Eviidiyu Esya Wira Nipacerihe Soosoma sa Biibiliya

Eviidiyu yaamukhaani eniphwanyaneya esaite ahu jw.org eni: “Xeeni Vanitthuneya Anyu Omusoma Biibiliya?”, ennaasivela atthu anceene. Eviidiyu ela epakiwe wira ewiiriheke ale anisiveliwa ekeekhai weemya yoosoma ya Biibiliya. Mutthu pooti oweha eviidiyu eyo arowa opuro oni: “Peça um estudo bíblico (Nvekele Yoosoma ya Biibiliya)” wanikisa wa epaaxina yoopacerya ya esaite, wala ompaka scan a ekoodigo QR eri wanikisa wa itratato sahu isya. Moone inamuna sikina sa moota woorumeela eviidiyu ela.

• Okathi wootthikela oxukurya, munvekele mwaneene etthoko wira: “Pooti owooniheryani eviidiyu yaamukhaani enooniherya moota woophwanya waakhuliwa wa makoho voohimya sa Biibiliya?” Akhala wira owo onneemya, mmooniherye eviidiyu eyo mmurumeelaka selulari, aahiiso komputadore awe.

• Vaavo ninkawa itratato isya okathi woolaleerya mohiilokiherya wala mapuro otheene ari atthu, mmooniherye ekoodigo QR ni mmutumererye ompaka scan a ekoodigo eyo mmurumeelaka selulari wala aparelyo mukina. Okhala wira mattaava manceene ekoodigo QR ennimwiiriha mutthu ovolowa opuro ori aya eviidiyu, nyuwo pooti omooniherya eviidiyu eyo munternet moohipisa mmurumeelaka selulari wala ekaruma ekina.

• Mwaaleeleke ale anivarana anyu muteko, anaxikola, amusi ni atthu akina munaasuwela anyu voohimya sa eviidiyu ela, ni mwiivahererye owooniherya. Aahiiso mwaalepele e-mail orina elink ya eviidiyu ela, wira awehe mmansaya.

Orumeela saana eviidiyu ela esya, onimookhaliheryani opacerya soosoma sa Biibiliya, ni waakhaliherya ale ‘athanleliwe ekumi ehinimala’.​—Mit. 13:48.