Otaphuleliwa Saana wa Nuulumo na Muluku

“Masu a Muluku ti makumi”.​—AHÉB. 4:12.

ISIPO: 37, 43

MWAAROWA WAAKHULA SAI?

Nthowa xeeni Biibiliya onitthuneya awe okhalana nsina na Muluku?

Nthowa xeeni Tradução do Novo Mundo olokiheriwe awe?

Moota xeeni arumeyi a Muluku animuttottela aya mureerelo Tradução do Novo Mundo?

1. (a) Muteko xeeni Muluku anvahale awe Adamu? (b) Okhuma okathi ole, arumeyi a Muluku anirumeela sai owerya waya olavula?

YEHOVA MULUKU ohaavaha apinaatamu owerya olavula. Nuumala ompweha Adamu mujardim ya wEdeni, Muluku aahinvaha muteko wa ovaha nsina inama sotheene. Adamu aahaavarihela muteko ankhili wira ovahe inama iyo masina oophwanelela. (Maph. 2:19, 20) Okhuma vaavo, arumeyi a Muluku annirumeela owerya waya olavula, wira anvuwiheke Yehova ni waasuweliha atthu akina nsina nawe. Mahiku ala, enamuna emosa ya okhaliherya okokhorela wekeekhai, ori omutaphulela Biibiliya.

2. (a) Malakiheryo xeeni atthariwe okathi aataphuleliwa awe Tradução do Novo Mundo? (b) Exeeni enrowa ahu othokorerya mwaha ola?

² Nnaamwi akhanle ene aBiibiliya anceene masi annivirikana inamuna anitaphulela aya soolempwa ni matata sa khalai. Okhuma mwaakha wa 1940, Ekomisau ya Omutaphulela Biibiliya Tradução do Novo Mundo, yaahikumiherya malakiheryo a otaphulela, yaawo anitthariwa mwa iyaakha 130. Malakiheryo awo taala: (1) Ottittimiha nsina na Muluku ni orumeelaka mBiibiliyani ikwaha sotheene sinirwa aya soolempwa sa khalai. (Mmusome Matheyo 6:9.) (2) Otaphulela Soolempwa sa khalai ntoko saari aya, masi otthokiherya mowiiwanyeya. (3) Orumeela moolumo ookhweya osoma ni wiiwexexa.a (Mmusome Nehemiya 8:8, 12.) Nrowe noone moota malakiheryo ala atthariwe aya okathi aalokiheriwa awe Tradução do Novo Mundo, a 2013, Enkelexi ni mattaava makina.

OTTITTIMIHA NSINA NA MULUKU

3, 4. (a) Soolempwa xeeni sa khalai sirina Tetragrama? (b) Exeeni aBiibiliya anceene apanke aya ni nsina na Muluku?

³ Ale anisoma soolempwa ni matata sa Biibiliya a eHeeberi, mwa ntakiheryo iroolu sa oMar Morto, annitikinihiwa oweha wira Tetragrama, eyo piiyo, ileetera sa eHeeberi sintaphulela nsina na Muluku, onniphwanyaneya ikwaha sinceene. Nsina na Muluku ninniphwanyaneya-tho mapuro makina a Septuaginta a eGriki, yoowo aapakiwe eseekulu 2 AEC mpakha eseekulu yoopacerya EC.

⁴ Nnaamwi nsina na Muluku niryeene mBiibiliyani, aBiibiliya anceene aakumiha nsina na Yehova. Iyaakha piili nuumala okumiheriwa Tradução do Novo Mundo das Escrituras Gregas Cristãs, aahikumiheriwa Biibiliya aitthaniwa Revised Standard Version (Versão Padrão Revisada). Biibiliya ole aahittipiha nsina na Yehova, nnaamwi eversau awe ya 1901 yaakhalanne nsina nlo. Mwaha wa xeeni? Awo yaahimmye wira “khivaniphwanelela Ekerexa ya eKristau” orumeela nsina na mwaneene Muluku. Tivonto, aBiibiliya anceene annitthara muupuwelo owo.

5. Xeeni varyaaya vootthuneya oheliwa nsina na Muluku mBiibiliyani?

⁵ Xeeni oheliwa wala ottipihiwa nsina na Muluku mBiibiliyani oryaaya mwaha wootthuneya? Mutthu onitaphulela saana onnisuwela otthuneya waya osuwela yoolakela ya mwaneene mwaha onitaphuleliwa, nto eyo ennimukhaliherya namataphulela okathi onithanla awe inamuna sootaphulela. Soolepa sinceene sinnooniherya wira nsina na Muluku ti nootthuneya ni nohaana ottittimihiwa. (Okh. 3:15; Esal. 83:18; 148:13; Yes. 42:8; 43:10; Yoh. 17:6, 26; Mit. 15:14, NM) Yehova Muluku, Mwaneene Biibiliya, aahaaruma arumeyi awe yaamulepa Biibiliya wira arumeeleke nsina nawe. (Mmusome Ezekiyeli 38:23.) Ottipiha nsina na Yehova nenlo nilempwale ikwaha sinceene mBiibiliyani, onooniherya ohimuttittimiha Mwaneene Biibiliya.

6. Nthowa xeeni Tradução do Novo Mundo a 2013 aacereriwe awe nsina na Muluku ikwaha 6?

⁶ Olelo-va, vannooneya wira nsina na Muluku nihaana orumeeliwa. Tradução do Novo Mundo a 2013, ookhalana nsina na Yehova ikwaha 7.216, eyo enooniherya wira vano ohincereriwa ikwaha 6, ovikana ole a khalai. Ikwaha 5 siri va 1  Samuweli 2:25; 6:3; 10:26; 23:14, 16. Mwaha woowi Iroolu sa oMar Morto, seiyo saalempwe iyaakha 1.000 vahinatthi olempwa soolepa sa Masorético a eHeeberi, sookhalana nsina na Muluku iversiikulu iyo. Nave-tho ekwaha emosa eniphwanyaneya va Makhulupale 19:18, nto ephwanyiwe mwaha wa otokosiwa saana soolempwa ni matata sa khalai.

7, 8. Nuulumo noowi ‘Owo Onniiriha Okhumelela’ nintaphulelani?

⁷ MaKristau eekeekhai annoona wira vannitthuneya osuwela oratteene nsina na Muluku. Apendise a Tradução do Novo Mundo a 2013 ookhalana soohimmwa sa ninaano voohimya sa nsina nlo. Ekomisau ya Omutaphulela Biibiliya Tradução do Novo Mundo ehoona wira nsina nno, ninkhuma nuulumo na eHeeberi ha·wah,’ eyo piiyo, ‘Owo Onniiriha Okhumelela’.b Iliivuru sahu saanihimya wira nsina nlo ninvarihana ni ele elempwale va Okhuma 3:14, yeeyo enihimya so: “Miyo t’ule onikhala”. Ti nthowa naya Tradução do Novo Mundo a 1984 aahimyale awe wira nsina nlo nintaphulela wira Owo “onniikhaliha Mulipa onimaleliha soolakela sawe”.c Masi, Apendise A4 a Biibiliya a 2013 onitthokiherya so: “Nnaamwi nsina na Yehova nihelaka muhina muupuwelo woowi owo onniikhaliha mulipa onaakhwaniherya soolakela sawe, masi eyo khinimalela vaavo. Ennihela-tho muhina ele yena oniiriha awe soopattuxa sawe wira opake yoolakela awe”.

⁸ Yehova onniiriha soopattuxa sawe okhala khula etthu eniphavela awe. Moovarihana ni yootaphulela ya nsina nawe, Muluku aahimwiiriha Nowe oteka ekalawa, Besaleli okhala mulipa onivara miteko moorattela, Gedeyoni okhala nakhotto ooxintta, ni Paulo okhala murummwa a atthu a mulaponi. Arumeyi a Muluku annisuwela wira nsina na Muluku ti nootthuneya vanceene. Ti nthowa naya Ekomisau ya Omutaphulela Biibiliya Tradução do Novo Mundo ehittipihale aya nsina na Muluku mBiibiliyani.

9. Nthowa xeeni mulokiheryo wa Yehova oniphavela aya wira Biibiliya otaphuleliwe mmattaava manceene?

⁹ Mmattaava 130 otaphuleliwe awe Tradução do Novo Mundo, onnittittimiha nsina na Muluku, maana khottipihale nsina nlo. (Mmusome Malakhiya 3:16.) Masi aBiibiliya akina anitaphuleliwa vano, annittipiha nsina na Muluku, khiyaturuka ni nuulumo noowi “Apwiya”, wala nsina na muluku mukina. Nla ti nthowa nuulupale Nikhuuru Noolamulela na Anamoona a Yehova nimphavela aya wira atthu anceene akhalane Biibiliya onittittimiha nsina na Muluku.

OTAPHULELIWA SAANA NI WOWIIWANYEYA

10, 11. Mixankiho xeeni yaarina aya anamataphulela a Tradução do Novo Mundo, mattaava makina?

¹⁰ Sookhala mixankiho sinceene sinikhumelela okathi onitaphuleliwa aya Biibiliya. Mwa ntakiheryo, Tradução do Novo Mundo a khalai, aahitthara enamuna aBiibiliya akina a Enkelexi yaataphulela aya nuulumo na eHeeberi noowi “Seol”. Mwa ntakiheryo, yoolepa ya Musuweli 9:10 yaahimya so: “Elapo y’alipa-òkhwa [Seol] khuvo-vo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”. Anamataphulela a mattaava makina, ohiya Enkelexi, yaahikhalana muxankiho ola: Nuulumo noowi “Seol” khaninsuweliwa ni atthu anceene, khanimphwanyaneya mudisionaario aya, ni vanikhala wira nnihimmwa nipuro. Tivonto, aheemereriwa otaphulela moolumo “Seol” ni “Hades”, ntoko “Mahiye”.

¹¹ Mattaava makina vaanixankiha otaphulela saana nuulumo na eHeeberi neʹphesh ni na eGriki psy·kheʹ, ntoko ankelexi anitaphulela aya okhala “Eroho”. Mwaha wa xeeni? Mwaha woowi nuulumo nno pooti owiirihaka atthu wuupuwela wira “eroho” eri epantte emosa ya mutthu ehinooneya. Nto eyo pooti owiirihaka atthu wuupuwelaka wira enihimya munepa wala nakuru, ohiya mutthu mwaneene. Tivonto, anamataphulela a Biibiliya yaaheemiheriwa otaphulela nuulumo “eroho” moovarihana ni mwaha onithokoreriwa, ntoko sinitthokiherya awe Apendise a Tradução do Novo Mundo das Escrituras Sagradas​—Com Referências. Etthu yoopacerya yaari okhweiherya wiiwexexiwa muhupi, nto ikwaha sinceene saanilempwa inoota vathi va epaaxina.

12. Itthu xeeni silokiheriwe Biibiliya Tradução do Novo Mundo a 2013? (Nwehe mwaha oni “Olokiheriwa wa Biibiliya a Enkelexi mwaakha wa 2013, Tradução do Novo Mundo,” ori erevista yeela.)

¹² Makoho yaapakiwa ni anamataphulela, yaanooniherya wira vaanitthuneya opakiwa etthu. Nto, Setembro a 2007, Nikhuuru Noolamulela naaheemiherya olokiheriwa Biibiliya a Enkelexi. Anna yaahipacerya othokorerya makoho yaapakiwe ni igrupu saamutaphulela Biibiliya. Moolumo a khalai a Enkelexi, yaahipacerya oranttelihiwa ni moolumo a niinano, ni anna yaaniimananiha wira arumeeleke masu ookhweya wiiwexexa, masi ehiturukiwe etthu. Anna yaamutaphulela Biibiliya ola a Enkelexi yaahirumeela inamuna saarumeeliwe ni anamataphulela a Biibiliya a mattaava makina, wira okhumele saana.​—Mir. 27:17.

ATTHU ANNIXUKHURELA VANCEENE

13. Atthu animoonela sai Biibiliya olokiheriwe 2013?

¹³ Atthu animoonela sai Biibiliya ola a Enkelexi olokiheriwe? Anna a oseedi wa Anamoona a Yehova annaakhela ipaphelo sinceene silempwale ni anna ni arokora a ilapo sotheene, axukhurelaka omwaakhela Biibiliya ola. Anceene anoonela ntoko murokora mmosa olempe so: “Biibiliya onlikana ni ekaaxa erina maluku oowaarya manceene. Osoma masu a Yehova omurumeelaka Biibiliya ola a niinano, onlikana ni otokosa khula nluku noowaarya, owehaka oreera waya ni waarya waya. Enamuna sikhweiheriwe aya soolempwa, onnikikhaliherya omusuwela saana Yehova, yoowo onlikana ni tiithi onisoma masu awe, okikhupaarenle ene”.

14, 15. Atthu anilavula mattaava makina, ohiya Enkelexi, animoonela sai Biibiliya Tradução do Novo Mundo?

¹⁴ Atthu anilavula mattaava makina, ohiya Enkelexi, annixukhuru mwaha wa Tradução do Novo Mundo. Mulopwana mmosa oowuuluvala onikhala oSófia, oBulgária, ohimmye so: “Kinnimusoma Biibiliya okhuma khalai, masi nkitonko omusoma Biibiliya ookhweya omwiiwexexa ni onivara murima ntoko ola”. Vamosaru, murokora mmosa a wAlbânia, aahimmye so, nuumala omwaakhela Biibiliya awe: “Nuulumo na Muluku ninnitepa oreera naasommwaka nttaava na wAlbânia! Tthiri eparakha yuulupale Yehova olavula ni hiyo orumeelaka nttaava nahu!”

¹⁵ Ilapo sinceene, aBiibiliya annitumihiwa musurukhu munceene ni khanikhweya waaphwanya, tivonto, omwaakhela Biibiliya mahala, etthu yoohakalaliha. Erelatoorio yaakhuma oRuanda yaahimya so: “Mwa iyaakha sinceene, atthu yaamusoma Biibiliya ni annihu, khiyaarowa vahoolo mwaha woowi khiyaarina Biibiliya. Khiyaarina musurukhu wira yaathume aBiibiliya yaapakiwe ni ikerexa sa elapo ele. Nave-tho ikwaha sikina khiyaiwexexa saana soolepa sikina, nto eyo yanaapisiha orowa vahoolo”. Masi itthu saahirukunuwa nuumala okumiheriwa Biibiliya Tradução do Novo Mundo, nttaava na elapo ela. Emusi emosa, yeeyo erina anamwane 4, ehimmye so: “Ninnimuxukhurela Yehova ni murumeyi oororomeleya ni a ankhili onivaha Biibiliya ola. Hiyo na atthu oohaawa ni khinaarina musurukhu woomuthumela khula mutthu a emusi ahu Biibiliya awe. Masi vano, khula mmosa ookhalana Biibiliya awe. Wira nimuxukhurele Yehova, khula nihiku ninnimusoma Biibiliya emusi yotheene”.

16, 17. (a) Exeeni Yehova oniphavela awe ni atthu awe? (b) Nilakeleke opaka exeeni?

¹⁶ Muhoolo, Tradução do Novo Mundo oolokiheriwa, onookumiheriwa mmattaava makina. Satana onneererya omaliha muteko owo, masi ninnikupali wira Yehova oniphavela wira atthu amwiiweke oratteene okathi onaalavuliha awe mwa enamuna yookhweya. (Mmusome Yesaya 30:21.) Moohipisa, “atthu othene a mulaponi anosareya osuwela w’Apwiya, ntoko vansareyaya màsi mphareya”.​—Yes. 11:9.

¹⁷ Nto yoolakela ahu ekhale orumeela saana itthu sotheene Yehova onnivaha awe, omuhela muhina Biibiliya ola onivuwiha nsina nawe. Mweemereryeke wira Yehova oolavulihekeni, orumeelaka Nuulumo nawe. Owo onniwerya owiriyana mavekelo ahu otheene. Osoma Nuulumo nawe ni ovekela, onoonikhaliherya omusuwela saana Yehova, nto omphenta wahu onrowa otepaka wunnuwa.​—Yoh. 17:3.

[Inoota]