WAAKHULIWA WA MAKOHO A MBIIBILIYANI

Exeeni Yesu onrowa awe opaka muhoolo?

Mwaakha wa 33 EC, Yesu aahikhwa, khuhihimuwa, ni khuwela wiirimu. Muhoolo mwaya, Yesu aahivahiwa okhulupale wira olamuleleke ntoko Mwene. (Daniyeli 7:13, 14) Moohipisa, Yesu onoorumeela okhulupale awe wira oruuhe murettele valaponi ni omalihe ohaawa.​—Musome Esalimo 72:7, 8, 13.

Okathi Yesu onrowa awe waalamulelaka apinaatamu, onoopaka itthu soohakalaliha. Owo onoorumeela owerya ovahiwa awe ni Tiithi awe wira aattikiherye atthu okumi woomalela. Awo anirowa okhalana okumi valaponi ahuuluvalaka wala okhwa.​—Mmusome Yohani 5:26-29; 1 aKorinto 15:25, 26.

Exeeni Yesu onipaka awe vano?

Vano Yesu onnihoolela muteko woolaleerya olumwenku wotheene onipakiwa ni atthareli awe eekeekhai. Awo annaaxukurya atthu awooniheryaka ele Biibiliya onihimya awe sa Omwene wa Muluku. Yesu aahihimya wira aamukhaliherya muteko wa awiixutti awe mpakha Omwene wa Muluku omaliha olamulelo wa apinaatamu.​—Mmusome Matheyo 24:14; 28:19, 20.

Orweela wa muloko wa eKristau, Yesu onnaakhaliherya atthu ophwanya ephiro ya okumi wooloka. Nave, Yesu onimwaakhaliherya okathi olumwenku ola onrowa aya opwetexiwa, ni waavaha elapo esya eleiheriwe ni Muluku.​—Mmusome 2 Pedru 3:7, 13; Wisupulula 7:17.

Wira musuwele soohimmwa sikina, muwehe muru 8 wa eliivuru ela, yoolaleiwa ni Anamoona a Yehova

Mubaxari va http://www.jw.org/vmw