MWAHA WOOPACERYA | NIIREKE SATANA OHAAVO?

Niireke Satana Ohaavo?

ROGERIO a El Salvador onihimya so: “Kiryeene mmiravo, okathi kahaawiiwelelaka amaama, awo yaahimya so: ‘Diabo onnoorwa wira ookuxeeni!’ Nto miyo kaakhula so: ‘Mmuhiyeke orweeke!’ Miyo kaamukupali Muluku paahi, masi Satana nnaari”.

Niireke nyuwo munuupuwela ntoko Rogerio? Wa iponto iya sinittharelana, tiivi enoona anyu okhala yoreerela?

• Satana khokhanle; owo ti ethoonyeryo ya itthu sootakhala paahi.

• Satana ookhala, masi owo khoniwiiriha atthu opaka sootakhala.

• Satana ti nlaikha noowerya nenlo ninwiiriha atthu opaka itthu sootakhala.

Iponto iya tthaaru sinnikupaliwa ni atthu anceene. Masi, niireke ti vootthuneya osuwela ekeekhai? Akhala wira Satana khokhanle, nto ale anikupali wira owo ookhala ahootothiwa. Nto akhala wira ookhala masi khoniwiiriha atthu opaka sootakhala, weeso anamunceene anoova ethiru. Masi, akhala wira Diabo ti mulavilavi oowootha, nto owo tootepa woopiha ovikana ele atthu anceene anuupuwela aya.

Nto Satana ti pani wala exeeni? Niireke owo ti ethoonyeryo ya itthu sootakhala wala nlaikha? Akhala wira ohaavo, niireke muhaana omoovaka? Nto munrowa wiikhapelela sai? Nrowe noone moota Biibiliya onaakhula awe makoho ala.