Nwiixuttiheke Aniinyu Acikhaani Omurumeela Yehova

“Mutth’uwo a Muluku . . . anilèleke sintthunahu omwiriha mwan’owo ayariwa vale”.​—MAKH. 13:8.

ISIPO: 41, 6

MUNROWA OMUTAKIHA SAI YESU . . .

mwaaphentaka aniinyu?

mooniheryaka wiiyeviha ntoko namuyari?

mwaakhaliheryaka aniinyu mwa miruku?

1. Exeeni Manowa aapanke awe nuumala osuwela wira aarowa okhala tiithi?

MANOWA ni mwaarawe yaanisuwela wira khivaaweryaneya omuyara mwaana, okhala wira mwaarawe aari muthiyana ahaayara. Masi, nihiku nimosa nlaikha na Yehova naahimukhumelela mwaarawe, nimuleela wira aarowa omuyara mwaana. Awosa yaahihakalala vanceene ni muhupi ole wootutuxerya! Nnaamwi aahakalanle vanceene, Manowa aanisuwela muritti arina awe. Yaarowa omuhuwa sai mwanaya wira omphenteke Yehova, elapo yeele atthu anceene yiira aya itthu sootakhala? Manowa “ahimulompa Muluku” iiraka: “Xontte, Apwiya! Mutth’uwo a Muluku [nlaikha] onrumihenlyanyu ahokoloweleke wa hiyo, anilèleke sintthunahu omwiriha mwan’owo ayariwa vale”.​—Makh. 13:1-8.

2. Exeeni enitthuneya anyu opaka wira nwiixuttihe aniinyu? (Nwehe-tho ekaaxa eni “Anaxikola Anyu a Biibiliya Ootepexa Otthuneya.”)

² Akhala wira mwa namuyari, woonasa wene munuupuwela ntoko Manowa. Mookhalana muritti muulupale wa waakhaliherya aniinyu omusuwela ni omphenta Yehova. (Mir. 1:8) Wira awerye opaka eyo, anamuyari anceene aapaka eprograma ya Omulompa Muluku Vatthokoni, enikumiherya mireerelo. Masi muhaana opaka itthu sikina, ohiya paahi otthara eprograma eyo. (Mmusome Otumererya 6:6-9.) Exeeni enrowa wookhaliheryani owiixuttiha aniinyu omphentaka ni omurumeelaka Yehova? Mwaha ola ni onittharelana, ninrowa othokorerya ntakiheryo na Yesu. Nnaamwi Yesu ahaarina mwaana, anamuyari pooti ottottela mureerelo enamuna aixuttiha awe, okhala wira owo aixuttiha moophenta, mowiiyeviha ni mwa miruku. Vano, nrowe nthokorerye mikhalelo iya.

MWAAPHENTEKE ANIINYU

3. Yesu aawoonihenrye sai awiixutti awe wira aanaaphenta?

³ Yesu khoovelela waaleela awiixutti awe wira aanaaphenta. (Mmusome Yohani 15:9.) Aaniwooniherya wira aanaaphenta, vaavo yaaviriha aya okathi hoothe atthekulaka. (Mar. 6:31, 32; Yoh. 2:2; 21:12, 13) Yesu khahiyo paahi aari mwiixuttihi aya, masi aari-tho mpatthani aya. Tivonto, awiixutti khiyaahoverya wira Yesu aanaaphenta tthiri. Munrowa omutakiha sai Yesu?

4. Munrowa owooniherya sai aniinyu wira munnaaphenta? (Nwehe elatarato yoopacerya.)

⁴ Mwaleeleke aniinyu wira munnaaphenta, ni khula okathi nwooniheryeke wira munnaavaha efaita. (Mir. 4:3; Tito 2:4) Samuel, yoowo onikhala wAustralia, onihimya so: “Okathi kaari aka mwaana, paapa aka aanikisomela Eliivuru Aka ya Myaha sa Biibiliya khula ohiyu. Aanikaakhula makoho aka, aanikikhupaarela, aanikibexari kihinatthi orupa. Muhoolo mwaya kaahitikinihiwa okathi kaasuwenle aka wira paapa aka khiireliwa itthu iye okathi aari awe mwaana. Hata vari siiso, owo aaniimananiha okiphenta. Nto eyo yaahinikhaliherya okhala apatthani oolipa, kaanihakalala ni kaanimuroromela”. Mwaleeleke aniinyu ikwaha sinceene wira munnaaphenta. Nwooniheryeke wira munnaavaha efaita. Nvaaneleke naawo, mulyeeke hoothe ni mutthekuleke hoothe.

5, 6. (a) Exeeni Yesu oniwiiriha awe ale onaaphenta awe? (b) Mutthokiherye enamuna yooreerela waattaruxa anamwane.

⁵ Yesu ohimmye so: “Miyo kinniwulumela [waapwapwela] othene ale anaphentaka, kinattaruxa”.a (Wis. 3:19) Nnaamwi ikwaha sinceene awiixutti a Yesu yaakhulana wira amusuwele ti pani aari muulupale a yaawo, Yesu khaanyanyanle. Hata vaavo yahaiwelela aya okathi aalopola awe, Yesu moophenta ni mooreerela murima aanaattaruxa, okathi woophwanelela.​—Mar. 9:33-37.

⁶ Mwaha woowi munnaaphenta aniinyu, nto muhaana waattaruxaka. Ikwaha sikina, vanniphiyerya paahi omuleela mwaana nthowa naya etthu emosa eryaaya yoohiloka. Masi ikwaha sikina mwaana pooti ohiiwelela ele enihimya anyu. (Mir. 22:15) Nto vakhala wira khoniiwelela, muhaana omutakiha Yesu. Mphavele okathi ni opuro wooreerela wira mmuttaruxe mwaninyu, mwa enamuna yoophenta, moopixa murima, mmulakiheryaka ni omwiixuttiha etthu yookhalela. Murokora mmosa onikhala wAfrica do Sul, oniitthaniwa Elaine, onihimya so: “Anamuyari aka yaanikittaruxa. Awo khahiyo yaamukoopopiha paahi. Yahimya wira yaamukihukhumu, nto yaanikihukhumu tthiri. Masi khiyaakiviruwela ni yaanikileela mathowa aya. Nto eyo yaanikiiriha waaroromela. Mwaha wa yeeyo, kaanisuwela wira anamuyari aka yaanikiphenta”.

MOONIHERYEKE WIIYEVIHA

7, 8. (a) Yesu oonihenrye sai wiiyeviha okathi aavekela awe? (b) Mavekelo anyu anrowa owiixuttiha sai aniinyu omuroromela Muluku?

⁷ Nkahaya muupuwele moota awiixutti a Yesu yoonenle aya nuumala owiriyana wala otthokiheriwa nivekelo nimosa nookiserya Yesu aapanke awe. Owo aalavunle so: “Abbá, Tithi! Nyuwo munniwerya sothene: mukàkiherye ohawa nno. Vano ehìreye ntoko sintthunaka: yireye ntoko sintthunanyu”.b (Mar. 14:36) Nivekelo nna na Yesu naahiwiixuttiha awiixutti awe wira yahaana onvekelaka Yehova, maana hata Mwaana a Muluku aari oohittheka aanivekela okhaliheriwa.

⁸ Etthu xeeni aniinyu aniixutta aya ni mavekelo anyu? Ekeekhai wira khahiyo munivekela wira nwiixuttihe aniinyu paahi. Hata vari siiso, okathi onivekela anyu mowiiyeviha, aniinyu anniixutta omuroromela Yehova. Ana, yoowo onikhala oBrasil, onihimya so: “Okathi waakhumelela aya mixankiho, ntoko owereiwa wa axitaata aka, nto anamuyari aka yaaninvekela Yehova wira aalipihe wira aweryeke ovilela muxankiho ole ni apakeke soothanla sooloka. Hata axankiheyaka vanceene, yaanimuhiyerya Yehova mixankiho saya. Nto kaahiixutta wira kihaana omuroromela Yehova”. Okathi onivekela anyu muryeene ni aniinyu, khahiyo waavekelela awo paahi. Nave-tho munvekeleke Yehova wira ookhaliheryeni nyuwo, woonasa wene wira nwerye onvekela patarau anyu woohiyani orowa okongresuni, wira nwerye omulaleerya namwaattamanani anyu, wala wookhaliheryani mwa inamuna sikina. Nto mmuroromeleke Yehova mowiiyeviha, mwiira siiso, aniinyu anrowa wootakihakani.

9. (a) Yesu aawiixuttihale sai arummwa awe waarumeela akina mowiiyeviha? (b) Exeeni aniinyu anirowa aya wiixutta, akhala wira munnaarumeela akina mowiiyeviha?

⁹ Yesu aahaaleela awiixutti awe wira yahaana waarumeela akina mowiiyeviha, nave-tho aahaavaha ntakiheryo. (Mmusome Luka 22:27.) Aahiwiixuttiha arummwa awe wiivahererya ni murima wotheene ovara muteko wa Yehova ni waakhapelelaka saana akhwaaya. Nto ntakiheryo nanyu nooloka, ninrowa owiixuttiha aniinyu opakaka etthu emosaru. Maama mmosa orina anamwane anli, oniitthaniwa Debbie, onihimya so: “Miyo nkaamukhalela ehace iyaka mwaha wa okathi aaviriha awe okhapelelaka itthu sa mmulokoni ntoko mutokweene, maana kaanisuwela wira khula okathi naaphavela ahu wira okhale ni hiyo, owo aanikhala”. (1 Tim. 3:4, 5) Nto iyawe murokora ole, Pranas, onnincererya oriki: “Muhoolo mwaya, aniihu yaanikhalela nthiti okhaliherya okathi wa Asembeleya ni miteko sikina sa Muluku. Yaanihakalala, yanaapaka apatthani ooloka, ni yaanisiveliwa okhala ni annaya a eKristau!” Vano, emusi yotheene ennimurumeela Yehova mmuteko wa okathi wotheene. Woonasa wene, aniinyu anrowa otakihaka moota munooniherya anyu wiiyeviha ni ophavela waarumeela akina.

MUKHALEKE A MIRUKU

10. Yesu oonihenrye sai miruku, okathi muttitthi waamutthara aya?

¹⁰ Yesu aahikhalana miruku soomalela, nto khahiyo aaweha paahi ele atthu yaapaka aya, masi mathowa yaawiiriha opaka etthu eyo. Okathi omosa, atthu yanwiriyana oGalileya, yaaniphavela omutthara. (Yoh. 6:22-24) Masi Yesu, okhala wira aaniwerya osuwela ele yaari vamurimani vaya, nto aahoona wira atthu ale yaaphavela yoolya ya werutthuni paahi, ohiya ele aixuttiha awe. (Yoh. 2:25) Aahiweha wira muupuwelo aya waari woohiloka, nto ahaakhaliherya olokiherya.​—Mmusome Yohani 6:25-27.

11. (a) Munrowa orumeela sai miruku wira moone akhala wira aniinyu annisiveliwa muteko woolaleerya? Nvahe ntakiheryo. (b) Munrowa waakhaliherya sai aniinyu osiveliwa muteko woolaleerya?

¹¹ Nnaamwi muhiweryaka osuwela ele eri vamurimani va mutthu, masi pooti orumeela miruku wira musuwele akhala wira mwaninyu onnisiveliwa muteko woolaleerya. Okathi anilaleerya aya ni emusi aya, anamuyari anceene annimumulela vakhaani wira alye etthu ahinatthi otthikela-tho olaleerya. Nto okathi owo woomumula, nyuwo pooti wiikoha so: ‘Kiireke mwanaka ola onnisiveliwa muteko woolaleerya wala onisiveliwa paahi okathi yoole onimumula ahu wira nilyeeke etthu?’ Moona wira khonisiveliwa vanceene ni muteko woolaleerya, nto mweererye opaka etthu wira osiveliweke ni muteko owo. Mwaavaheke miteko kamosa-kamosa, seiyo sinrowa owiirihaka osiveliwa olaleerya.

12. (a) Yesu aarumenle sai miruku wira aalopole awiixutti awe voohimya sa mweettelo woohiloka? (b) Nthowa xeeni awiixutti awe yaatthuneya aya olopoliwa?

¹² Mwa miruku, Yesu aanisuwela itthu saarowa omwiiriha mutthu ottheka. Mwa ntakiheryo, atthareli awe yaanisuwela wira orupihana woohiloka ti wootthekeya. Masi Yesu aahaalopola voohimya sa itthu saarowa owiiriha opaka etampi eyo. Owo aahimmye so: “Ole oninweha muthiyana anwereihaka murima, òraruwana muthiyan’owo ni murima. Nitho nanyu nolopwana notthekihakani, musyole, murihé”. (Math. 5:27-29) Moolumo ale yaari ootepa otthuneya wa maKristau yaakhala muttetthe wa aRoma. Mulipa oolepa sowiiraneya mmosa, onihimya wira okathi ole, mutthu aarowa oteatru wa aRoma, “maitho ni maaru [awe] yaaniweha ni wiiwa itthu soohiloka, nto itthu sootepexa ohiirya ti saatthapeliwa vanceene”. Mwa miruku, Yesu aahaalopola awiixutti awe voohimya sa itthu saarowa ohonona mweettelo aya wooloka.

13, 14. Munrowa waakhaliherya sai aniinyu wira asyake matthekulelo oohiloka?

¹³ Miruku sinimookhaliheryani waakhapelela aniinyu wira ahiphwanyiwe mixankiho soomunepani. Olelo-va, epornografia ni itthu sikina soohiloka sootepa wuulaana, nto vanitthuneya waakasoopa aniinyu. Ekeekhai wira anamuyari annaaleela anaaya wira ahaana osyaka matthekulelo oohiloka. Masi mwarumeela miruku, pooti osuwela etthu enrowa omwiiriha mwaninyu ophavela oweha epornografia. Mwiikoheke so: ‘Etthu xeeni enrowa omweehererya mwanaka oweha epornografia? Kiireke onnisuwela mathowa aya varyaaya vowoopiha oweha itthu iyo? Kiireke ka mutthu oopatthaneya, yoowo mwanaka okhanle awe oovaanelana okathi oneehereriwa awe oweha epornografia?’ Hata aniinyu aryeene acikhaanixa, nyuwo pooti waaleela so: “Mwamphwanya websaite oohiloka, nto murima anyu khiyaphavela onweha, xontte mukileele. Muhuuleliwe muru, miyo kiniphavela wookhaliheryani”.

¹⁴ Nave-tho miruku sinimookhaliheryani othanla saana matthekulelo anyu. Pranas, yoole oromoliwe ottuli, onihimya so: “Itthu seiye hiyo anamuyari sinithanla ahu wira niwiriyaneke, niweheke, aahiiso nisomeke, nave-tho emusi ahu yotheene pooti othanlaka seiyo. Pooti nihimyaka itthu sinceene, masi aniihu anrowa owehaka ele enivara ahu ni atakiheke yeeyo”. Vakhala wira aniinyu anniwoonani muthanlelaka oratteene matthekulelo anyu, nto awo pooti wootakihakani.​—aRom. 2:21-24.

MULUKU EEKEEKHAI ONIMOOKHALIHERYANI

15, 16. (a) Exeeni enoororomelihani wira Muluku onimookhaliheryani owiixuttiha aniinyu? (b) Exeeni enrowa ahu othokorerya mwaha onittharelana?

¹⁵ Exeeni yiiraneyale nuumala Manowa ovekela okhaliheriwa omuhuwa mwanawe? “Muluku ahìwa molumo a Manowa”. (Makh. 13:9) Nyuwo anamuyari, Yehova onoowiiwani. Owo onimwaakhula mavekelo anyu ni onimookhaliheryani owiixuttiha aniinyu. Nto nyuwo munoowerya owiixuttiha aniinyu mwa niphento, mowiiyeviha, ni mwa miruku.

¹⁶ Okhala wira Yehova onnaakhaliherya anamuyari waahuwa anaaya acikhaani, vamosaru, owo onimwaakhaliherya anamuyari owiixuttiha anaaya amiravo. Mwaha onittharelana, ninrowa oweha moota wootakiha ophenta, wiiyeviha ni miruku sa Yesu, okathi oniwiixuttiha anyu aniinyu amiravo omurumeela Yehova.

[Inoota]

[Ekaaxa epaaxina 4]

Anaxikola Anyu a Biibiliya Ootepexa Otthuneya

OKATHI onimusoma ahu Biibiliya ni atthu akina, hiyo ninnirumeela eliivuru Biibiliya Oniixuttiha Exeeni Tthiri? wira naakhaliherye omusuwela Yehova ni wiixutta ekeekhai ya mBiibiliyani. Nave-tho ninnisoma eliivuru ‘Mukhaleke Mophentani Mwa Muluku’ wira naakhaliherye anaxikola ahu omphenta Yehova ni weettela malamulo awe.

Aniinyu tari anaxikola anyu a Biibiliya ootepexa otthuneya. Awo ahaana omusuwela Yehova, omphentaka yena ni weettela malamulo awe. Tivonto, ninnootumereryani waasomiha aniinyu murumeelaka iliivuru Biibiliya Oniixuttiha Exeeni ni ‘Omphenta Muluku’, hata iyanyu wala mwaarinyu ohimukokhorelaka Yehova. (Mir. 6:20) Vaweryaneya, murumeele makhaliheryo ari mu jw.org, wira mwaakhaliherye aniinyu wuupuwelelaka itthu aniixutta aya muliivuruni Biibiliya Oniixuttiha Exeeni, ni weererya waavara murima.​—Nwehe opuro oni ENSINOS BÍBLICOS > ADOLESCENTES.c

[Enoota]