Nwiixuttiheke Aniinyu Amiravo Omurumeela Yehova

“Vano Yesu aninnuwa mosuwelani ni mwerutthuni, anitepa osiveliwa ni Muluku n’atthu”.​—LUKA 2:52.

ISIPO: 41, 11

MUNROWA OMUTAKIHA SAI YESU . . .

mwaaphentaka aniinyu amiravo?

mooniheryaka wiiyeviha ntoko namuyari?

mwaakhaliheryaka mwa miruku aniinyu amiravo?

1, 2. (a) Itthu xeeni sinaaxankiha anamuyari akina, vaavo anaaya aniphwanya aya omiravo? (b) Itthu xeeni amiravo a eKristau akhanle aya oottottela mureerelo nlelo aryeene amiravo?

ETTHU emosa enitepa waahakalaliha anamuyari a eKristau, ori waaweha anaaya abatiziwe ene. Murokora mmosa oniitthaniwa Berenice, yoowo anaawe axexe yaabatiziwe ahinatthi ophiyerya iyaakha 14, onihimya so: “Eyo yaari etthu yootepexa ohakalaliha. Naahihakalala okhala wira aniihu yaahilakela omurumeela Yehova”. Onnincererya-tho oriki: “Masi naanisuwela wira yaamukumana mixankiho sinceene, mwaha woowi nlelo amiravo”. Woonasa wene munnaakhulela ele Berenice enihimya awe, akhala wira aniinyu aaphiya omiravo wala annaattamela.

² Nnaamwi eemereryaka wira okathi wa omiravo onnikumiherya mixankiho sinceene wa anamuyari ni anamwane, mulopwana mmosa onisoma munnuwelo wa anamwane onihimya so: “Okathi wa omiravo, khahiyo okathi amiravo anikhala aya ntoko ‘alolo’ wala ‘anamwane’. Owo okathi wooreerela, yoole amiravo anuupuwela aya itthu sinceene, waapaka apatthani, ni wiixutta itthu isya”. Aniinyu anoowerya okhalana wataana wooloka ni Yehova, okhalana ni otthara soolukama somunepani ni wiivahererya wa Yehova, nlelo aryeene amiravo. Awo anooweha wira omiravo okathi wooreerela wunnuwa momunepani, ntoko siirale awe Yesu, oryeene mmiravo. (Mmusome Luka 2:52.) Ntoko namuyari, munrowa waakhaliherya sai aniinyu okathi owo wootthuneya? Nkahaya muthokorerye moota Yesu oonihenrye awe mikhalelo ntoko ophenta, wiiyeviha ni miruku, nuumala wunnuwa. Moota xeeni mikhalelo iyo sinrowa aya wookhaliheryani omwiixuttiha mwaninyu mmiravo omurumeela Yehova?

MWAAPHENTEKE ANIINYU AMIRAVO

3. Xeeni Yesu aahimya awe awiixutti awe okhala apatthani awe?

³ Yesu aari mpatthani oophenta ni oororomeleya. (Mmusome Yohani 15:15.) Okathi wa Isarayeli a khalai, pwiya, khaamuleela murumeyi awe itthu suupuwela awe opaka. Masi Yesu aahiwooniherya arummwa awe okhala pwiya ni mpatthani oororomeleya. Aaniviriha okathi ni awosa, aanaaleela itthu sawe, ni aanaawiriyana okathi yaamuleela aya itthu saya. (Mar. 6:30-32) Ovaanela moota owo, waahilipiha wataana waya ni wahaalokiherya wira yaakhele miritti suulupale muhoolo, mmuteko wa Muluku.

4. Vaniweryaneya sai okhala mpatthani a aniinyu, okathi omosaru mooniheryaka wira munneettiherya saana okhulupale ovahiwe anyu? (Nwehe elatarato yoopacerya.)

⁴ Tiithi mmosa orina anamwane anli, oniitthaniwa Michael onihimya so: “Nnaamwi hiyo anamuyari nihirina iyaakha sa aniihu, masi nnoowerya okhala apatthani aya”. Apatthani anniviriha okathi hoothe. Munvekele Yehova ookhaliheryeni, ni moone akhala wira vanniweryaneya ovukula miteko sanyu wala itthu sikina, wira nviriheke okathi ni aniinyu. Apatthani annisiveliwa itthu imosaru. Nto, mwiimananiheke osiveliwa itthu seiye sinimusivela mwaninyu mmiravo, ntoko muusika, ifilme ni axooku animusivela. Ilaria, yoowo onikhala wItalia, onihimya so: “Anamuyari aka yaanisiveliwa muusika waakisivela. Mwekeekhai, mpatthani aka muulupale aari paapa aka, nto kaanimuleela khula etthu, hata itthu sootepa oxankiha, kihoovaka etthu”. Vaavo vanikhala anyu mpatthani a mwaninyu mmiravo ni munamukhaliherya ‘watana ni Muluku’, eyo khenitaphulela wira munoohiyererya okhulupale ovahiwe anyu, ntoko namuyari. (Esal. 25:14) Ohiya-vo, munooniherya wira munnimphenta ni omuttittimiha mwaninyu, nto vannimukhweela woolimalelani. Woonasa wene, vanrowa omukhweelaka wooleelani itthu sinimuxankiha.

5. Yesu aakhalihenrye sai awiixutti awe wira aphwanye ohakalala mwaha wa ovara muteko wa Yehova ni nthiti?

⁵ Yesu aaphavela wira awiixutti awe ni apatthani awe ahakalaleke mwaha wa ovara muteko wa Yehova ni nthiti. Tivonto, aaniphavela wira akhaleleke nthiti miteko sa Muluku. Aaphavela wira aluttuweliweke waapaka awiixutti akina! Moophenta, aahaalipiherya awiixutti awe wira aarowa waakhaliherya wira akhumele saana.​—Math. 28:19, 20.

6, 7. Xeeni varyaaya vooloka anamuyari okhalana eprograma yootthareya ya omurumeela Yehova vatthokoni vaya?

⁶ Tthiri nyuwo munniphavela wira aniinyu amiravo avikaniheke okhala saana momunepani. Nave, Muluku oniphavela wira mwaahuweke aniinyu “mwalakaka n’ikano s’Apwiya”. (aÉf. 6:4) Murumeeleke okhulupale ovahiwe anyu ni Muluku wira aniinyu akhale saana momunepani. Mwa ntakiheryo: Nyuwo munniphavela wira aniinyu aroweke oxikola, mwaha woowi munnisuwela wira eyo etthu yootthuneya ni muniphavela wira awo asiveliweke wiixutta itthu. Vamosaru, anamuyari oophenta anniphavela wira anaaya aphwanyeke mireerelo sa “ikano s’Apwiya” mmithukumanoni sa eKristau ni iprograma sikina somunepani. Okhala wira wiixuttihiwa ni Muluku ti wootepexa otthuneya, nto nyuwo munrowa waalipiheryaka aniinyu osiveliwa itthu somunepani ni okhalana ankhili. (Mir. 24:14) Sisaale ntoko Yesu aakhalihenrye awe awiixutti awe, muhaana ophavela omukhaliherya mwaninyu mmiravo wira okhumele saana mmuteko woolaleerya. Mmukhaliherye osiveliwa wiixuttiha Nuulumo na Muluku ni okhalana eprograma yooloka ya olaleerya.

⁷ Moota xeeni okhalana eprograma yoororomeleya ya ovara miteko sa Muluku enimukhaliherya aya mmiravo? Erin, onikhala wAfrica do Sul, onihimya so: “Okathi munceene, hiyo anamwane naaniixinliha mwaha wa omusoma Biibiliya, orowa omuthukumanoni, ni olaleerya. Ikwaha sikina naanilakelela weererya osyaka yoosoma ya emusi. Masi anamuyari ahu khiyeemererya eyo”. Onnincererya-tho oriki: “Eyo yookikhaliherya ovilela. Vano eprograma aka yanteya, nto kinninkheliwa, khiyatthikela mowaakuveya. Nto anamuyari aka yahaakivahale ntakiheryo nooloka, tthiri nkaarowa woonelaka siiso. Vaakhanle wira anamuyari aka yanoolowela miteko sa Muluku, nto vaarowa okikhweelaka ocompela mithukumano ni miteko sikina somunepani”.

NVAHEKE NTAKIHERYO NA WIIYEVIHA

8. (a) Yesu oonihenrye sai wiiyeviha? (b) Eyo yaakhalihenrye sai awiixutti awe?

⁸ Nnaamwi Yesu aari mutthu oomalela, mowiiyeviha aaneemererya wira khaasuwela itthu sotheene, ni aanimuroromela Yehova. (Mmusome Yohani 5:19.) Niireke eyo yaahiwiiriha awiixutti awe ohimuttittimiha? Nnaari. Vaavo aatepa awe omuroromela Yehova, awiixutti awe yaanitepa omuroromela yena. Muhoolo mwaya, yaahitakiha wiiyeviha wa Yesu.​—Mit. 3:12, 13, 16.

9. Munrowa waakhaliherya sai aniinyu, vaavo muneemererya anyu soovonya sanyu ni oveka musammaha?

⁹ Sookhala itthu sinceene sihiniwerya ahu, ni moovirikana ni Yesu, hiyo naatthu oohimalela ni anittheka. Mweemereryeke wira khamuniwerya itthu sotheene ni mweemereryeke soovonya sanyu. (1 Yoh. 1:8) Mwa ntakiheryo, xeefi xeeni mwaarowa anyu omuttittimihaka: ole oneemererya avonya vale, wala ole ohiniphavela ovekela oleveleliwa? Okathi mwaninyu oniiwa awe nvekaka musammaha, woonasa wene onrowa otepaka woottittimihani. Nave-tho pooti wiixutta weemererya soovonya sawe. Rosemary, yoowo orina anamwane araru oowunnuwa, onihimya so: “Hiyo naaneemererya soovonya sahu, nto eyo yaaniwiiriha aniihu onileela mixankiho saya. Okhala wira naaneemererya wira khaninwerya itthu sotheene, nto aniihu yaahiixutta wira otheene ahu nohaana ophavela nikhaliheryo noororomeleya ni yaanisuwela opuro onireerela ophwanya nikhaliheryo nlo. Yaaniphavelasa mu iliivuru sahu ni naanivekela hoothe”.

10. Yesu oonihenrye sai wiiyeviha okathi aaruma awe etthu awiixutti awe?

¹⁰ Yesu aahivahiwa owerya wa waaruma atthareli awe. Masi mowiiyeviha, anaaleela mathowa aya. Mwa ntakiheryo, owo khaarumme paahi awiixutti awe wira ahaana ophavela Omwene ni exariya ya Muluku, masi aahihimya-tho oriki: “Vano sikina sothene Muluku onimophwanyihani ni wunjererya”. Nuumala waaleela wira “Muhalamuleké akhw’inyu”, owo aahaaleela nthowa naya, oriki: “Siso Muluku khanrowa wolamulani. Tthiri nlamulo ninrowanyu walamulana akhw’inyu, Muluku onrowa wolamulanani nyuwó”.​—Math. 6:31–7:2.

11. Xeeni ikwaha sikina, varyaaya voreerela omuleela mwaninyu mmiravo nthowa naya munikumiherya anyu nlamulo wala munipaka anyu yoothanla emosa?

¹¹ Vaatthuneyaka vale, mmuleeleke mwaninyu mmiravo nthowa naya munikumiherya anyu nlamulo wala munipaka anyu yoothanla emosa. Akhala wira mmiravo anyu onnisuwela mathowa aya, woonasa wene onimwiiwelela ni murima wotheene. Barry, yoowo orina anamwane axexe, onihimya wira: “Waaleela mathowa, onimwaakhaliherya aniinyu woororomelani okhala wira animoonaka wira khamunipaka soothanla mphavelaka wooniherya okhulupale anyu paahi”. Wira siiso onnimukhaliherya mmiravo wunnuwa orumeelaka muupuwelo awe wooloka. (aRom. 12:1) Barry onitthokiherya oriki: “Amiravo anitthuneya wiixutta moota woopaka soothanla arumeelaka muupuwelo aya, ohiya mookhummwa murima”. (Esal. 119:34) Vaavo mowiiyeviha munimuleela anyu mmiravo anyu mathowa aniwiirihani opaka yoothanla emosa, owo onnoona wira munnimuthokorerya ni onninnuwa, nto onniixutta opaka soothanla orumeelaka muupuwelo wooloka.

MOONIHERYEKE MIRUKU NI MMUSUWELEKE SAANA MMIRAVO ANYU

12. Yesu aarumenle sai miruku wira omukhaliherye Pedru?

¹² Yesu aanirumeela miruku ni aanisuwela itthu awiixutti awe yaatthuneya aya okhaliheriwa. Mwa ntakiheryo, murummwa Pedru aaphavela mureerelo wa Yesu, vaavo aamutumerenrye awe wiireerela murima wira ohiiviwe. Masi Yesu aanisuwela wira moolumo a Pedru yooniherya muupuwelo woohiloka. Wira omukhaliherye Pedru ni awiixutti akina, Yesu aahinvaha miruku sowiiwanyeya voohimya sa ele enirowa owiiraneela ale anisyaka opaka yoolakela ya Yehova okathi wa muxankiho. (Math. 16:21-27) Pedru aahiixutta etthu.​—1 Ped. 2:20, 21.

13, 14. (a) Exeeni yaarowa wookhaliheryani oweha wira waamini wa mwaninyu onnivukuwa? (b) Munrowa orumeela sai miruku wira mmukhaliherye mwaninyu mmiravo?

¹³ Munvekeleke Yehova wira oovaheeni miruku wira musuweleke moota woomukhaliherya mwaninyu. (Esal. 32:8) Mwa ntakiheryo, exeeni yaarowa woosuwelihani wira waamini waya onnivukuwa? Waaniheryasa, ohakalala wawe onnivukuwa, oopacerya waalavula anna moohiloka, aahiiso oopacerya wiipithiha myaha sawe. Muhaakuvele wuupuwela wira owo orina mirima miili vano, wala yookhala yoottheka yuulupale epanke awe.a Masi, muhihiyererye siiso, muupuwelaka wira owo oniviriha okathi wooxankiha paahi.

¹⁴ Ntoko iirale awe Yesu, mpakeke makoho mooreerela murima ni mwa nttittimiho. Mwa ntakiheryo, mutthu onirika maasi veehimeni ni ekahi aakuveyaka, maasi makina anniyiiheya mukahini, vamosaru, weererya ompaka makoho mmiravo anyu munanariwe ene, pooti ohiwerya osuwela ele eri vamurimani vawe. (Musome Miruku 20:5.) Ilaria, yoole oromoliwe ottuli, onihimya so: “Okathi kaari aka mmiravo, murima aka waahipacerya okawanyeya. Kaaphavela weettela ekeekhai ni waatthara apatthani aka a mulaponi okathi omosaru. Eyo yaanikiriipiha murima, nto anamuyari aka yaahoonela. Nihiku nimosa, awo yaahikileela wira yanoona wira kaahiriipiwa murima, ni yaahikikoha exeeni yiiraneya. Nto kaahipacerya wunla, kahaatthokiherya mwaha ene, ni kaahaavekela nikhaliheryo. Yaahikikhupaarela, anakileela wira yaanisuwela ele yakiiraneela, nave yaahihimya wira yaamukikhaliherya”. Anamuyari awe Ilaria yaahipacerya omukhaliherya waaphavela apatthani ooloka mmulokoni.

15. Mutthokiherye moota Yesu oonihenrye awe okhalana miruku wa enamuna aawoonela awe atthu akina.

¹⁵ Yesu aahooniherya-tho okhalana ankhili, okhala wira aaniwerya oweha itthu awiixutti awe yaatthuneya aya okhaliheriwa ni aanisuwela itthu awo yaakhumela aya saana. Mwa ntakiheryo, okathi mulopwana mmosa oniitthaniwa Natanayeli, aiwale awe wira Yesu aakhuma oNazarethi, owo aahimmye so: “ONazarethi wokhala wokhumelela-wo etthu yorera?” (Yoh. 1:46) Moovarihana ni ekomentaario eyo, mwaarowa omoonela sai Natanayeli? Mutthu oophukela, a nthalu, wala ohinaamini? Yesu aahirumeela miruku ni aaniwerya oweha mikhalelo sooloka sa Natanayeli. Yesu aahimuhimya okhala “mwIsarayeli èkekhai: mwa yola khuvo-vo wotha”. (Yoh. 1:47) Yesu aaniwerya osuwela ele eri vamurimani va mutthu, nto aanirumeela owerya iwo wira oweheke mikhalelo sooloka sirina aya.

16. Munrowa omukhaliherya sai mwaninyu mmiravo wunnuuherya mikhalelo sooloka?

¹⁶ Nyuwo khamuniwerya osuwela eri vamurimani va mutthu, masi Muluku pooti wookhaliheryani okhalana miruku. Niireke munoorumeela miruku iyo wira mmukhaliherye mmiravo anyu? Khuuvo onisiveliwa ohimmwa okhala “namuthamaliwa”. Muhikhala-khale mmwiirelaka mwaninyu wira “onoovahani muteko” paahi, nnakhala muhuupuweleke siiso. Hata mwaninyu owananaka mukhalelo awe wira opakeke itthu sooloka, mmuleeleke wira munniweha wiimananiha wawe opaka itthu saana. Mwaweha etthu yooloka onipaka awe, mmuttottopeleke. Mmukhaliheryeke wunnuuherya mikhalelo sawe sooloka, munvahaka miritti siniphwanelela. Yesu aaniwiirela siiso awiixutti awe. Ovinre ene mwaakha mmosa nnimeya, okhuma vaavale aakumanne awe ni Natanayeli (yoowo oniitthaniwa-tho Bartolomeyo), Yesu aahimuthanla okhala murummwa awe, nto Natanayeli aahivara muteko wa Muluku mwa nthiti. (Luk. 6:13, 14; Mit. 1:13, 14) Omuttottopela ni omulipiha mwaninyu, onoomukhaliherya wiixoona okhala mutthu a faita, oniphwanelela orumeeliwa ni Yehova, ohiya ntoko mutthu ohiniwerya etthu.

OWIIXUTTIHA ANIINYU ONIMOOHAKALALIHANI VANCEENE

17, 18. Exeeni ekhanle ookhumelela mwaha wa ovikaniha wiimananiha omukhaliherya mwaninyu mmiravo omurumeela Yehova?

¹⁷ Vaavo munaahuwa anyu anamwane, okathi mukina pooti woonaka ntoko murummwa Paulo, yoowo aari tiithi mmukhalelo womunepani. Owo ‘anijikula valupale ni winiwa murima’, mwaha wa ‘waphenta vanjenexa’ ale yaari anaawe oomunepani yaakhala oKorinto. (2 aKor. 2:4; 1 aKor. 4:15) Victor, yoowo aahuwale amiravo anli ni mwali mmosa, onihimya so: “Okathi wa omiravo, khiwaakhweyale. Masi itthu soohakalaliha saahivikana mixankiho naarina ahu. Yehova aahinikhaliherya okhalana opatthani woolipa ni aniihu”.

¹⁸ Nvikaniheke ovara muteko moohoolowela, wira mwaakhaliherye aniinyu omurumeela Yehova. Vaavo muniwooniherya anyu ophenta wanyu wuulupale, munoohakalala waaweha avarexexaka ekeekhai ni avikanihaka ‘wettela ekekhai’.​—3 Yoh. 4.

[Enoota]