Nivaheke Efaita Muteko Ahu Woolaleerya
1. Atthu anceene a mulaponi anoonela sai muteko woolaleerya?
1 Olumwenku ola onilamuleliwa ni Satana, anamunceene anoona okhala “etthu y’ololo” muteko woolaleerya. (1 aKor. 1:18-21) Naahikhalane ephoole, muupuwelo ola woohiloka, pooti onikhulumula ni ovukula oluttuweliwa wahu muteko woolaleerya. (Mir. 24:10; Yes. 5:20) Mathowa xeeni anniiriha ovaha efaita eparakha erina ahu ya okhala Anamoona a Yehova?—Yes. 43:10.
2. Nthowa xeeni olaleerya oryaaya muteko wootteela onilikana ni “anamukuttho”?
2 Muteko Wootteela: Murummwa Paulo, aahihimya wira olaleerya ori muteko wootteela oninvarela ahu Muluku nilikanaka ni “anamukuttho”. (aRom. 15:15, 16) Moota xeeni olaleerya oryaaya muteko wootteela onilikana ni “anamukuttho”? Olaleya ihapari sooreera onnimwiiriha mutthu ‘ovara vamosá muteko ni Muluku’; nave-tho onnivuwiha nsina na Yehova. (1 aKor. 3:9; 1 Ped. 1:15) Yehova onnoona muteko ahu woolaleerya okhala ntoko “mukuttho w’otthapela”. Nto muteko woolaleerya onniirela mpantta omukokhorela wahu Yehova.—aHéb. 13:15.
3. Exeeni eniiriha muteko woolaleerya okhala eparakha yuulupale?
3 Olaleya ihapari sooreera eri eparakha yuulupale. Atthu vakhaani paahi tarina eparakha ela. Malaikha yaarowa ohakalala ovara muteko ola; moohaaniherya awosa yanwerya ovara oratteenexa. (1 Ped. 1:12) Masi, Yehova oonithanla hiyo apinaatamu oottheka nri ntoko ‘mwapu w’oloko’, khunivaha eparakha ela yuulupale ya olaleerya!—2 aKor. 4:7.
4. Nnooniherya sai wira ninnivaha efaita muteko woolaleerya?
4 Muteko Wootepa Otthuneya: Okhala wira ninnivaha efaita vanceene muteko ahu woolaleerya, ninnoonela muteko ahu ola okhala ‘etthu yotepa otthuneya’. (aFil. 1:10) Tivonto, hiyo ninnirowa olaleerya khuta esumana. Mwa ntakiheryo, mulipa oowiipa oovuwa yoowo onivaha efaita muteko awe, ohaana olokiherya khuta nsipo onrowa awe wiipa ni wiimananiha wira okhumele saana. Moolikanasa, hiyo nihaana wiilokiheryaka nihinatthi orowa olaleerya wira niweryeke ‘olaleya vophwanela Ehapari y’ekekhai’, ni wiixuttiha saana.—2 Tim. 2:15; 4:2.
5. Ti pani onivaha efaita muteko ahu woolaleerya?
5 Muhihiye moonelo wa atthu akina ovukulaka oluttuweliwa wanyu. Muhiliyale wira ahaavo atthu anceene mmuttettheni mwahu anisiveliwa ihapari sooreera. Hata vari siiso, khahiyo nimphavela waasiveliha apinaatamu. Masi, nimphavela omusiveliha Yehova, yoowo onivaha efaita yuulupale wiimananiha wahu.—Yes. 52:7.