Omurumeela Yehova “Mahiku Òripiwa Murima”

“EKUMI AKA ennitepa okixankiha mahiku ala” onilavula ti Ernst iitthaka iphumu, yoowo orina iyaakha sinivikana 70.a Eyo enniwiiraneelani? Vakhala wira nyuwo moopacerya wuuluvala nto munapacerya owereyasiwa ni oyeleela ikuru, nto munikhala moovarihana ni masu alempwale eliivuru ya Musuweli ekapitulu  12. Eveersu 1, wuuluvala oniitthaniwa “mahiku òripiwa murima”. Hata vari siiso, khamunitthuneya okhala ooriipiwa murima. Nyuwo munoowerya okhalana ekumi yoohakalala mmurumeelaka Yehova.

MULIPIHERYE WAAMINI WANYU

Nyuwo anna ni arokora owunnuwela khamuniwanana mekhinyu mixankiho sanyu. Arumeyi a Yehova oowuuluvala khalai yaahikhalana mixankiho simosaru sirina anyu. Mwa ntakiheryo Isakhi, Yakobe ni Ahiya khiyaawerya woona saana. (Maph. 27:1; 48:10; 1 Mam. 14:4) Sara oona wira aahimala-mala. (Maph. 18:11, 12) Mwene Davidi “khòna oviha”. (1 Mam. 1:1) Thaaciri Barizilayi khaawerya-tho olya wala owiriyana isipo. (2 Sam. 19:32-35) Abrahamu ni Nowemi yaahikhweliwa ole aathelanne aya.​—Maph. 23:1, 2; Ruth. 1:3, 12.

Nto exeeni yaakhalihenrye awo ovikaniha omuroromela Yehova ni okhala ootteeliwa murima? Mwaha wa ororomela wawe sooleiherya sa Muluku, Abrahamu, hata aari oowuuluvala “ahilipihiwa ni wamini wawe”. (aRom. 4:19, 20) Hiyo nintthuneya okhalana waamini woolipa. Waamini moota owo khonlipa ni iyaakha sirinaahu, osuwela wahu wala makhalelo arina ahu. Mwa ntakiheryo, hata okathi yoole Yakobe aaryaawe ootteettheya, ahoona awe, ni oowereyasiwa, owo aahivikaniha waamini sooleiherya sa Muluku. (Maph. 48:1-4, 10; aHéb. 11:21) Ines, yoowo orina iyaakha 93, oniwereiwa eretta enihonona mitika, onihimya so: “Khula nihiku kinnoona wira Yehova onnikitthuvela vanceene. Kinimuupuwelela Parayiisu khula nihiku. Eyo ennikivaha nlipelelo”. Tthiri owo munepa wooreerela okhalana!

Hiyo ninnilipiha waamini wahu vaavo vanipaka ahu mavekelo, otokosa Nuulumo na Muluku, orowa owiriyana mithukumano sa mmulokoni wa eKristau. Profeta oowuuluvala, Daniyeli aanivekela moohihiyererya ikwaha tthaaru khula nihiku, ni aanivikaniha osoma Nuulumo na Muluku. (Dan. 6:10; 9:2) Naamukhweli oowuuluvala Ana, “Khaleva empa ya Muluku”. (Luka 2:36, 37) Vaavo vanirowa anyu owiriyana mithukumano khula okathi vaniweryaneya aya ni munavaha ikomentaario, nyuwo khamuniilipiha mmansinyu paahi, masi munnaalipiha atthu otheene arina anyu. Nto Yehova onnisiveliwa ni mavekelo anyu, hata muhiweryaka ovara itthu sinceene.​—Mir. 15:8.

Anamunceene a nyuwo, munniphavela owerya woona wira musomeke ni okhala oolipa wira nweryeke orowa omuthukumanoni, masi nyuwo munnoona itthu iyo okhala soovila wala sihiniweryaneya. Nto munrowa opaka xeeni? Murumeele oratteene ele eniwerya anyu. Anamunceene ahiniwerya orowa omuthukumanoni anniwiriyana mithukumano amurumeelaka telefoni. Nnaamwi ohoonaka saana, Inge yoowo orina iyaakha 79 onnilokiherya mithukumano orumeelaka ekoopiya ya ileetera suulupalexa sinivahiwa awe ni munna a mmulokoni yoowo onimpirimiri mucomputadoreni mwawe.

Woonasa wene nyuwo mookhalana etthu yeeyo atthu akina ahirina aya, eyo piiyo okathi. Xeeni ohirumeelaka okathi orina anyu wira nwiriyane masu oogravariwa a Biibiliya, iliivuru sinimutthokiherya Biibiliya, myaha, ni idrama sinanwiriyaniwa? Nave nyuwo pooti waaligarela anna akina wira mwaalipihe ni ‘mulipihiwaka ni wamini omosaru’.​—aRom. 1:11, 12.

MUKHALELEKE NTHITI MITEKO SA MULUKU

Christa, yoowo orina iyaakha sinivikana 80, oniikhupanyerya so: “Ti vooriipiha murima mutthu ohiwerya ovara miteko saavara awe khalai”. Nto atthu oowuuluvala anrowa ovikaniha sai okhala oohakalala. Pedru yoowo orina iyaakha 70 onihimya so: “Mukhalaneke moonelo wooloka. Ohiya omakelaka wuupuwela itthu seiye sihiniwerya anyu opaka masi mutteeliweke murima ni ele eniwerya anyu opaka”.

Niireke nyuwo munnoona inamuna sa olaleerya seiyo sikhanle anyu oovara nlelo? Heidi khoniwerya orowa olaleerya empa ti empa ntoko siira awe khalai. Orineene iyaakha 80, ohiixutta olepa ipaphelo omurumeelaka computadore. Anamalaleerya akina oowuuluvala annipaceriha soosoma sa Biibiliya mapuro oowaatta atthu ntoko oparkhi wala nipuro nneemela axaapa. Vano vakhala wira munikhala empa enikhapeleliwa atthu oowuuluvala, woonasa wene mwaamukhalana “muttetthe” anyu mwaalaleeryaka mameedico ni atthu akina anookhapelelani wala anikhalana anyu?

Okathi wuuluvanle awe, Mwene Davidi aahikhaliherya mooluttuweliwa okokhorela wekeekhai. Owo aahivaha musurukhu ni aahipaka marehereryo wira atthu akina akhaliherye otekiwa empa ya Muluku. (1 Wah. 28:11–29:5) Vamosaru, nyuwo munoowerya okhaliherya mooluttuweliwa miteko sa Omwene sinivariwa olumwenku wotheene. Xeeni ohaalipihaka mapioneero ni anamalaleerya akina a nthiti a mmulokoni mwanyu ni masu oolipiha, waavaha mireerelo vakhaani wala yoolya? Okathi onivekela anyu mwaaheleke muhina amiravo, imusi, anna anivara muteko wa orummwa wa okathi wotheene, aretta ni ale arina miritti soolemela mootthokeyani wa Yehova.

Nto nyuwo ni muteko anyu onnivahiwa efaita yinceene. Tiithi ahu a wiirimu khonirowa woonyanyalani nyuwo annihu oowuuluvala oophentiwa. (Esal. 71:9) Yehova onnoophentani ni onnisiveliwa ni nyuwo. Voohipisa, ootheene ahu ninrowa wunnuwaka masi nihiwereyasiwaka mwaha wa wuuluvala. Ohiya-vo ninrowa okhalana ikuru ni ekumi yooloka, ninrowa ovikaniha omurumeela Yehova, Muluku ahu oophenta voohimala!

[Enoota]