Eviidiyu: Testemunhas de Jeová—Organizadas para Pregar as Bovas Novas
Okhuma vaavale Anamoona a Yehova yiilokihenrye aya wira alaleeryeke ihapari sooreera mpakha olelo va, soovira iyaakha soovikana 100. Muteko owo muulupalexa wa olaleya ihapari sooreera olumwenku wotheene, ninnilaleya nirumeelaka mattaava imiya sinceene. Ninnilaleya ihapari iyo ilapo soovikana 230. (Math. 24:14) Xeeni muteko ola ori aya wootthuneya? Onivariwa sai olumwenku wotheene? Eviidiyu eni: Testemunhas de Jeová—Organizadas para Pregar as Boas Novas, ennaakhula makoho awo vaavo enitthokiherya aya saana moota onivariwa aya muteko ola olumwenku wotheene. Nuumala woona eviidiyu eyo, muthokorerye makoho ala.
Muthokorerye moota eviidiyu ela yookhalihenryayani wiiwexexa itthu iya sinittharelana: (1) Mulokiheryo wa Yehova oniimananiha sai wira olaleye ihapari sooreera? (2 Tim. 4:2) (2) Sitthokihen’ye sai imusi sa iBetheli olumwenku wotheene? (3) Ankhi ixikola siniwiixuttiha mamisionaario ni axitokweene? (2 Tim. 2:2) (4) Xeeni vanitthuneya aya othokoreryaka khuta nihiku yoolepa ya nihiku ni olokiherya mithukumano sa mmulokoni khula esumana? (Mit. 17:11) (5) Mureerelo xeeni oniphwanya ahu naarowelaka mithukumano sahu sa eKristau? (aHéb. 10:24, 25) (6) Mareeliho xeeni anirowa ahu waakhela mparayiisu valaponi? (Yes. 11:9) (7) Eparakha xeeni murina anyu wiirela mpantta muteko woohepha onivariwa vano?—Yoh. 4:35
Eviidiyu ela ennaakhaliherya atthu anceene osuwela saana muteko wa olumwenku wotheene onivariwa ni Anamoona a Yehova. (8) Okathi xeeni onireerela owooniherya eviidiyu ela ale anaasomiha anyu Biibiliya, amusi anyu, ni atthu akina? (9) Atthu akina yoonenle sai nuumala owooniherya eviidiyu eyo?
Tthiri, vaavo nnuupuwelela ahu itthu Yehova sinipaka awe, ninnilavula ntoko nasalimo ahimye so: “Apwiya, Muluku aka! Sotikiniha ni mirirya sinìrenlyanyu ti sulupale: khavo onlikana ni nyuwo. Kaphavela olaleya n’uvuwiha sothene seiyo: masi sinnikàttela, kihinawerya walikela”. (Esal. 40:6) Nto, nrowe nirumeele saana eviidiyu ela wira naakhaliherye akina wira atepeke omuttittimiha Yehova ni mulokiheryo awe!