Eformatu Yoohakalaliha ya Itratato Isya
1. Ikaruma xeeni sa muteko woolaleerya sirina eformatu esya?
1 Itratato isya 5 saahikumiheriwa okongresuni a edistritu 2013, “Nulumo na Muluku ti Ekekhai!” Ohiya-vo, Ihapari sa Omwene N. 38 sini: “Niireke Alipa-Ookhwa Anookhala-tho Akumi Tthiri?” sinnirumeeliwa vano ntoko etratato. Nto itratato iya 6 sookhalana eformatu esya yoohakalaliha. Exeeni yiirinhe opakiwa eformatu esya? Ninrowa orumeela sai okathi ninlaleerya ahu khula empa?
2. Exeeni yiirinhe opakiwa eformatu esya ya itratato?
2 Exeeni Yiirinhe Opakiwa Eformatu Esya? Ikwaha sinci, olaleerya wa khula empa wooloka, onnihela muhina itthu iya xexe sinittharelana: (1) Opaka nikoho nimmwiiriha mutthu ohimya moonelo awe wira nipacerihe ovaanela. (2) Osoma yoolepa ya Biibiliya. (3) Omuhiyerya etthu yoosoma mwaneene etthoko. (4) Opaka nikoho ninrowa waakhuliwa mukwaha onittharelana, ni oleihana otthikela omuxukurya mutthu owo. Itratato isya sinninikhaliherya mmwaha ola.
3. Nikaweke sai itratato isya okathi woolaleerya?
3 Moota Woorumeela: (1) Nuumala omukhomasa mutthu owo, mmooniherye nikoho nnaakhuliwa ipantte tthaaru ohoolo wa etratato, ni mmukohe moonelo awe. (2) Muhule etratato, ni muthokorerye epantte eni: “Ele Biibiliya Onihimya Awe”. Musome yoolepa eri vaavo mBiibiliyani vaaweryaneyaka. Akhala wira mutthu owo ookhalana okathi, muthokorerye epantte eni: “Ele Enitaphulela Aya wa Nyuwo”. (3) Munvahe etratato, ni mmutumererye osoma etratato yotheene. (4) Muhinatthi okhuma, mmooniherye nikoho niri wanikisa wa etratato epantte eni: “Wira Muupuwelele” ni mwiiwanane nihiku nootthikela wira mwathokorerye moota Biibiliya onaakhula awe nikoho nlo.
4. Nirumeeleke sai itratato isya mukwaha wootthikela?
4 Nave, ennikhweya orumeela okathi wootthikela oxukurya. Murumeele soolepa siri wanikisa wa etratato wira mwaakhule nikoho mwaapanke anyu mukwaha wookiserya. Muhinatthi okhuma, mmuthoonyerye elatarato eri vaavo ya ebroxura Ihapari Sooreera ni yoosoma ethanliwe erina soohimmwa sikina mmwaha owo, ni munvahe ebroxura. Akhala wira onneemya, mumpake palano wira muthokorerye ebroxura eyo ekwaha yootthikela. Vaavo munipaka anyu eyo, moopacerya yoosoma ya Biibiliya! Aahiiso, ohiya onvaha ebroxura, nyuwo pooti onvaha etratato ekina ni oleihana othokorerya mukwaha wootthikela.
5. Efaita xeeni erina aya itratato mmutekoni woolaleerya?
5 Mwa iyaakha sinivikana 130, ninnirumeela itratato mmutekoni woolaleerya. Nnaamwi munnuwelo aya ni eformatu aya evirikanaka, iyo sinnivikaniha okhala ekaruma yooreera ya olaleerya. Nto nrowe nirumeeleke saana itratato iya isya wira nivikanihe omwara-mwarya osuwela onikhuma mBiibiliyani elapo yotheene.—Mir. 15:7a.