Watchtower EBIBLIOTEKA ONLAINE
Watchtower
EBIBLIOTEKA ONLAINE
Emakhuwa
  • BIIBILIYA
  • ILIIVURU
  • MITHUKUMANO
  • wp16 N.° 3 ipaax. 5-6
  • Moota Woovilela Oriipiwa Murima

Mpantta ola khekhanle eviidiyu.

Muniswaamihe, khivaniweryaneya orumiha eviidiyu ela.

  • Moota Woovilela Oriipiwa Murima
  • Owehaweha Elaleyaka Omwene wa Yehova (Aatthu Otheene)—2016
  • Mwaha Onlikana Nuula
  • Kinrowa Okhalaka Sai ni Oriipiwa Waka Murima?
    Okathi Onikhwa Awe Ole Onimphenta Anyu
  • Moota Xeeni Atthu Akina Anrowa Aya Okhaliherya?
    Okathi Onikhwa Awe Ole Onimphenta Anyu
  • Nlipeleleke Exeeni?
    Nvenye!—2018
  • Niireke Wira ti Veephattu Oriipiwa Murima Siiso?
    Okathi Onikhwa Awe Ole Onimphenta Anyu
Nwehe Sikina
Owehaweha Elaleyaka Omwene wa Yehova (Aatthu Otheene)—2016
wp16 N.° 3 ipaax. 5-6

MWAHA WA VAKAAPANI | VAAVO VANIKHWA AWE OLEONIMPHENTA AHU

Moota Woovilela Oriipiwa Murima

Sihaavo miruku sinceene voohimya sa mwaha ola. Masi khahiyo wira sotheene sinookhaliherya. Mwa ntakiheryo, atthu akina pooti wooleelani wira muhinleke aahiiso muhooniheryeke oriipiwa wanyu murima. Akina pooti wookhanyereryani opaka etthu yoohikhalela aahiiso wooniherya wira khimureere oriipiwa murima. Biibiliya onnooniherya moonelo wooloka yoowo onivarihana ni sootokosa sa olelo-va.

Ilapo sikina, alopwana khaninla maana vanuupuweliwa wira eyo khahiyo etthu yookhalela. Masi niireke vannitthuneya wuuliwa muru ni ohiphavela wooniwa ni atthu akina wira nooriipiwa murima? Asomi a iretta sa mmuupuweloni anihimya wira wunla okathi mutthu onikhweliwa awe khahiyo vootthekeya. Wunla pooti ovukula oriipiwa wanyu murima. Wiipithiha oriipiwa wahu murima pooti onihaaxa. Biibiliya khonikhaliherya muupuwelo woowi ti vootthekeya aahiiso voohikhalela wunla mwaha wookhweliwa. Mwa ntakiheryo, mmuupuwele Yesu. Nnaamwi aarina owerya wa waahihimuxa alipa ookhwa, owo aahinla nuumala okhwa mpatthani awe, Laazaro.​—Yohani 11:33-35.

Nave, ole oriipiwe murima pooti onanariwaka, vanceenexa akhala wira naakhwa owo okhumelenle mootutuxerya. Ikwaha sikina owo pooti wunla mwaha wa etthu yoohikhalela elavuliwe moohiphavela ni mutthu onimuttittimiha awe. Mulopwana mmosa wAfrika do Sul oniiriwa Mike oni: “Apaapa akhwiiye kirina ene iyaakha 14 paahi. Omasikhoni, pastore a ekerexa Anglicana aahimyale wira Muluku onnaaphavela atthu ooloka ni onnaakuxa nihiku nihiphiyale.a Moolumo awo yaahikiwereya maana naanaaphenta apaapa. Vano soovira iyaakha 63, masi nlelo masu ale annikiwereya”.

Niireke ti vookhalela wiivaha nthowa? Vaavo onikhwa awe mutthu mootutuxerya, ole okhweliwe pooti wuupuwelaka so: ‘Waaniheryasa ela khiyiiraneya vaakhanle wira kaahipaka elexe’. Aahiiso ekwaha yookiserya olavulana ni mutthu owo ohinatthi okhwa mwaahinyakulihana. Itthu iyo pooti wuncererya wiivaha wanyu nthowa.

Akhala wira sinnoophwanyani miyuupuwelo sa wiivaha nthowa aahiiso onanariwa, muhaana opaka etthu. Nto mmuleele mpatthani anyu yoowo onirowa woowiriyanani ni wookhaliheryani oweha wira eyo enniwiiraneela anamunceene nuumala okhweliwa. Biibiliya onnuupuxerya so: “Mpatthani onnimphenta mpatthani awe okathi t’ukathi: onnisuwanyeya okhala munn’awe okathi w’oxanka”.​—Miruku 17:17.

Tthiri Mpattuxa ahu Yehova Muluku tori mpatthani oororomeleya a ale akhweliwe. Mmuleeleke Muluku ele eri vamurimani vanyu maana “owo onnokhapelelani”. (1 Pedru 5:7) Ohiya-vo, owo ooleiherya wira ale ampaka eyo anookhalana muupuwelo ni moonelo woomaaleleya orweela wa “murettele wa Muluku, onvikana osuwela wa mutthu”. (aFilipi 4:6, 7) Nave-tho, mweemye wira Muluku ookhaliheryeni omurumeelaka Biibiliya yoowo ori Nuulumo nawe. Mulepe elista ya soolepa sa Biibiliya sinikhaliherya okhala oomaaleleya. (Nwehe ekaaxa eri mwaha yoola.) Waaniheryasa nyuwo pooti ohela mmuruni soolepa iyo vakhaani. Wuupuwelela ele sinihimya aya pooti wookhaliheryani vanceenexa ohiyu vaavo munikhala anyu mekhinyu ni muhiniwerya anyu ophwanya ikhove.​—Yesaya 57:15.

Iyaakha vakhaani sivinre, mulopwana mmosa a iyaakha 40 oniitthaniwa Jack, ookhweliwa amwaarawe aaphenta awe mwaha wa oretta wa kanser. Jack, ohimmye wira ikwaha sikina onnimphwanya omeekha. Masi nivekelo ninnimukhaliherya. Owo ohimmye so: “Okathi kininvekela aka Yehova, muupuwelo wa omeekha onnivukuwa. Kimmakela ovenya ohiyu ni kihinaphwanya-tho ikhove. Masi nuumala osoma ni wuupuwelela myaha sa mBiibiliyani ni onvekela Yehova, kinnikhala saana, ni kinniphwanya omaaleleya mmuupuweloni ni vamurimani; nuumala-vo kinniphwanya ikhove.

Mwali mmosa oniitthaniwa Vanessa ookhweliwa amamawe mwaha wa oretta. Owo ooweha wira mavekelo annikhaliherya. Vanessa onihimya so: “Okathi kinixanka aka kinninvekela Muluku kiromolaka nsina nawe nto maithori aka annimora. Yehova onniiwa mavekelo aka nave okathi wotheene onnikivaha ikuru”.

Asomi akina anaavaha miruku atthu akhweliwe anihimya wira atthu awo ahaana wiivahereryaka waakhaliherya akina aahiiso ovara miteko mmuttettheni wira ehitepeke oriipiwa murima. Opaka eyo pooti omukhaliherya mutthu owo okhweliwe ophwanya ohakalala. (Miteko 20:35) MaKristau manceene aaweha wira miteko iyo sa waakhaliherya atthu oothoiwa sinniphwanyiha nimaaliho.​—2 aKorinto 1:3, 4.

a Yowiixuttiha eyo khenikhuma mBiibiliyani, maana Biibiliya onnooniherya itthu 3 siniwiiriha atthu okhwa.​—Musuweli 9:11; Yohani 8:44; aRoma 5:12.

Iversu Sa Biibiliya Sinivaha Nimaaliho

  • Muluku onnoona ohaawa wanyu​—Esalimo 55:23; 1 Pedru 5:7.

  • Muluku mooreera murima onniwiriyana mavekelo a arumeyi awe.​—Esalimo 86:5; 1 aTesalonika 5:17.

  • Muluku onninkheliwa vaavo onikhwa awe mutthu.​—Yobi 14:13-15.

  • Muluku onnileiherya waahihimuxa atthu akhwiiye.​—Yesaya 26:19; Yohani 5:28, 29.

    Watchtower EBIBILIOTEKA ONLAINE (1982-2025)
    Okhuma
    Okela
    • Emakhuwa
    • Ovaha
    • Siniphavela Anyu
    • Copyright © 2025 Watch Tower Bible and Tract Society of Pennsylvania
    • Malamulo Oorumeela
    • Mwaha Woosuka Isiiri
    • Privacy Settings
    • JW.ORG
    • Okela
    Ovaha