Murumeele Itratato Wira Mulaleye Ihapari Sooreera
1. Moota xeeni itratato sinirumeeliwa aya ni atthu a Muluku?
1 Okhuma khalai, Anamoona a Yehova annirumeela itratato sinimwiixuttiha Biibiliya wira alaleye ihapari sooreera. Mwakha wa 1880, C. T. Russell ni akhwaawe yaahipacerya okumiherya Bible Students’ Tracts (Itratato sa Alipa Oomusoma Biibiliya). Itratato iya yaanivahiwa ale yaasoma erevista Watch Tower wira yaakaweleke atthu akina. Itratato saanivahiwa efaita yuulupale, tivonto, nuulumo noowi “etratato” naahiheliwa muhina mwaakha wa 1884 vaavo C. T. Russell aalepinhe awe mutthenkeso onikhaliherya muteko woolaleerya waitthaniwa Zion’s Watch Tower Tract Society, vano oniihaniwa Watch Tower Bible and Tract Society of Pennsylvania. Mpakha mwaakha wa 1918, alipa oomusoma Biibiliya yaahikawa itratato sinivikana imilyau 300. Mpakha olelo-va, itratato sinnikhaliherya vanceene muteko woolaleerya.
2. Xeeni itratato sinikhumela aya saana?
2 Xeeni Sirya Aya Soovara Murima: Itratato sookhalana ikoore soovirikana ni sooreera oweha. Ohiya-vo, ihapari sirina aya ti soohakalaliha ni sootthuneya. Itratato pooti omusivela mwaneene etthoko onoovelela okuxa erevista wala eliivuru. Iyo ti sookhweya okawa, pooti wa anamalaleerya asya ni anamwane. Ohiya-vo, itratato ti sooyeva ni sookhweya okuxa.
3. Muhimye etthu etonko owiiraneelani wala elempwale muliivuruni mwahu enooniherya efaita erina aya itratato.
3 Atthu anceene aasuwela ekeekhai mukwaha woopacerya orweela mwa itratato. Mwa ntakiheryo, muthiyana mmosa a elapo ya Haiti aahoona etratato ahu mphironi. Owo aahittotta, khusoma, nto khuhimya so: “Koophwanya ekeekhai!” Vano, aahirowa oSalau wa Omwene, khupacerya omusoma Biibiliya, nto khubatiziwa. Eyo yaahiiraneya mwaha wa owerya orina aya Nuulumo na Muluku niri mutratatoni.
4. Nipakeke exeeni akhala wira mweeri owo ninkawa itratato?
4 Olaleerya Khuta Empa: Okhala wira itratato sinnikhaliherya vanceene, nto okhuma Novembro ni myeeri sikina, ninrowa okawaka itratato. Hiyo khahiyo nimphavela okawa itratato paahi, masi nimphavela orumeela wira nipacerihe ovaanela. Akhala wira mwaneene etthoko onoosiveliwa ekeekhai mukwaha woopacerya wala wootthikela oxukurya, pooti omooniherya yoosoma nirumeelaka eliivuru Biibiliya Oniixuttiha Exeeni?, wala eliivuru ekina enirumeela ahu wira nimusomihe Biibiliya. Nto, nikaweke sai itratato naalaleeryaka khula empa? Okhala wira khuta etratato ti yoovirikana, nto nihaana osuwela saana iye sinikawa ahu.
5. Ninrowa okawaka sai itratato naalaleeryaka khula empa?
5 Moolumo ahu avarihaneke ni muttetthe vamosa ni etratato enikawa ahu. Nto pooti opacerya ovaanela nimooniheryaka mwaneene etthoko etratato eyo. Ekaapa ya etratato pooti omwiiriha mutthu osiveliwa ekeekhai. Wala pooti omooniherya itratato soovirikana ni onvekela wira othanle ele enimusivela. Naalaleeryaka mittetthe seiye atthu anoovelela aya ohula mukhora, nivareleke etratato wira mwaneene etthoko owehe ekaapa aya, wala onvekela othanla oryeene vamukhora mwaha oniphavela ahu wira ohimye moonelo awe. Nave-tho, akhala wira muru wa etratato ori ntoko nikoho, ninvekele wira ohimye muupuwelo awe. Aahiiso, pooti opaka nikoho ninrowa onvara murima ni omwiiriha ophavela ovaanela. Moottharelana, nisome epantte yaamukhaani ya etratato eyo, niphumuryaka mapuro ari makoho ni onvekela mwaneene etthoko ohimya moonelo awe. Soolepa sinittittimiherya iponto suulupale sihaana osommwa mBiibiliyani. Nuumala othokorerya mwaha owo, pooti omaliha ovaanela wahu ni oleihana nihiku notthika. Akhala wira muloko anyu onnihiya iliivuru vatthokoni vahikhanle mutthu, pooti ohiya etratato opuro wowiipitheya akhala wira mwaneene etthoko khokhanle.
6. Ninrowa orumeela sai itratato okathi woolaleerya mphironi?
6 Olaleerya Mphironi: Mootoko orumeela itratato wira mulaleerye mphironi? Pooti wira akina animwaakuveya ni kharina okathi woolavula ni hiyo. Nto pooti ovila osuwela yaaphavelaka tthiri ekeekhai. Tivonto, ohiya waahiyerya irevista sa niinano nihisuwenle ahu akhala wira anoosoma, naavaheke etratato. Okhala wira ekaapa aya ti yooreera ni moolumo aya toohaatta, nto eyo pooti owiiriha atthu awo osoma etratato eyo yakhalana okathi vakhaani. Masi, akhala wira khanaakuveya, nihaana ovaanela ni atthu awo voohimya sa ele eri mutratatoni.
7. Muhimye sowiiraneya sinooniherya moota woorumeela itratato okathi ninlaleerya ahu mohiilokiherya.
7 Olaleerya Mohiilokiherya: Khivanixankiha olaleerya mohiilokiherya nirumeelaka itratato. Mwa ntakiheryo, munna mmosa onnipweha mpolosani itratato vakhaani okathi onikhuma awe owannyawe. Amphwanya mutthu, ntoko onimwiira nakoso, onnikumiha etratato nto khiyanvaha mutthu owo wira osome. Okathi mulopwana mmosa ni mwaarawe yaaronwe aya oxukurya oNova Iorque, yaahisuwela wira yaamukumana atthu a ilapo sikina. Vano, yaahikuxa efolyeeto Nações ni itratato saalempwale mattaava oovirikana. Nto, okathi yaamphwanya aya mutthu atumihaka itthu mphironi aahiiso akilanthe ene mujardim wala murestaurante, yaaninvaha etratato ya nttaava nawe nooyareliwa.
8. Moota xeeni itratato sinilikana aya ni ipyo?
8 ‘Mwàle Ipyó Sanyu’: Itratato sinilikana ni epyo. Mulimi onnimisa ipyo mapuro oovirikana maana khonisuwela epyo xeeni enirowa omela ni wunnuwa. Musuweli 11:6 oni: “Tivó mwàleke vasisu, mwàle-tho makaripi, mana khamunsuwela ipyó sothene satthunaka omèla sana, nnákhala khamunsuwela epyó xeni yorera wàla”. Tivonto, nrowe nivikanihe ‘omwaramwarya’ ihapari sooreera nirumeelaka itratato.—Mir. 15:7.
[Eponto yuulupale epaaxina 3]
Okhala wira itratato sinnikhaliherya vanceene, nto okhuma Novembro ni myeeri sikina, ninrowa okawaka itratato.