ALE ANISOMA ILIIVURU SAHU ANNIKOHA . . . 

Niireke Paasikha onitthapela ohihimuwa wa Yesu?

Paasikha onniromoliwa ni eliivuru Encyclopædia Britannica ntoko “niira na eKristau nenlo nintthapela Ohihimuwa wa Yesu Kristu”. Nto niireke niira nla ti na eKristau?

Wira nisuwele akhala wira etthu epakiwe ti yekeekhai, nihaana ovaha ephoole makhalelo aya. Moolikanasa, wira nisuwele akhala wira Paasikha onitthapela ohihimuwa wa Yesu, nihaana ovaha ephoole makhalelo awe.

Wanipacerya, Yesu aahaaruma awiixutti awe wira yuupuweleleke okhwa wawe, ohiya ohihimuwa wawe. Murummwa Paulo aahiitthana niira nlo okhala ‘Yolya ya Ohiyu y’Apwiya’.​—1 aKorinto 11:20; Luka 22:19, 20.

Encyclopædia Britannica ennihimya-tho wira soolema sinceene sa Paasikha, “khasinivarihana ni ohihimuwa wa Yesu, masi sinivarihana ni soolema sa atthu”. Mwa ntakiheryo, Encyclopedia of Religion (Enciclopédia ya Etiini) enihimya wira “soolema sa Paasikha ntoko orumeeliwa ithoonyeryo sa mooce ni namarokolo, sintaphulela okumi musya oniphwanyiwa nuumala opwexiwa nooce”. Enciclopédia ya Etiini (ya Englexi) eniira-tho so: “Namarokolo aanisuweliwa okhala ethoonyeryo ya oyara nto owo aathoonyerya orwa wa okathi wa ephovo”.

Philippe Walter, Prusoore onivarerya iliivuru sa okathi wa khalai onnitthokiherya moota sipacenrye awe Paasikha. Owo olempe so: “Okathi waaranttelihiwa aya itiini sa epagau ni eKristau”, vaahikhweya otakaaherya ohihimuxiwa wa Yesu ni soolema sa epagau seiyo “saatthapela omala wa eyiita ni opacerya wa okathi wa ephovo”. Walter onnihimya-tho wira eyo yaahikhaliherya wira “soolema sa eKristau” siirele mpantta kalendario a epagau, ni owiiriha anamunceene okela eKristau.

Okathi wa oranttelihiwa “itiini sa epagau ni eKristau” wiiraneyale nuumala okhwa arummwa a Yesu maana awo yaari ntoko ‘yokhottiherya’ ya epagau. (2 aTesalonika 2:7) Murummwa Paulo aahilopola wira nuumala ‘orowa wawe’, yaamukhumela atthu yaarowa “olavula sovirikana, yahapuxaka alipaòwamini wira yatthareke”. (Miteko 20:29, 30) Nave, wanikisa wa eseekulu yoopacerya, murummwa Yohani aahilepa wira yaahikhala atthu yaapacenrye waahapuxa maKristau. (1 Yohani 2:18, 26) Nto mukhora waahihuleya wira soolema sa epagau sikele muhina mwa eKristau.

Atthu akina pooti wuupuwelaka wira weemya soolema sa Paasikha khahiyo vaari vootthekeya, maana eyo yaanaakhaliherya “mapagau” wiiwexexa yootaphulela ya ohihimuwa wa Yesu. Masi, Paulo khaakupali yeeyo. Nnaamwi aakumanana ni soolema sinceene sa epagau okathi eetta awe mittetthe saalamuleliwa ni aRoma, khaatonko weettela soolema iyo ophavelaka waakhaliherya atthu omwiiwexexa Yesu. Masi, Paulo aahaalopola maKristau wira: “Muhatàneke n’ale ahinamini: nyuwo khamunlikana ni yawo. Exariya enwerya sai watàna ni sotakhala? Vanikhala sai warya okhalaka n’epiphi? Tivó Apwiya vanihimyaya-tho wira: ‘Mukhume eriyari aya: mmwalane ni yawo. Muhivaré itthu sa mwikho’”.​—2 aKorinto 6:14, 17.

Tthiri, ovarerya soolema sa Paasikha woonikhaliherya osuwela wira niira nla khahiyo na maKristau a ekeekhai.

[Eponto yuulupale epaaxina 8]

“Muhatàneke n’ale ahinamini: nyuwo khamunlikana ni yawo”.​—2 aKorinto 6:14