Nvare Muteko Wira Munnuuherye Eparayiisu Yomunepani
“Kintthuna ovuwiha nipuro ninrowaya onyakela inawu saka”.—YES. 60:13.
ISIPO: 102, 75
MUNOOWERYA OTTHOKIHERYA?
Tiivi ekhanle yootthuna yuulupalexa ya anamakokhorela a ekeekhai a Yehova?
Exeeni ekhanle “eparayiisu” yooniheriwe awe murummwa Paulo?
Ninrowa omunnuuherya sai parayiisu a omunepani?
1, 2. Exeeni Soolepa sa eHeeberi sinihimya aya okhala “ntthattó”?
YEHOVA MULUKU oolavula mooreerela oriki: “Erimu ehijé aka, elapo ntthattó na inawu saka”. (Yes. 66:1) Olavulaka sa “ntthattó”, owo onnihimya-tho so: “kintthuna ovuwiha nipuro ninrowaya onyakela inawu saka”. (Yes. 60:13) Owo onipaka sai eyo? Nto eyo enitaphulela exeeni wa hiyo, okhala wira ninkhala ‘vantthattoni’ na Muluku?
2 Nuulumo noowi “ntthattó” ninnirumeeliwa mwa nthoonyeryo ni Soolepa sa eHeeberi vaavo vanihimya etemplo yaarumeeliwa ni aIsarayeli khalai. (1 Wah. 28:2; Esal. 132:7) Etemplo ele, nnaamwi yaari valaponi, yaari eseedi ya okokhorela wa ekeekhai. Mwa enamuna eyo, nto Yehova anoona nipuro nle okhala nooreerexa, tthiri empa ele yaanivuwiha nipuro Yehova aapweha awe inawu sawe.
3. Tiivi ekhanle etemplo yuulupale yomunepani ya Muluku, ni epacenrye liini okhala?
3 Olelo-va, eseedi ya okokhorela wekeekhai khahiyo etemplo yowooneya eri valaponi. Masi yookhala etemplo yomunepani, yeeyo eninvuwiha Yehova ovikana khula empa etekiwe. Awo marehereryo aniiriha oweryaneyaka Muluku wataana ni atthu orumeeliwaka onamukuttho ni mukuttho wa Yesu Kristu. Eyo epacenrye okhala mwaakha wa 29 EC, vaavale Yesu aabatiziwe awe nto khuthanliwa wira okhale Namukuttho Muulupale a etemplo yuulupale ya omunepani ya Yehova.—aHéb. 9:11, 12.
4, 5. (a) Moota xeeni Esalimo 99 enooniherya aya yoolakela yuulupalexa ya anamakokhorela a ekeekhai a Yehova? (b) Nikoho xeeni ninreerela ahu wiikohaka?
4 Mwaha wa ottittimiha marehereryo a etemplo ya omunepani, hiyo ninninvuwiha Yehova vaavo vanilaleya ahu nsina nawe ni ovuwiha marehereryo awe anooniherya omoriwa ikharari a yowoopola. Ti vootteeliha murima osuwela wira maKristau a ekeekhai anivikana imilyau 8 anninvuwiha Yehova olelo-va! Moovirikana ni atthu a itiini sikina yaawo anuupuwela wira yanvuwiha Muluku anookhuma valaponi aroweke wiirimu, nto Anamoona a Yehova otheene annisuwela wira anitthuneya onvuwiha owo valaponi vaava ni naanano-va.
5 Tthiri ninnittharihela ntakiheryo na arumeyi oororomeleya a Yehova anihimmwa Esalimo 99:1-3, 5. (Musome.) Ntoko esaalimo ela enooniherya aya, Moise, Aroni, ni Samuweli yaahikhaliherya moomalela marehereryo a okokhorela wekeekhai okathi aya. (Esal. 99:6, 7) Olelo-va, ale anrowa okhala anamukuttho vamosa ni Yesu wiirimu, eyo piiyo, alipa-oowoottihiwa nlelo ari valaponi yaawo anirumeela moororomeleya nivate na valaponi na etemplo ya omunepani. Imilyau sinceene sa “ipwittipwitthi sikina” sinnaakhaliherya moororomeleya. (Yoh. 10:16) Nnaamwi igrupu iyo soopiili sirineene nlipelelo noovirikana, masi awo annimukokhorela Yehova mowiiraana vantthattoni vaava va Muluku. Khula mmosa a hiyo, vaamureerela wiikoha so: ‘Kiireke kinnikhaliherya marehereryo a Yehova a okokhorela wekeekhai?’
OSUWANYEIHIWA WA ALE ANIRUMEELA ETEMPLO YA OMUNEPANI YA MULUKU
6, 7. Muxankiho xeeni waakhumelenle eriyari ya maKristau a eseekulu yoopacerya, nto exeeni yaakhumelenle iseekulu sinceene muhoolo mwaya?
6 Eseekulu emosa ehivinre nuumala muloko wa eKristau otikitheriwa, yaahikhumelela anammwareya yaale yaahimmwale vahinatthi. (Mit. 20:28-30; 2 aTes. 2:3, 4) Moottharelana, vaanivila vanceene waasuwela ale yaamurumeela mwekeekhai Muluku etemplo awe ya omunepani. Nto nuuvira iseekulu sinceene muhoolo mwaya, waahiphiya okathi wira Yehova aasuwanyeihe omurumaka Mwene aattikhiwe niinano, Yesu Kristu.
7 Mwaakha wa 1919, yaahisuwanyeihiwa ale yeemereriwa ni Yehova ni yaamurumeela etemplo awe ya omunepani. Awo yaahireerihiwa omunepani wira muteko waanvarela aya Muluku otepeke okhala woweemereriwa ni yena. (Yes. 4:2, 3; Mal. 3:1-4) Ele yaawehihiwe awe murummwa Paulo iseekulu sinceene sivinre yaahipacerya waakhwanela nnaamwi yahaamalenle.
8, 9. Mutthokiherye mikhalelo miraru sa “eparayiisu” yeele yoonihiwe awe Paulo.
8 Ninniphwanya otthokiheriwa wa yowoonihiwa ya Paulo yoolepa ya 2 aKorinto 12:1-4. (Mmusome.) Ele yaawehihiwe awe Paulo yaari etthu ehiniweryaneya wooniwa ni apinaatamu pure, tthiri yaari yowuupulula. Eyo yaahela muhina itthu sa muhoolo, sahaakhanle okathi ole. Vaavo Paulo ‘awelihiwe awe erimu yaneraru, eparadiso’ xeeni yaawehihiwe awe? Eparayiisu enihimya awe Paulo, woonasa wene yaari eparayiisu ya valaponi, yomunepani, ni ya wiirimu, nto itthu iyo sotheene saahimya awe saarowa okhumelela muhoolo. Eyo pooti ohimyaka eparayiisu yowooneya enrowa okhumelela valaponi muhoolo. (Luka 23:43, NM ) Eyo pooti omuhimyaka parayiisu a omunepani yoowo onrowa okhumelele moomalela elapo esya. Ohiya-vo eyo pooti olavulaka sa makhalelo ooreelihiwa ari wiirimu “mmatta [eparayiisu] mwa Muluku”—Wis. 2:7.
9 Nto, xeeni Paulo ohimyaka wira aahiiwa “molumo òtikiniha, mutthu ohinweryawe otthokiha”? Okhala wira ole khiwaahiyo okathi wooreerela otthokiherya itthu iye saawehihiwe awe. Masi, olelo-va woophiya okathi wooreerela otthokiherya mareeliho arina aya atthu a Muluku!
10. Xeeni masu oowi “eparayiisu ya omunepani” ni “etemplo ya omunepani” aryaaya oovirikana?
10 Masu oowi “eparayiisu ya omunepani” anniirela mpantta ilavulelo sahu sa mootthokeyani wa Muluku. Masu awo anitaphulela makhalelo ahu ooreelihiwa a omunepani, wala makhalelo anneemererya okhalana murettele ni Muluku ni annihu. Tthiri khivanireerela wuupuwelaka wira masu oowi “eparayiisu ya omunepani” ni “etemplo ya omunepani” anoolikana. Etemplo ya omunepani ti marehereryo a omukokhorela mwa ekeekhai Muluku. Nto eparayiisu ya omunepani enirumeeliwa wira asuwanyeihiwe ale animurumeela Muluku moweemereriwa ni ale animurumeela etemplo awe ya omunepani.—Mal. 3:18.
11. Eparakha xeeni erina ahu voohimya sa eparayiisu ya omunepani?
11 Tthiri ti vookuxa murima osuwela wira okhuma mwaakha wa 1919, Yehova onniweemererya apinaatamu oohimalela ovara muteko ni yena wira omuncererye, omulipihe ni omunnuuherya parayiisu a omunepani valaponi! Munniwerya wiixoona mwiirelaka mpantta muteko owo woovara murima? Niireke munniwerya woona wira ela ennitumererya ovikaniha ovuwiha ‘nipuro nimpweha awe inawu sawe’ Yehova?
OTTHOKEYA WA YEHOVA ONOOTEPA OREERIHIWA
12. Nroromelo xeeni nirina ahu voohimya sa waakhwanela wa Yesaya 60:17? (Nwehe elatarato yoopacerya.)
12 Muteko muulupale wa oreerihiwa wa mpantta wa valaponi wa otthokeya wa Yehova, waahihimmwa vahinatthi ni Yesaya 60:17. (Mmusome.) Amiravo wala ale akenle niinano mwekeekhaini annisoma wala anniiwa voohimya sa marukunuxo awo. Tthiri yaari eparakha yuulupale yaarina aya anna yaale awenhe mirukunuxo iyo sikhumelelaka! Moohaaniherya awo annikupali wira omurumaka Mwene awe, Yehova onneettiha ni okhapelela otthokeya wawe! Awo annaamini wira ele eniroromela aya ekeekhai, ni hiyo ninnaamini nave. Waawiriyana anna awo alavulaka myaha iyo sinrowa olipiha waamini wanyu ni omuroromela wanyu Yehova.
13. Muritti xeeni annivaha aya masu ari Esalimo 48:13-15?
13 Moohicikha etthu sa okathi ovirinhe ahu nryeene mwekeekhayini, hiyo nihaana waaleela atthu akina voohimya sa otthokeya wa Yehova. Okhumelela wa eparayiisu ya omunepani eriyari ya olumwenku wootakhala, woohixariya ni ohirina niphento, mwiiriirya wa mahiku ala! Khula mmosa ohaana waaleelaka mootteeliwa murima ‘anawe ni osùlu awe’, osuwela wahu voohimya sa “Siyoni” yoowo okhanle otthokeya wa Yehova, ni eparayiisu ya omunepani.—Musome Esalimo 48:13-15.
14, 15. Marukunuxo xeeni yaapakiwe myaakha sa 1970, nto moota xeeni akumihenrye aya mireerelo?
14 Nuuvira wa iyaakha, ale ari oowunnuwela mmulokoni aaweha mirukunuxo sinceene siiraneyaka mootthokeyani wa Muluku, nto eyo ennincererya oreera wa mpantta wa valaponi wa otthokeya wa Yehova. Awo annuupuwela okathi yoole miloko saarina aya murumeyi a muloko ohiya nikhuuru na axitokweene, okathi ilapo saarina aya murumeyi a efiliyaali ohiya Ekomisau ya Efiliyaali, ni okathi yoole malakiheryo otheene yaavahiwa aya ni presidenti a Watch Tower Society ohiya ni Nikhuuru Noolamulela na Anamoona a Yehova nootthokiheya saana. Nnaamwi anna awo otheene yaakhaliheriwa ni anna akina oororomeleya, masi mutthu mmosa paahi taarina muritti wa opaka soothanla mmulokoni, ofiliyaali, ni oseedi mundiale. Myaakha sa 1970, saahipacerya opakiwa mirukunuxo wira miritti iyo sikhapeleliweke ni nikhuuru na axitokweene ohiya ni mutthu mmosa paahi.
15 Niireke mirukunuxo iyo sookumiherya mireerelo? Aayo sookumiherya tthiri. Moota xeeni? Okhala wira mirukunuxo iyo saapakiwe mwaha wa wiiwexexa oratteene malakiheryo ari mBiibiliyani. Ohiya muloko wotheene weettihiwaka ni muupuwelo wa mutthu mmosa paahi, nto makhalelo ooloka a nikhuuru notheene na “sovaha” sa Muluku, waanikumiherya mireerelo mootthokeyani wa Yehova.—aÉf. 4:8; Mir. 24:6.
16, 17. Mirukunuxo xeeni sikhumelenle naanano soovanreni murima, nto mwaha wa exeeni?
16 Muupuwele-tho mirukunuxo sipakiwe naanano, ntoko iye sa oturukiwa makhalelo, ilepeliwo ni inamuna sa okaiwa iliivuru. Thiri tivootteeliha murima okawa iliivuru sahu sooreera seiyo sinilavula myaha soovareleya muteko okathi onilaleerya ahu! Ni vaavo vanirumeela ahu itekonoloxia sikumiheriwe naanano wira nimwaramwarye ekeekhai, ntoko orumeeliwa wa Webi saiti jw.org, hiyo ninnittharihela yoolakela ya Yehova ya waaphwanyiha malakiheryo ootthuneya atthu otheene aniphavela, khula nipuro aryaaya.
17 Etthu ekina ehinireerela ahu oliyala enooniherya ankhili a Muluku ti marehereryo anneemererya okhalana okathi wa Omulompa Muluku Vatthokoni, wala okathi wa yoosoma ahu. Ni hiyo ninnisiveliwa ni marehereryo aniinaano voohimya sa eprograma ya mithukumano suulupale sa muttetthe. Ikwaha sinceene hiyo ninnihimya wira khula mwaakha mithukumano iyo sinnitepa oreera! Ohiya-vo, ninnitteeliwa murima mwaha wa nikuruta ninkumiheriwa ni ixikola sinceene sa Omwene. Marukunuxo ala otheene, annooniherya wira anikhuma wa Yehova. Owo khula okathi onninnuuherya oreera wa otthokeya wawe ni eparayiisu ya omunepani enipuha ahu olelo-va!
OKHALIHERYA WANYU WIRA EPARAYIISU YA OMUNEPANI YINNUWE
18, 19. Ninrowa okhaliherya sai omureeriha parayiisu ahu a omunepani?
18 Tthiri eparakha yuulupale weemereriwa ni Yehova wira nikhaliherye omureeriha parayiisu ahu a omunepani. Hiyo ninnipaka eyo vaavo vanilaleya ahu ihapari sooreera sa Omwene ni nthiti ni waapaka awiixutti anceene. Khula mukwaha onimukhaliherya ahu mutthu mpakha okhala Kristau oobatiziwa, tthiri noovara muteko wira nimunnuuherye parayiisu ahu a omunepani.—Yes. 26:15; 54:2.
19 Nnoowerya wuncererya oreera wa parayiisu ahu a omunepani, vaavo vaniimananiha ahu olokiherya makhalelo ahu a eKristau. Mwa enamuna eyo ninniiriha eparayiisu ahu okhala yowaavara murina atthu aniweha. Ohiya osuwela wa mBiibiliyani paahi, ikwaha sikina wiisuumaaliha wahu ni mweettelo ahu wa murettele tonipacerya owiiriha atthu ophavela okela mootthokeyani, nto muhoolo mwaya tanipacerya aya omusuwela Muluku ni Kristu.
20. Moovarihana ni eliivuru ya Miruku 14:35, yoolakela ahu ekhaleke evi?
20 Tthiri, Yehova ni Yesu annitteeliwa murima vaavo vaniweha aya oreera wawe parayiisu ahu a omunepani olelo-va! Awo annisiveliwa ovara muteko ni hiyo wira ninnuuherye oreera wa eparayiisu eyo, masi ohakalala nno ethoonyeryo paahi ya ele enrowa okhumelela vaavo vanrowa ahu omureerihaka parayiisu a ekeekhai valaponi vaava. Khula okathi nuupuweleke masu a eliivuru ya Miruku 14:35, yaawo ani: “Mamwene annisiveliwa n’arumeyi a miruku”. Nto nipakeke itthu mwa miruku okathi oniimananiha ahu okhaliherya omureeriha parayiisu ahu a omunepani!