WAAKHULIWA WA MAKOHO A MBIIBILIYANI

Niireke itiini sotheene sinnimuttittimiha Muluku?

Akhala wira munowiriyana ihapari sa molumwenkuni, woonasa wene nyuwo munimoona wira itthu sootakhala ikwaha sikina sinnipakiwa mwa nsina na etiini. Khahiyo wira itiini sotheene sipattuxiwe ni Muluku eekeekhai. (Matheyo 7:15) Tthiri, apinaatamu anceene annootothiwa.​—Mmusome 1 Yohani 5:19.

Masi, Muluku onnaaweha atthu a murima saana yaawo aniphenta itthu sooloka ni sekeekhai. (Yohani 4:23) Muluku onnaalattula atthu awo wira yiixutte ekeekhai ya Nuulumo nawe, ori Biibiliya.​—Mmusome 1 Timótheyo 2:3-5.

Nyuwo munrowa osuwela sai etiini yekeekhai?

Yehova Muluku onnaathukumanya atthu a itiini soovirikana orweela wa owiixuttiha ekeekhai ni ophentana mukina ni mukhwaawe. (Mikeya 4:2, 3) Tthiri, nyuwo munoowerya waasuwela ale aneettela etiini ya ekeekhai, nwehaka moota sinithokoreryana aya mukina ni mukhwaawe.​—Mmusome Yohani 13:35.

Arumeyi eekeekhai annooniherya waamini waya akhalaka moovarihana ni Biibiliya. (2 Timótheyo 3:16) Nave-tho awo annivuwiha nsina na Muluku. (Esalimo 83:18, NM) Ohiya-vo, awo annilaleya Omwene wa Muluku ntoko nlipelelo nimosaru paahi na apinaatamu. (Daniyeli 2:44) Awo annimutakiha Yesu ‘yaamwalelaka atthu’, vaavo anipaka aya itthu sooloka. (Matheyo 5:16) Nto, maKristau eekeekhai, anoowerya osuweliwa ni muteko aya woowaxukurya atthu mmawannyeya aphavelaka waaleela ihapari sooreera sa Omwene wa Muluku.​—Mmusome Matheyo 24:14; Miteko 5:42; 20:20.

Wira musuwele soohimmwa sikina, moone muru 15 wa eliivuru ela, yoolaleiwa ni Anamoona a Yehova

Mubaxari va www.jw.org/vmw

[Eponto yuulupale epaaxina 16]

Yehova Muluku onnaathukumanya atthu a maloko otheene orweela wa okokhorela wekeekhai.​—Esalimo 133:1