MWAHA WOOPACERYA | NIIREKE SATANA OHAAVO?

Niireke Satana ti Ethoonyeryo ya Itthu Sootakhala?

Ti vookhweya ohimya wira Satana ti ethoonyeryo ya itthu sootakhala. Masi niireke ti yeeyo Biibiliya oniixuttiha awe tthiri? Akhala wira ti siiso, xeeni Biibiliya onihimya awe wira Satana aahilavula ni Yesu Kristu vamosa ni Muluku Oowerya Sotheene? Nrowe niwehe matakiheryo manli.

OKATHI SATANA AALAVULA AWE NI YESU

Nuumala Yesu opacerya muteko awe woolaleerya, Satana aahimweehererya ikwaha tthaaru. Ekwaha yoopacerya, Satana aahimweehererya Yesu wira omalihe etala yaarina Awe, orumeelaka moohiloka owerya aavahiwe awe ni Muluku. Ekwaha ya nenli, Satana aahimweehererya Yesu wira otuphele vathi va etemplo ophavelaka wiivuwiha. Wanikisa, Satana aahimuleiherya onvaha Yesu omwene wotheene wa mulaponi akhala wira ammukokhorela vakhaani paahi. Yesu aahikhootta soweeha iyo orumeelaka Nuulumo na Muluku.​—Matheyo 4:1-11; Luka 4:1-13.

Nto Yesu aalavula naani? Niireke aalavula ni etthu yootakhala vamurimani vawe? Moovarihana ni Soolepa, Yesu “ahehereriwa ntoko hiyo mwa sothene, nto khatthenke”. (aHéberi 4:15) Biibiliya onihimya-tho so: “[Yesu] khatonko wira etampi, khutonko ophwanyiwa wotha mwano mwawe”. (1 Pedru 2:22) Owo aahivikaniha okhala oororomeleya. Khaatonko ohiya etthu yootakhala yinnuwaka vamurimani vawe. Tthiri, Yesu khaalavula ni epantte ekina yootakhala yaari vamurimani vawe, masi aalavula ni mutthu eekeekhai.

Nto ovaanela iwe onnooniherya ethoonyeryo ekina yoowi Satana ookhala.

• Muupuweleke wira Satana aahimuleiherya Yesu onvaha omwene wotheene wa mulaponi akhala wira ammukokhorela vakhaani paahi. (Matheyo 4:8, 9) Yoovaha eyo khiyaarowa okhala yooweeha vaakhanle wira Satana khokhanle. Ohiya-vo, Yesu khaakhoottale wira mamwene ale ta Satana.

• Nuumala Yesu okhootta soweeha iye, Satana “ahimuhiya, khurowa mpakha okathi wophwanelela”. (Luka 4:13) Niireke ntakiheryo nla nnooniherya wira Satana ti ethoonyeryo ya itthu sootakhala, wala nwanani oothipelela ni ootakhala?

• Moone wira “malaikha a Muluku yahirwa, enamurumela Yesu”. (Matheyo 4:11) Niireke malaikha ale yaari soopattuxiwa somunepani saamukhaliherya ni omulipiha Yesu? Aayo! Nto hiyo pooti ohimya wira Satana aari mutthu omunepani wala nlaikha ohiya, etthu ekina.

OKATHI SATANA AALAVULA AWE NI MULUKU

Ntakiheryo na nenli ninlavula sa naxariya Yobi. Mwaha owo onnooniherya ovaanela waakhumelenle ikwaha piili eriyari ya Diabo ni Muluku. Muluku aahimuttottopela Yobi mwaha wa ororomeleya wawe. Masi Satana aahihimya wira Yobi aamurumeela Muluku ophavelaka waakhela etthu paahi, maana Muluku aanimureeliha mwaha wa ororomeleya wawe. Diabo aahihimya wira aanimusuwela saana Yobi onvikana Muluku. Nto Yehova aahimuhiya Satana wira omwaakhe Yobi mihakhu sawe, anaawe, ni ohaaxa erutthu awe.a Muhoolo, vahooneya wira ele Yehova aalavunle awe sa Yobi yaari ekeekhai, nto Satana aamootha. Muluku aahimutthuvela Yobi mwaha wa ororomeleya wawe.​—Yobi 1:6-12; 2:1-7.

Niireke vaavo Muluku aavaanela awe ni Satana, aalavula ni etthu yootakhala vamurimani Vawe? Biibiliya onaakhula so: “Muluku ephiro awe ti yomalela”. (2 Samuweli 22:31, Biblya Exirima) Nuulumo na Muluku ninnihimya-tho wira: “Òwarya, òwarya, òwarya, Pwiya Muluku òwerya sothene”. (Wisupulula 4:8) Nuulumo noowi ‘waarya’ nintaphulela otteela, oloka, ni ohikhalana etampi. Yehova tooloka ni oomalela. Nto khorina epantte yootakhala.

Masi, atthu akina anikupali wira Yobi khahiyo aari mutthu eekeekhai, nto ovaanela iwe etthu yowuupuweleliwa paahi. Niireke eyo ekeekhai? Biibiliya onnooniherya wira Yobi aari mutthu eekeekhai. Mwa ntakiheryo, Yakobo 5:7-11, onnimuromola Yobi ntoko ntakiheryo ninwiiriha maKristau ovilela okathi wa mixankiho, ni owuupuxerya wira Yehova onimwaatthuvela mwaha woovilela. Ntakiheryo nla khinaarowa okhalana efaita vaakhanle wira Yobi khonakhale, ni wira soweeha saari itthu soopakeleliwa paahi. Ohiya-vo, Eliivuru ya Ezekiyeli 14:14, 20, ennimuromola Yobi, Nowe, ni Daniyeli ntoko anaxariya araru. Ntoko Nowe ni Daniyeli, Yobi aari mutthu eekeekhai ni oowaamini. Akhala wira Yobi aari mutthu eekeekhai, nto ole aamulupattha aahaana okhala eekeekhai.

Biibiliya onnimuhimya Satana okhala yoopattuxiwa yomunepani wala nlaikha. Waaniheryasa nyuwo munoowerya wiikoha so: ‘Niireke owo pooti ohaaxa ekumi aka ni ya emusi aka olelo-va?’

NIHIMYE EXEENI SA MAHIKU AHU ALA?

Nilikanyihe wira egrupu emosa ya atthu ootakhala mootutuxerya aatuphela muttetthe anyu. Moohaaniherya, muttetthe owo waarowa okhala wooxankiheya ni wowoopiha. Vano muupuwelele ela: Satana ni soopattuxiwa sikina somunepani seiyo siri ntoko yena, saahimmwareela Muluku ni khuriheliwa valaponi. Tiivi eri yookhumelela aya? Muupuweleleke ihapari sinoona anyu wala wiiwa mutelevisau wala raadio.

• Niireke munnoona wira itthu sootakhala sinimuncerereya, nnaamwi atthu yiimananihaka omaliha?

• Niireke munnoona wuncerereya wa matthekulelo ni isipo sinooniherya maxitta nnaamwi anamuyari anceene aahisiveliwaka?

• Niireke munnoona wira elapo enootepa ohononiwa nnaamwi atthu yiimananihaka wira amalihe muxankiho owo?

• Niireke ohaavo mutthu ootakhala yoowo onaahaaxa apinaatamu, ni onaaphwanyiha maxakha?

Biibiliya onnimuhimya ole oniiriha okhumelela itthu iyo oriki: ‘Yaahiriheliwa ota enow’eyo yulupalexa t’inowa yele ya khalai, enìhaniwa Nwanani walá Satana, yeyo eniwototha atthu othene. Eyo yahiriheliwa elapo ya vathí: malaikh’aya yahiriheliwa-tho mulaponi vamosá ni yeyo. Nto nyuwo, elapo n’iphareya, motakhaliwa, mana Satana òkhuruwela wa nyuwo ananariwene vanjene okhala wira òsuwela wira orina okathi vakhani pahi’. (Wisupulula 12:9, 12) Nuumala othokorerya ele Biibiliya onihimya awe, anamunceene aaweha wira Satana ti nlaikha nowoopiha, yoowo oneettiha olumwenku.

Waaniheryasa munniikoha moota woophwanya nikhaliheryo. Muupuwelo owo ti wookhalela. Nto mwaha onittharelana onoovaha malakiheryo oovareleya muteko.

[Enoota]