Mwaatakiheke Maprofeta—Mikeya
1. Nikoho xeeni woonasa wene Mikeya aapanke awe, nto ninsuwela sai wira olaleerya wawe khahiyo waari weethiru?
1 ‘Onirowa omala silini olumwenku ola wootakhala?’ Woonasa wene Profeta Mikeya aaniikoha siiso, vaavo aalaleya awe ihapari soophukela sa Yehova omwene wa Isarayeli ni oYuda. Masi, olaleerya wawe khahiyo waari weethiru. Mwaakha wa 740 AEC, Mikeya ohinatthi okhwa, masu a Yehova sa opwetexiwa wa Samariya yahiireya. (Mik. 1:6, 7) Muhoolo, mwaakha wa 607 AEC, nave Yerusalemu aahipwetexiwa. (Mik. 3:12) Nto, nimutakiheke sai Mikeya nilipelelaka opwetexiwa wa olumwenku ola wootakhala?
2. Xeeni vanitthuneya ahu opixaka murima nilipelelaka nihiku na Yehova?
2 Mpixeke Murima: Mikeya aalempe so: “Vano miyo kinnawehererya Apwiya [Yehova]: kinnimuroromela Muluku, Mòpoli aka”. (Mik. 7:7) Mikeya khaahiyale ovara muteko olipelelaka ophiya wanikisa wa okathi ole. Masi aahivikaniha oluttuweliwa ntoko profeta a Yehova. Moolikanasa, nilipelelaka nihiku na Yehova, nikhalaneke mweettelo ‘wowarya ni womwiwelela Muluku’. (2 Ped. 3:11, 12) Opixa murima wa Yehova onnaavaha okathi atthu wira attharuwe. (2 Ped. 3:9) Nto, niiweleleke miruku sa Biibiliya nitakihaka opixa murima wa maprofeta.—Yak. 5:10.
3. Xeeni vanitthuneya ahu onvekelaka Yehova munepa wootteela?
3 Muroromeleke Ikuru sa Yehova: Muteko wa Mikeya waari woovila. Tivonto, owo aanivekela okhaliheriwa ni Yehova. (Mik. 3:8) Ti maana aya Biibiliya onnitumererya awe onvekela Yehova wira onivahe ikuru. Mooreera murima, owo onnaavaha ikuru ale akhulumunwe wira avare saana miteko sawe. (Esal. 84:6, 8; Yes. 40:28-31) Niireke munnuupuwela okathi mwaakhaliheriwe anyu ni Muluku? Nto muhiliyaleke onvekela Yehova wira oovaheeni munepa awe wootteela.—Luka 11:13.
4. Exeeni eniixutta ahu sa ntakiheryo na Mikeya?
4 Mikeya aanipaceriha yootthuna ya Yehova mookumini mwawe. Nave, owo aahivikaniha ororomeleya hata aari naatthu a mweettelo woohiloka. Moolikanasa, nihaana ororomeleyaka khuta nihiku. Ntoko Mikeya, nivikaniheke ‘omwettela Yehova Muluku ahu mpakha mahiku othene’.—Mik. 4:5.