Moota Woorumeela Mpantta wa Ovaanela Voohimya sa Biibiliya

Okhuma Janero a 2018, epaaxina yoopacerya ya Okumi ni Orummwa Ahu wa Ekristau—Ekaderno Enirumeeliwa Omuthukumanoni onnoorwa mpantta wa ovaanela voohimya sa Biibiliya. Ninrowa orumeela sai mpantta owo?

Soothanleliwa sa Anaxikola: Nyuwo muhaana orumeela nikoho, yoolepa ni nikoho na otthikela oxukurya niri mpantta wa ovaanela voohimya sa Biibiliya. Masi eyo khentaphulela wira nyuwo muhaana opaka epantte anyu sintoko siri aya nviidiyuni. Nyuwo pooti orumeela nlikanyiho nikina, oturuka masu oopacerya wala otthokiherya yoolepa mwa enamuna yoovirikana. Ohiya-vo pooti orumeela eliivuru, ebroxura wala efolyeeto ninrumeela ahu wira Niixuttihe hata muhilempwale mukadernoni wira muhaana opaka eyo.

Okathi Woolaleerya: Mpantta wa ovaanela voohimya sa Biibiliya onninivaha malakiheryo ookhalela ninreerela ahu oorumeela okathi woolaleerya. Akhala wira mwaneene etthoko ohooniherya osiveliwa ni onniphavela wiixutta itthu sikina, nyuwo pooti ovikaniha ovaanela ni yena, woonasa wene murumeelaka mpantta wa otthikela oxukurya. Nave pooti olaleerya mwa enamuna yoovirikana vakhaani ni ele eri mukadernuni wala olaleerya mwa enamuna ekina. Niireke mpantta wa mweeri ola wala yoolepa ya mweeri mukina ti yaarowa ovareleya muteko mmuttettheni mwanyu? Niireke ale munaalaleerya anyu khiyaarowa osiveliwa vakhala wira munaalaleerya moovarihana ni etthu ekhumelenle niinano muttetthe aya? Nyuwo pooti othanla mwaha onrowa waavara murima atthu a muttetthe anyu. Masi yoolakela anyu mwaapakaka itthu iya sotheene okhaleke mwaha wa “Ehapari Yorera” wira nweryeke waalaleerya atthu akina.—1 aKor 9:22, 23.