Moota Woopaceriha Ovaanela Nirumeelaka Ifolyeeto

Okhuma Janero a 2018, ekaapa ya Okumi ni Orummwa Ahu Ekaderno Enirumeeliwa Omuthukumanoni enniruha inamuna sa moota woopaceriha ovaanela voohimya sa Biibiliya. Enamuna ela ennitumererya ovaanela ni atthu ohiya waavaha iliivuru paahi. Wira naakhaliherye anamalaleerya okhumela saana, sookhala iviidiyu sa ovaanela voohimya sa Biibiliya sinooniherya moota woopaceriha ovaanela nimurumeelaka Biibiliya paahi. Niireke eyo enitaphulela wira nihirumeeleke iliivuru okathi ninlaleerya ahu empa ni empa? Nnaari. Mwa ntakiheryo, orumeela ifolyeeto enamuna yookhalela wira nipacerihe ovaanela. Hiyo pooti orumeela khula efolyeeto nirumeelaka inamuna iya soovirikana:

1. Mpakeke nikoho niri wanipacerya wa efolyeeto.

2. Mooniheryeke waakhuliwa wa mBiibiliyani murumeelaka yoolepa eri muhina mwa efolyeeto. Akhala wira ookhalana okathi, pooti osoma ni othokorerya iponto sikina siri muhina mwa efolyeeto.

3. Munvaheke mwaneene etthoko efolyeeto eyo ni mmutumererye osoma okathi mukina.

4. Muhinatthi okhuma, mmuhiyeryeke nikoho niri mpantta oni “Wira Muupuwelele” ni nvarihane okathi wootthika wira mwaakhule nikoho nlo.

Okathi wootthikela oxukurya, mmooniherye waakhuliwa waya ni mmuhiyerye nikoho nikina wira mwathokorerye nihiku nikina. Nyuwo pooti opaka nikoho niri musaitini jw.org wala mbroxurani eri wanikisa wa efolyeeto. Okathi wooreerela, mpacerihe ni ebroxura Ihapari Sooreera Sinikhuma wa Muluku! Wala eliivuru ekina ninrumeela ahu wira Niixuttihe.