Mukaweke Mwa Miruku Iliivuru Sinimutthokiherya Biibiliya

Yesu aalavunle so: “Ntoko sivahiwanyu mahala, siso-tho nvaheke mahala”. (Mat 10:8) Hiyo ninnittharihela malakiheryo awo, okhala wira khinnaavekela musurukhu atthu anaavaha ahu Biibiliya wala iliivuru sikina. (2 aKor 2:17) Hata vari siiso iliivuru sahu sookhalana ekeekhai ya efaita yuulupale enikhuma wa Muluku. Orumeeliwaka musurukhu munceene ni wiimananiha wa anna, sinnipakiwa iliivuru iyo ni olovoleliwa miloko sa olumwenku wotheene. Tivonto vanitthuneya ahu okuxa seiye sinirowa ahu orumeela paahi.

Mukhaleke a miruku okathi onaakawela anyu iliivuru atthu akina, hata okathi onilaleerya anyu mapuro oowaatta atthu. (Mat 7:6) Ohiya omukawelaka khula mutthu onivira, mmananiheke ovaanela ni mutthu owo wira moone aasiveliwaka ekeekhai. Niireke mwanwerya waakhula wira aayo hata nikoho nimosa nri vathi-vo? Vakhala wira khamuniwerya woona wira mutthu owo onnisiveliwa ekeekhai, vaamureerela onvaha efolyeeto paahi. Masi, vakhala wira owo ovenke erevista wala eliivuru ekina, hiyo pooti onvaha emosa.​—Mir 3:27, 28.