Moota Xeeni Ninrowa Ahu Wooniherya Osuwela Owehererya?

‘Miyo kinowehereryaka!’​—MIK. 7:7.

MWAAROWA WAAKHULA SAI?

Exeeni eniixutta ahu wa ntakiheryo na Mikeya?

Sowiiraneya xeeni sinilipelela ahu waakhwanela?

Moota xeeni okhanle ahu owooniherya oxukhuru opixa murima wa Yehova?

1. Waaniheryasa exeeni enrowa oniiriha omoonaka Yehova opisa?

OKHUMA okathi yoole eGuvernu ya oMesiya etikitheriwe aya, eyaakha ya 1914, olamulelo wa Satana onikhala mahiku ookiserya. Mwa ekhotto yaakhumelenle wiirimu, Yesu aahinwerya Satana ni malaikha awe ootakhala, aarihela valaponi. (Mmusome Wisupulula 12:7-9.) Satana oosuwela wira orina “okathi vakhani pahi”. (Wis. 12:12) Okhuma vaavale opacenrye awe okathi owo soovira iyaakha miloko sinceene, nto akina anoona wira wanikisa onnipisa ophiya. Vaavo vaninwehererya ahu Yehova omaliha olumwenku ola niireke nimmoona opisa?

2. Etthu xeeni enrowa ahu othokorerya muru ola?

² Ohipixa murima etthu yowoopiha okhala wira pooti oniiriha okhummwa murima. Nto ninrowa wooniherya sai okhala oosuwela owehererya? Muru ola onoonikhaliherya ophwanya waakhuliwa wa makoho ala anittharelana. (1) Ninrowa wiixutta exeeni mwa ntakiheryo na profeta Mikeya na opixa murima? (2) Sowiiraneya xeeni sinrowa wooniherya omala wa okathi wa olipelela? (3) Ninrowa wooniherya sai oxukhurela wahu opixa murima wa Yehova?

NINROWA WIIXUTTA EXEENI WA NTAKIHERYO NA MIKEYA?

3. Okathi wa Mikeya, mikhalelo xeeni saakhanle wIsarayeli?

³ Mmusome Mikeya 7:2-6. Mikeya profeta a Yehova ahoona mikhalelo saawiiriha aIsarayeli otteettheya moomunepani mpakha okhala ootepa ohiroromeleya okathi yaalamuleliwa aya ni mwene Akhazi. Mikeya aahilikanyiha ohiroromeleya iwe wa aIsarayeeli ntoko ‘miwa’ ni ‘oyele’. Ntoko siisaale mwiiwa ni oyele onimphwanyiha awe owereya ole onivira vakhiviru, aIsarayeli ale oohixariya yanaphwanyiha owereya atthu yaakhalana aya. Ohixariya waahitepa wunnuwa mpakha ohonona wiiwanana wa imusi. Okhala wira aanisuwela wira khaawerya omala-maliha makhalelo ale, Mikeya ahinvekela Yehova ni murima wotheene. Nto Mikeya aaninwehererya Muluku moopixa murima wira opake etthu. Mikeya aaniroromela wira Yehova aarowa opaka etthu waphiya okathi aya.

4. Mixankiho xeeni siniwanana ahu khuta okathi?

⁴ Ntoko Mikeya, hiyo ninkhala eriyari ya atthu oowiitthuna. Anceene a yaawo ari atthu ‘òhixukhuru, òhittittimiha itthu sowarya, òhiphenta’. (2 Tim. 3:2, 3) Ti vooxankiha akhala wira ale anivarana ahu muteko, aneettana ahu oxikola ni anamwaattamanani ahu annooniherya mukhalelo wa nrima. Masi arummwa akina a Muluku annikhalana-tho muxankiho muulupale. Yesu aahihimya wira atthareli awe yaarowa ovirikanyiwaka ni amusi aya, ni aahirumeela masu oolikana ni ale alempwale ni Mikeya 7:6, wira ohimye ele mihupi sawe saarowa aya okumiherya. Yesu aahimmye so: ‘Kirwenlé onvirikanyiha mwana mwamulopwana ni tithi awe, nave mwana mwamuthiyana n’ame awe, muthiyana òtheliwa ni pwiyamwan’awe. Awanani awe mutthu t’ale a ntthoko nawe’. (Math. 10:35, 36) Tthiri muxankiho muulupale, ohooniwaka saana ni amusi ahu ari oohaamini! Akhala wira ninnilupatthiwa ni amusi, niheemye muxankiho owo onixinttaka. Ohiya-vo, nihaana wuupuwelelaka moota Yehova oryaawe oororomeleya ni oopixa murima vaavo vaniphavela awe ophuka mwaha. Akhala wira khuta okathi nnovekelaka nikhaliheryo nawe, onoonivaha owerya ni ankhili anrowa onikhaliherya ovilela.

5, 6. Yehova aamutthuvenle sai Mikeya, masi itthu xeeni sahoonale awe wiiraneya waya?

⁵ Yehova aahimutthuvela Mikeya mwaha woopixa wawe murima. Mikeya aahoona omala-mala wa olamulelo wootakhala wa Mwene Akhazi. Owo aahimoona Ezekiya, Mwene ooloka yoowo aari mwaana mwamulopwana a Akhazi, okelaka emwene nto khureeriha okokhorela wekeekhai. Nto moolumo a Yehova oophukela oSamariya, yaawo yaalavuliwe ni Mikeya yahaakhwanela vaavo Asiriya yanyaanyale aya muttetthe wa onikela epheyo wa omwene wa Isarayeli.​—Mik. 1:6.

⁶ Masi, Mikeya khoonale wiiraneya wa iprofesia sotheene saarummwale awe ohimya ni Yehova. Mwa ntakiheryo Mikeya aahilepa wira: ‘Yaphiyá mahiku aya, mwako watekiwe-vo empa ya Muluku onrowa winnuwihiwa ovikana miyako sorekamexa, onrowa ottukhuwa ovikana miyako sothene anotthimakela-wo, . . . maloko òhalikeleya. Awo anohima wira: Rwani, niwelé mwako wa Yehova’. (Mik. 4:1, 2) Mikeya aahikhwa ohalaka okathi munceene wira yaakhwanele eprofesia ele. Hata vari siiso, Mikeya aahilakela okhala oororomeleya wa Yehova mpakha okhwa wawe, nto khiivo etthu yaakumiheriwa ni atthu akina yaamuhiihale wiiwelela wawe. Nto Mikeya aahilepa wira: ‘Atthu a ilapo sikina annimwettela khula elapo muluku aya, vano hiyo ninrowa omwettela Yehova Muluku ahu mpakha mahiku othene’. (Mik. 4:5) Mikeya aahaana owehererya moopixa murima okathi ole waasaren’ye otakhala, mwaha woowi Yehova taarowa ophuka ni waamaleliherya anatiri awe otheene. Tthiri profeta ole aanimuroromela vanceene Yehova.

7, 8. (a) Exeeni enniiriha ororomelaka iprofesia? (b) Exeeni enrowa wiiriha okathi waakuva ovira?

⁷ Niireke ni hiyo ninnimuroromela Yehova? Tthiri nookhalana mathowa ooloka wira nimuroromeleke. Olelo-va ninnoona wiiraneya wa iprofesia sa Mikeya. Yaphiya ‘mahiku aya’, maloko otheene ni mahimo ni atthu a malavulelo otheene, anootthimakela ‘mwako wa empa ya Yehova’. Nnaamwi anamunceene animukokhorela Yehova, akhumaka maloko yaale olelo-va aniwana-wana, awo ‘arukunuxa mavak’aya ehana iheko’ nto ‘khanrowa-tho wixuttihiwa owana ekhotto’. (Mik. 4:3) Tthiri eparakha yuulupale okhala eriyari ya atthu a Yehova yaawo ari a murettele!

⁸ Ekeekhai wira ninniphavela wira Yehova omala-malihe moohipisa makhalelo ala ootakhala. Wira niwerye owehererya moopixa murima, nihaana woonaka itthu moovarihana ni moonelo wa Yehova. Owo oothanla nihiku ninrowa awe waaphukela apinaatamu orweela mwa ole ‘omukupanli awe’, Yesu Kristu. (Mit. 17:31) Masi nihinatthi ophiya nihiku nlo, Muluku ookumiherya eparakha wa atthu a maloko otheene wira ‘esuwele ekekhai’, ni opaka ele esuwenle aya wira yoopowe. Ehaavo etthu yowoopiha ekhanle owaakhumelela atthu ahinrowa olopoliwa. (Mmusome 1 Timótheyo 2:3, 4.) Akhala wira ninnikhalela nthiti waalopola akina wira asuwele ekeekhai voohimya sa Muluku, nto okathi ohanle wira niphiye nihiku na ophukela wa Yehova khinnirowa woonaka opisa ophiya. Aayo, okathi owo onrowa ophiya mootutuxerya. Okathi onrowa aya wiiraneya eyo, hiyo ninrowa okhala oohakalala mwaha woowi ninrowa ophwanyiwa nikhalelaka nthiti muteko ola woolaleya Omwene!

SOWIIRANEYA XEENI SINROWA WOONIHERYA OMALA WA OKATHI WOOLIPELELA?

9-11. Niireke 1 aTesalonika 5:3 ootoko waakhwanela? Mutthokiherye.

⁹ Mmusome 1 aTesalonika 5:1-3. Muhoolo moohipisa, maloko anrowa ohimyaka wira: “Nokhalana murettele n’ikumi!”. Wira niheemye owokiwa ni masu owo, ‘nihirupé ntoko atthu akina; nto nilipeleleke nìsumaliheke’. (1 aTes. 5:6) Wira nivikanihe okhala oowehaweha, nrowe mowaakuveya nithokorerye itthu sinrowa wiiraneya ohinatthi ophiya okathi onirowa aya ohimmwa masu awo mwa enamuna yoottittimiheriwa.

¹⁰ Wuumalani wa ekhotto yoopacerya ni ya nenli ya olumwenku, maloko yaahilaleya murettele. Nuumala ekhotto yoopacerya ya olumwenku waahipakiwa mutthenkeso wa Liga das Nações, atthu alipelelaka wira mutthenkeso ole waamuruuha murettele. Muhoolo mwaya, nuumala ekhotto na nenli ya olumwenku, Nações Unidas aahikhumelela khukhala etthu yooniwa wira yamuruuha murettele mulaponi. Alipa oolamulela a elapo ni a itiini aniwehererya wira mitthenkeso iyo sinookumiherya makhalelo a murettele wa apinaatamu. Mwa ntakiheryo mwaakha wa 1986 waahilaleiwa ni Naçoes Unidas okhala mwaakha wa murettele wa ilapo sotheene. Mwaakha ole, amahoolela a ilapo ni itiini sinceene yaahithukumana ni muhooleli a eKerexa Katoolika wAssisi, wItaliya wira avekelele murettele.

¹¹ Hata vari siiso olaleiwa wa murettele ni omaaleleya wala etthu ekina yoolikana ni eyo khiyaakhwanihenrye eprofesia ele eniphwanyaneya va 1 aTesalonika 5:3. Xeeni yahaakhwanenle aya? Mwaha woowi waahilavuliwa vahinatthi sa ‘ohononiwa motutuxerya’; nto eyo khenatthi wiiraneya.

12. Exeeni enisuwela ahu voohimya sa olaleiwa wa murettele ni omaaleleya?

¹² Tani muhoolo anirowa olaleya ‘murettele ni omaleleya’ onihimmwa? Etthu xeeni ahooleli a eKristau yoowoka ni a itiini sikina enrowa aya opaka? Moota xeeni anamahoolela a iguvernu soovirikana aniheliwa aya muhina wa olaleiwa iwo wa murettele? Soolempwa khasinnileela etthu ene. Etthu enisuwela ahu tiila, voohicikha etthu sa moota sinrowa aya olaleiwa wala ottittimiheriwa, sotheene sinrowa okhala ethiru. Mukhalelo ola wa khalai onrowa wiiraka olamuleliwaka ni Satana. Olumwenku ola woohononeya khonilokihereya. Tthiri vanrowa okhala vooriipiha murima akhala wira mmosa a hiyo onookupali wootha wa Satana ni ohonona ororomeleya wahu!

13. Xeeni malaikha oowerya avarenle aya ipheyo sa opwetexa?

¹³ Mmusome Wisupulula 7:1-4. Vaavo ninlipelela ahu waakhwanela woomalela wa 1 aTesalonika 5:3, malaikha oowerya aavarela ipheyo sa opwetexa wa maxakha maalupale. Nto exeeni enilipelela aya? Awo anilipelela yowiiraneya emosa yuulupale ehimmwale ni murummwa Yohani, eyo piiyo, othanliwa wa ‘arumeyi a Muluku’a ookiserya. Nto amalakaru othanliwa arumeyi a Muluku, malaikha anrowa otaphula ipheyo sa opwetexa. Nto nuumala-vo, exeeni enrowa wiiraneya?

14. Exeeni enooniherya wira omora wa Babilonia Muulupale ori vakhiviru?

¹⁴ Babilonia Muulupale, olamulelo wa itiini soowoka onrowa opwetexiwa. ‘Maloko awo n’ilapo ni mahimo ni malavulelo’ khanrowa owerya omukhaliherya. Nto va ninnoona ithoonyeryo sa omala-mala wa Babilonia. (Wis. 16:12; 17:15-18; 18:7, 8, 21) Tthiri ohikhaliheriwa wawe onnooneya vaavo ixornali radio ni televisau vanilaleya aya ihapari sowuuliha muru sa itiini ni ahooleli aya. Hata vari siiso, ahooleli a Babilonia Muulupale anoona wira khiivo etthu yootakhala enrowa owiiraneela. Masi moonelo owo ti woohiloka! Nuumala olaleiwa wa ‘murettele ni omaaleleya’ ale aniirela mpantta epoliitika ya mukhalelo ola wa Satana, mootutuxerya anoorukunuwela etiini yoowoka ni omala-maliha. Nto Babilonia Muulupale khonrowa otthikela wooneya! Tthiri ti vooreerela owehererya moopixa murima sowiiraneya iyo suulupale.—Wis. 18:8, 10.

NINROWA WOONIHERYA SAI OXUKHURELA OPIXA MURIMA WA MULUKU?

15. Xeeni Yehova ohipwetexaka olumwenku ola mookhumwa murima?

¹⁵ Nnaamwi nsina na Yehova niveehiwaka ni atthu anceene, owo moopixa murima onniwehererya okathi wooreerela. Yehova khontthuna wira opweteye nnakhala mutthu mmosa. (2 Ped. 3:9, 10) Nto moonelo ahu okhaleke sai? Yehova ohinatthi oruuha nihiku nawe, nooniheryeke oxukhurela wahu mwaha wa opixa murima orina awe mwa inamuna iya sinittharelana.

16, 17. (a) Xeeni vanitthuneya ahu waakhaliherya ale ahiiye omurumeela Yehova? (b) Ale amuhiiye Yehova xeeni varya aya vootepexa otthuneya otthikela wa Yehova?

¹⁶ Mwaakhaliherye ale ahiiye olaleerya. Yesu aahihimya wira malaikha a wiirimu annihakalala vaavo vaniphwanyiwa aya epwittipwitthi yaarimenle. (Math. 18:14; Luka 15:3-7) Eyo enooniherya wira Yehova onniwuupuwela atthu yaale atonko wooniherya osiveliwa nsina nawe, nnaamwi ahimurumeelaka ni nthiti mahiku ala. Okathi nnaakhaliherya ahu akina otthikela mmulokoni, ninnikhaliherya muteko wa Yehova, nto malaikha annitthapa.

¹⁷ Nireke ti nyuwo mmosa a yaale ahiiye omurumeela Yehova? Niireke orookhala mutthu mmulokoni oovehaleni nto mwaha waivaavo khuhiya wataana ni muloko wa Yehova? Akhala wira woovira okathi munceene mwiikoheke so: ‘Kiireke ekumi aka mahiku ala ti yooloka wala ohakalala ovikana khalai? Kiireke ti Yehova okiveehale wala ti pinaatamu mukhwaaka oohimalela? Kiireke ehaavo etthu Yehova epanke awe ekiphwanyin’he maxakha? Tthiri Yehova onipaka sotheene sooreera. Hata okathi yoole nihinkhala ahu moovarihana ni wiivahererya opanke ahu, Yehova onnineemererya hiyo ottottela mureerelo sotheene sooloka sinnivaha awe. (Yak. 1:16, 17) Nihiku na Yehova nihanle ophiya. Ola okathi woomutthikela Tiithi ahu a wiirimu ni wootthikela mmulokoni. Tthiri ola opuro mmosa paahi onrowa ahu ophwanya ovareleleya mmahiku ala ookiserya.​—Otum. 33:27; aHéb. 10:24, 25.

18. Xeeni vanitthuneya ahu owiiwelelaka ale aneettiha muloko?

¹⁸ Nwiiweleleke ale aneettiha muloko. Ntoko mukukhuli oophenta, Yehova onninikhapelela. Owo oomuthanla Mwanawe wira okhale Mukukhuli Muulupale a nikoto nawe. (1 Ped. 5:4) Miloko sinivikana 100.000 aakhala axitokweene anikhapelela khula epwittipwitthi. (Mit. 20:28) Vaavo vaniwiiwelela ahu moororomeleya ale athanliwe ni Yehova ni Yesu wira ahooleleke mmulokoni, ninnooniherya oxukhurela wahu wa ele epanke aya mmureerelo ahu.

19. Ninrowa wiiraanela sai ekhotto?

¹⁹ Mwiraaneke mukina ni mukhwa awe. Masu ala anitaphulela exeeni? Vaavo anakhotto owiinihiwa nikuruta oratteene vanitupheliwa aya ni munyokhani, awosa annaakuvela othukumana wira yaattamane mukina ni mukhwa awe. Nto eyo ennimwiiriha munyokhani woonaka ovila waaxintta anakhotto ale. Satana onnimananiha wira aatuphele atthu a Muluku. Tivonto ola okathi wowiiraanela ekhotto. Ola okathi wowaataana mukina ni mukhwa awe, ni ohiwehexexa soovonya sa akina, ni wooniherya omuroromela Yehova.

20. Vano etthu xeeni enitthuneya ahu opaka?

²⁰ Otheene ahu nuupuweleke mukhalelo ahu womunepani, ni osuwela owehererya. Nto nihaana olipelela okhuweliwa wa ‘murettele ni omaleleya’! ni omaliheriwa wa alipa oothanliwa mahiku ala ookiserya. Moottharelana, malaikha anrowa otaphula ipheyo xexe, ni omunyaanya Babilonia muulupale. Nto vaavo ninlipelela ahu waakhwanela sowiiraneya iyo, nihaana weemereryaka malakiheryo anivahiwa ahu ni nikhuuru na Yehova. Nto nrowe nikhale oowiiraana nimukhoottelaka Satana ni malaikha awe ootakhala! Vano ola ori okathi onitthuneya ahu wiiwelela yootumererya ya naSalimo aalavunle ariki: ‘Nyuwo othene munimuroromela [Yehova], mwikhomalihe, mulipihe murima’.​—Esal. 31:25.

[Enoota]

[Elatarato epaaxina 10]

[Elatarato epaaxina 12]

Atthu a Yehova annaakhaliherya ale ahiiye omurumeela Yehova wira amutthikele (Nwehe ittima 16, 17)

[Elatarato epaaxina 14]

Ola okathi wowiiraana wira niwanane Satana ni malaikha awe ootakhala (Nwehe ettima 19)