Iliivuru Sahu Sikhaleke Sai?

Nno nikoho nooloka opaka vaavo nimphavela ahu okawa khula muthinto wa eliivuru. Khuta eliivuru ekhunen’ye mmapontani, yowuuluvala, yoonanara, wala okhuttuvala, ti yoohiloka. Okawa iliivuru iyo, waarowa oveehiha mulokiheryo ahu, ni omwiiriha mwaneene etthoko ohicalela ihapari sooreera seiyo sinoopola okumi wa atthu.

Nto ninrowa owerya sai okhalela oratta iliivuru sahu? Wira akhapelele saana iliivuru sinivarela aya muteko woolaleerya, anna anceene anihela mmurupani. Mwa ntakiheryo, mmurupani mwaya awo annikhalana nipuro noopweha iliivuru, nikina noopweha irevista ni ibroxura; nave-tho annikhalana nipuro na itratato, ni itthu sikina. Okathi animuttikiherya aya mmurupani Biibiliya aya vamosa ni eliivuru yaarumeela aya, annipaka eyo ni ephoole wira iliivuru iyo sikhaleke saana ni sihinanareke. Anamalaleerya akina, annikhalana ikaapa anihela aya iliivuru, wala mpalaastikuni owooneeleya ohilempwale etthu. Khula muthinto onirumeela ahu wa moota wookuxa ni ovarela muteko iliivuru sahu, okhaleke wooloka wira atthu ahikhalane nthowa naarowa owiiriha olavula moonyohola muteko ahu, mwaha wonvaha eliivuru yoonanara.—2 aKor. 6:3.