriwa. (Esal. 78:43-53) Okathi anaIsarayeli yaaxankiheya aya ni itthu soohiloka saalavuliwe ni anamahottela oohiroromeleya, awo ‘yahiliyala owerya’ wa Muluku. (Esal. 78:42) Akhala wira ninnuupuwelela miteko sa Yehova, nuupuwelelaka sotheene sinipakenle awe, ninrowa olipiha wataana wahu nuuwo. Opaka eyo onooniiriha osyaka mikhalelo soohiloka sa akina saarowa oniinaniha ni Yehova.—Esal. 77:11, 12.
15 Nihimye exeeni akhala wira khanniwoona saana axinnahu a mmulokoni? Okhalana muupuwelo owo onoohonona wataana wahu ni Yehova. (1 Yoh. 4:20) Okathi anaIsarayeli yahaasiveliwe aya ni okhulupale aavahiwe awe Aroni, Yehova aahoona wira awo yaahipacerya omwaapa Yehova. (Moth. 17:10) Moolikanasa, akhala wira ninlavula voohikhalela voohimya sa Yehova ni mulokiheryo awe vathi-va, onitaphulela omukhupanya Yehova.—aHéb. 13:7, 17.
16, 17. Etthu xeeni enitthuneya ahu wuupuwelelaka okathi onniphwanya aya mixankiho?
16 Musuweleke wira Yehova khahiyo tonnikumiherya mixankiho. Vanaamwi anaIsarayeli a mahiku a Yesaya yaamuhinʼye Yehova, Owo nlelo aanaakhaliherya. (Yes. 1:16-19) Moohicikha muxankiho onniphwanya, niroromeleke wira Yehova ononlipiha mwaha woowi owo onninikhapelela ni onniphavela onikhaliherya. (1 Ped. 5:7) Tthiri, owo oonilaiherya onivaha ikuru sinrowa onikhaliherya owerya ovilela ni oxintta mixankiho. 1 aKor. 10:13.
17 Akhala wira ninxankiheya mwaha wa othowa exariya, nisuweleke wira hata mulopwana oororomeleya Yobi aahihaaxiwa moohixariya, nto nihaana wuupuwelela wira Yehova khahiyo tonikumiherya otakhala iwo. Yehova onninyokha ohixariya, masi onnisiveliwa ni exariya. (Esal. 33:5) Woonasa wene, nnoosiveliwa ni miruku sa mpatthani awe Yobi oniitthaniwa Elihu aalavunle so: ‘Muluku khivo yotakhala enìrawe: Nanwerya sothene khanttheka’! (Yobi 34:10) Nto Yehova khonikumiherya mixankiho, masi owo onninivaha ‘eparakha yothene yophaveleya ni sovahiwa sothene sorera’.—Yak. 1:13, 17.
18, 19. Xeeni vahinitthuneya aya omuhoveryaka Yehova? Muhimye ntakiheryo.
18 Muhimuhoveryeke Yehova. Muluku toomalela, nave miruku sawe khasinlikana ni sawihu. (Yes. 55:8, 9) Tivonto nihaana wiiyeviha ni okhala oophwanelela nikupaliki wira miyuupuwelo sahu khasinlikana ni sa Muluku. (aRom. 9:20) Ikwaha sinceene khaninsuwela saana etthu eniiriha okhumelela mixankiho. Moohaaniherya, nyuwo munnisuwela saana masu ari eliivuru ela ya miruku: ‘Ompajerya olavula omilattuni onnòniwa okhalana exariya: masi onnemela nwanani awe, khumukhottela’.—Mir. 18:17.
19 Akhala wira nookhalana mpatthani opanke etthu emosa wanipacerya ehinisuwela ahu saana, wala enoona ahu ohiloka, niireke nihaana waakuvela omphukela wira namattheka? Wala nihaana opaceryaka omuhoveryaka nnaamwi nimusuwenle ene okhuma khalai? Akhala wira ninrowa ovikaniha omuthokorerya mpatthani ahu mwa enamuna yoophenta, nto khahiyo vootepa oloka omuroromela Tiithi ahu a wiirimu yoowo miyuupuwelelo sawe siri suulupale ovikana sawihu?
20, 21. Xeeni vanireerela aya onvaha nthowa ole oniphwanelela?
20 Muhaana ovahaka nthowa opuro oniphwanelela aya. Xeeni vaniloka aya wira siiso? Hiyo ninnikhalana nthowa, mwaha wa mixankiho sahu sikina. Nto nakhalana nthowa, nihaana weemererya. (aGal. 6:7) Muhikhalakhale munvahaka nthowa Yehova mixankiho sanyu. Xeeni mweettelo owo ohinloka aya? Muthokorerye ntakiheryo nla: Ekaaro pooti owerya weetta yaakuvaka vanceene. Nkahaya muupuwele akhala wira mulipa oneettiha onnivikaniha mutita wa wuupiha ekaaro eyo aviraka vakurvani, nto khukhumelela ehasara. Niireke mulipa opanke ekaaro owo torina nthowa? Tthiri nnaari! Vamosaru, Yehova oonipaka wira nithanleke opaka etthu ennisivela. Masi owo oopaka malakiheryo wira nipakeke soothanla mwa miruku. Nto niireke vanniphwanelela onvaha nthowa Mpattuxa ahu mwaha wa soothanla sahu soohiloka?
21 Ekeekhai wira khahiyo mixankiho sahu sotheene mwaha wa soovonya sahu ni miteko soohiloka. Itthu sikina sinikhumelela mwaha woowi ‘oreriwa ni otakhaliwa khunimuthanla mutthu’. (Mus. 9:11) Nto nihiliyale wira Satana Diabo, tori mwaneene nthowa na sootakhala sinikhumelela. (1 Yoh. 5:19; Wis. 12:9) Owo tori nwanani; khahiyo Yehova!—1 Ped. 5:8.
NVAHEKE EFAITA WATAANA WANYU NI YEHOVA
22, 23. Nihaana wuupuwelaka exeeni akhala wira nookhumuwa mwaha wa mixankiho sahu?
22 Nto soophwanyani mixankiho, muupuweleleke ntakiheryo na Yoxuwa ni Kalebi. Moovirikana ni alipa oohottela muloko, nto alopwana ala anli oororomeleya, yaahilavula ihapari sooreera. (Moth. 14:6-9) Awo yahooniherya omwaamini Yehova. Hata vari siiso, awo yaahivira yeettaka mutakhwani iyaakha 40 ni anaIsarayeli akina oohiiwelela. Niireke Yoxuwa ni Kalebi ahiikhupanyerya mwaha wa okathi ole wooxankiha? Nnaari. Awo yaamuroromela Yehova. Niireke yaahireelihiwa? Tthiri yaahireelihiwa! Nto nloko notheene naahipweteya mutakhwani, masi Yoxuwa ni Kalebi aahikela Elapo Yooleiheriwa. (Moth. 14:30) Nave, ninrowa waakhela mareeliho a Yehova akhala wira ‘khaninkhulumuwa’ opaka yootthuna ya Muluku.—aGal. 6:9; aHéb. 6:10.
23 Akhala wira nyuwo mookhumuwa mwaha wa mixankiho sanyu, wala soovonya sa akina, wala soovonya sanyu, nto exeeni enrowa anyu opaka? Muhaana owehexexaka mikhalelo sooreera sa Yehova. Mooneke nlipelelo Yehova onoovahaaweni. Mwiikoheke so: ‘Vaakhanle wira nkinimurumeela Yehova kaarowa okhala sai?’ Okathi wotheene mwataaneke nuuwo, muhikhalakhale muhiyaka murima anyu onanariwaka ni Yehova!
[Elatarato epaaxina 10]
[Elatarato epaaxina 12]
Owiiwelela atthu anilavula itthu soohiloka pooti ohonona mukhalelo ahu (Moone ettima 7)
[Elatarato epaaxina 14]
Yoxuwa ni Kalebi yaahireelihiwa ni Yehova mwaha wa omuroromela (Moone ettima 22)