Mathowa 12 Anniiriha Olaleerya

Xeeni ninlaleya ahu ni wiixuttiha ihapari sooreera? Niireke waakhaliherya atthu ophwanya ephiro ya okumi woohimala, ti nthowa nuulupale ninniiriha olaleerya? (Math. 7:14) Nlo nthowa noopacerya ninromoliwa mmwaha ola, masi khahiyo nuulupale. Nto, eriyari ya mathowa 12 anittharelana, tinivi nri nootepa otthuneya?

1. Muteko woolaleerya onnoopola ikumi.—Yoh. 17:3.

2. Onnalopola ale anivara sootakhala.—Ezek. 3:18, 19.

3. Onnaakhwaniherya iprofesia sa Biibiliya.—Math. 24:14.

4. Onnooniherya wira Muluku taxariya. Okathi atakhali anirowa aya opwetexiwa, khuuvo mutthu onirowa ohimya wira Yehova khiwaavanhe okathi wira attharuwe.—Mit. 17:30, 31; 1 aTim. 2:3, 4.

5. Onniniiriha omaleliha muteko orummwale ahu wowaakhaliherya atthu athummwale ni ephome ya Yesu osuwela ekeekhai.—aRom. 1:14, 15.

6. Onniniiriha ohikhalana mulattu wa ephome.—Mit. 20:26, 27.

7. Onninikhaliherya wira noopowe.—Ezek. 3:19; aRom. 10:9, 10.

8. Onnooniherya wira ninnaaphenta anamwaattamanani ahu.—Math. 22:39.

9. Onnooniherya wira ninnimwiiwelela Yehova ni Mwanawe.—Math. 28:19, 20.

10. Onniirela mpantta omukokhorela wahu Muluku.—aHéb. 13:15.

11. Onnooniherya omphenta wahu Muluku.—1 Yoh. 5:3.

12. Onnivuwiha nsina na Yehova wala otteeliha.—Yes. 43:10-12; Math. 6:9.

Tthiri, khahiyo wira mathowa ala paahi tanniiriha olaleerya. Mwa ntakiheryo, olaleerya onnilipiha waamini wahu, onninivaha-tho eparakha yoovara muteko vamosa ni Muluku. (1 aKor. 3:9) Masi, nthowa nummuru 12, ti nikhanle nuulupale ninniiriha olaleerya. Hata atthu akina ahiphavelaka, muteko woolaleerya onnivuwiha wala otteeliha nsina na Muluku ni onnimwaakhula Satana yoowo oninveeha Yehova. (Mir. 27:11) Tivonto, nihaana ovikaniha ‘mohihiyererya owixuttiha atthu [ni] olaleya’ ihapari sooreera.—Mit. 5:42.