Olokiheriwa wa Biibiliya a Enkelexi mwaakha wa 2013 Tradução do Novo Mundo

MWA IYAAKHA sinceene, Biibiliya Tradução do Novo Mundo das Escrituras Sagradas oolokiheriwa ikwaha sinceene, masi ola a 2013 tohireere olokiheriwa. Mwa ntakiheryo, Biibiliya ola musya a Enkelexi, soolepa sinceene sirina moolumo vakhaani paahi. Moolumo ootthuneya a mBiibiliyani aalokiheriwa. Ikapiitulu sikina silempwe ntoko ipoesia, ni sihincereriwa inoota sinikhaliherya wiiwexexa soolepa kamosa-kamosa. Khivaniweryaneya othokorerya marukunuxo otheene apakiwe, masi nrowe nithokorerye itthu vakhaani.

Moolumo xeeni ootthuneya a mBiibiliyani aturukiwe? Ntoko sihimmwale aya mwaha ovinre, moolumo oowi “Seol”, “Hades”, ni “eroho” aalokiheriwa. Nave-tho moolumo makina ootthuneya yahaarowa wiiwexexiwa oratteene, wala yaarowa wiixuttiha etthu yoohikhalela, aalokiheriwa wala oturukiwa wira akhweyeke wiiwexexa, ni avarihaneke ni muhupi ori mu soolempwa ni matata sa khalai.

Tivonto, moolumo yaale khalai yaataphuleliwa mwa enamuna emosaru mapuro otheene yaakhumelela aya, vano anitaphuleliwa moovarihana ni mwaha onithokoreriwa. Mwa ntakiheryo, nuulumo na eHeeberi noowi ʽoh·lamʹ, nenlo naataphuleliwa “okathi ohinikisa”, vano pooti otaphuleliwa “mahiku otheene”. Nwehe wira eyo ennilokiherya wiiwexexiwa wa Esalimo 90:2 ni Mikeya 5:1.

Nuulumo na eHeeberi ni eGriki nitaphuleliwe “mmiso” ninnoorwa ikwaha sinceene mBiibiliyani, nihimyaka mmiso wa mmatta wala nitaphulelaka “osuulu”. Tradução do Novo Mundo a khalai aanirumeela ikwaha sinceene nuulumo noowi “mmiso”, ohela muhina va Maphattuwelo 3:15. Masi, vano atthu anilavula Enkelexi khanirumeela vanceene nuulumo noowi “mmiso”, aphavelaka ohimya “osuulu”, tivonto, Biibiliya a 2013 a Enkelexi, onirumeela nuulumo noowi “osuulu” va Maphattuwelo 3:15, ni iversiikulu sikina sinivarihana ni yoolepa ela. (Maph. 22:17, 18; Wis. 12:17) Mapuro makina anitaphuleliwa moovarihana ni mwaha onithokoreriwa.​—Maph. 1:11; Esal. 22:31; Yes. 57:3.

Nthowa xeeni alokiheriwe aya masu yaale yaataphuleliwe sisaale ntoko saari aya soolempwa sa khalai? Apendise A1 a Biibiliya a 2013 onihimya wira Biibiliya otaphuleliwe saana ti yoole “onitthokiherya oratteene muupuwelo onilempwa, ohiya otaphulela nuulumo ti nuulumo, okhala wira eyo kheniiwanyeiha saana yootaphulela aya”. Akhala wira malikanyiho anirumeeliwa nttaava nilepaniwe aya mwaha owo annisuweliwa mwa nttaava nintaphuleliwa aya, nto pooti otaphuleliwa siiso. Ti nthowa naya moolumo a Wisupulula 2:23, ani “ontokosa mirima”, ahiiwale aya siiso, maana anniiwanyeya mmattaava manceene. Masi, eversiikulu ene yeeyo, enniromola-tho “isyo”, nto nuulumo nno pooti ohikhweya wiiwexexa, tivonto nooranttelihiwa ni nuulumo noowi “ankhili”. Vamosaru, nlikanyiho niri Mothakoni 32:14, nni “makhura a isyo sa etrigo”, vano nintaphuleliwa “etrigu yoolokexa”. Nave-tho moolumo ani “kirina iyano soohithikiliwa”, aalokiheriwa wira yiiwanyeyeke oratteene. Vano ani: “nkinisuwela olavula”.​—Okhum. 6:12.

Nthowa xeeni moolumo oowi “aana a Isarayeli” ni “anamwane oolopwana ahirina tiithi aya”, vano anitaphuleliwa aya “aIsarayeli” ni “anamwane ahirina tiithi aya”? Nttaava na eHeeberi, aakhala moolumo anooniherya wira onihimmwa mulopwana wala muthiyana. Masi ikwaha sikina moolumo awo pooti waahimyaka alopwana ni athiyana vamosaru. Mwa ntakiheryo, soolepa sikina sinooniherya wira nuulumo noowi “aana a Isarayeli” naahela muhina alopwana ni athiyana, tivonto, vano nintaphuleliwa “aIsarayeli”.​—Okhum. 1:7; 35:29; 2 Mam. 8:12.

Moolikanasa, aBiibiliya akina a Tradução do Novo Mundo, nuulumo na eHeeberi nintaphulela “anamwane oolopwana” va Maphattuwelo 3:16, naataphuleliwe “anamwane”. Masi Biibiliya musya onnitaphulela nuulumo nimosaru niri va Okhuma 22:24, mwa enamuna ela: “Aniinyu [eHeeberi, “anamwane oolopwana”] anookhala ahirina tiithi aya”. Nto ikwaha sikina, nuulumo noowi “mwaana oolopwana ohirina tiithi awe” nooturukiwa khukhala “mwaana ohirina tiithi awe” wala “ekwaasuni”. (Otum. 10:18; Yobi 6:27) Otaphuleliwa iwo onilikana ni Septuaginta a eGriki. Nave-tho masu ari va Musuweli 12:1 aalokiheriwa.

Xeeni iverbu sinceene sa eHeeberi sikhweiheriwe aya? Iverbu sinceene sa eheeberi sirina mikhalelo miili, mmosa onooniherya wira etthu eyo nlelo enimwiiraneya, ni ekina enooniherya wira etthu eyo yoomala. Tradução do Novo Mundo a khalai aanitaphulela iverbu iyo orumeelaka nuulumo nimosa nookhaliherya, ntoko “aahivikaniha” wala “aahitthikela”, ophavelaka wooniherya wira etthu eyo nlelo enniiraneya.a Masi akhala wira etthu eyo yaahiiraneya, nto aanirumeela moolumo oottittimiherya ntoko “mwekeekhai”, “tthiri”.

Biibiliya a niinano khonirumeela moolumo awo oottittimiherya, vaahikhale wira anikhaliherya wiiwexexiwa oratteene mwaha owo. Mwa ntakiheryo, khivanitthuneya ottittimiherya wira Muluku aahihimya ikwaha sinceene wira “vakhale okokola”, tivonto, Biibiliya a 2013, khonirumeela ikwaha sinceene nuulumo nimosaru. (Maph. 1:3) Masi okhala wira Yehova aanimwiitthana Adamu ikwaha sinceene, nto Maphatthuwelo 3:9 onnittittimiherya eyo oriki: “aanivikaniha omwiitthana”. Nto iverbu sinnitaphuleliwa mwa enamuna yookhweya, ohiya ophavelaka wooniherya akhala wira etthu eyo nlelo enimwiiraneya wala yoomala, ntoko siniiraneya aya ni nttaava na eHeeberi. Mureerelo onikhumelela ti woowi, eyo ennikhweiherya osuwela moota eHeeberi enilavuliwa aya mowaakuveya.

Nthowa xeeni sikhanle aya vano ikapiitulu sinceene silempwale ntoko epoesia? Wanipacerya wene, ipantte sinceene sa Biibiliya silempwale ntoko epoesia. Mahiku ahu ala, elepeliwo ya epoesia enisuwanyeya mwaha wa eriima, eyo piiyo, olikanela wa moolumo ookiserya a eversu. Masi epoesia ya eHeeberi yaasuwanyeya mwaha wa olikana wala ovirikana wa moolumo. Epoesia ya eHeeberi yooneya mwaha wa okhalana muupuwelo woweereryaneya.

Tradução do Novo Mundo a khalai, iversiikulu sa Yobi ni Esalimo silempwe mwa enamuna enooniherya wira nsipo wala epoesia. Elepeliwo ela ennikhaliherya ottittimiherya masu ni okhweiherya wuupuwela. Biibiliya a 2013, iliivuru sa Miruku, Nsipo n’Ophentana, ni ikapiitulu sinceene sa iliivuru sa maprofeta, vano silempwale ntoko epoesia, wira sittittimiherye olikana ni ovirikana wa moolumo. Mwa ntakiheryo, Yesaya 24:2, khuta eliinya ya moolumo ennooniherya olikana ni ovirikana ni ekina, ettittimiheryaka wira khuuvo onirowa otthyawa ophukeliwa ni Muluku. Olepa ntoko epoesia onniwooniherya ale animusoma Biibiliya wira, mulipa olempe mpantta ole, khaamakela otthikela masu mamosaru paahi, masi aaphavela enamuna ya ottittimiherya Nuulumo na Muluku.

Ikwaha sikina vannivila oweha ovirikana waya epoesia ya eHeeberi ni ilepeliwo sikina, tivonto, aBiibiliya akina pooti ovirikanaka mapuro alempwale ntoko ipoesia. Namataphulela ohaana oweha saana mapuro xeeni anitthuneya olempwa ntoko epoesia. ABiibiliya akina anirumeela malikanyiho wira attittimiherye eponto emosa.

Masu Oopacerya a Nsipo n’Ophentana, annimooniherya khula mutthu aalavula, ni okathi aalavula awe.

Marukunuxo xeeni apakiwe mwaha wa osommwa soolempwa ni matata sikina sa khalai? Tradução do Novo Mundo a khalai, otaphuleliwe sirumeeliwaka soolempwa sa Masorético a eHeeberi ni soolempwa sa eGriki sa Westcott ni Hort. Atthu annivikaniha otokosa soolempwa ni matata sa khalai, nto anniiriha soolempwa sikina sa Biibiliya wiiwexexiwa mwa enamuna ekina. Sookhumelela Iroolu sa oMar Morto. Vano sinnitokosiwa soolempwa ni matata sinceene sa eGriki. Soolempwa iyo ni matata vano sinniphwanyaneya mukomputadoreni, nto eyo ennikhweiherya oweha ovirikana okhanle soolempwa kamosa-kamosa, ni oweha ele enivarihana saana ni soolempwa sa khalai sa eHeeberi wala eGriki. Nto Ekomisau ya Omutaphulela Biibiliya Tradução do Novo Mundo yoottottela mureerelo itthu iyo sa vano, nto soovarihela muteko ipantte kamosa-kamosa sa Biibiliya.

Mwa ntakiheryo, 2 Samuweli 13:21, Biibiliya Septuaginta a eGriki ookhalana moolumo ani: “Masi khaaphavela omunyoonyiha Aminoni, maana aari mwanawe ompacerya ni amphentexa awe”. Tradução do Novo Mundo a khalai khaarina moolumo ala, maana khiyaaphwanyaneya mu soolempwa sa Masorético, seiyo silempwale khalai vahinatthi olempwa Septuaginta a eGriki. Masi, Iroolu sa oMar Morto sookhalana moolumo ala, tivo, Biibiliya a 2013 onnirwaana moolumo ala. Nave-tho ti nthowa naya nsina na Muluku nincereriwe aya ikwaha thanu, Eliivuru Yoopacerya ya Samuweli. Nave-tho ehiiriha oturuka masu a Matheyo 21:29-31. Tivonto, marukunuxo makina akhumelenle mwaha wa soolempwa iyo sa khalai sisuweliwe niinano, ohiya ovarexexa epantte emosa ya soolempwa sa eGriki paahi.

Ala marukunuxo vakhaani apakiwe wira akhweiherye omusoma ni omwiiwexexa Tradução do Novo Mundo, yoowo ovahiwe ni Muluku onilavula ni arumeyi awe.

[Enoota]

[Ekaaxa epaaxina 16]

Itthu Isya orina awe Tradução do Novo Mundo a Enkelexi a 2013

Masu Oopacerya a Nuulumo na Muluku:

Sookhala soolepa sinaakhula makoho 20 a mBiibiliyani

Otaphuleliwa wa Moolumo a mBiibiliyani:

Disionaario mwaamukhaani onitthokiherya moolumo anirumeeliwa mBiibiliyani

Apendise A:

Myaha, itabela, ni soohimmwa sinaakhaliherya ale animwiixutta Biibiliya

Apendise B:

Maapha, idesenyo, ni makhaliheryo makina