Makoho Oowaakhuliwa
◼ Ninrowa osuwela sai vaareerelaka omuhiyerya mutthu iliivuru sahu?
Wanipacerya, nihaana osuwela akhala wira mutthu owo onnisiveliwa ekeekhai. Akhala wira onnisiveliwa, pooti omuhiyerya irevista, ebroxura, eliivuru, wala etthu ekina enikawa ahu mmuteko woolaleerya. Hiyo pooti onvaha iliivuru iyo, hata mutthu owo ohirina musurukhu, wala orineene vakhaani wira okhaliherye muteko ahu onivariwa mulaponi motheene. (Yobi 34:19; Wis. 22:17) Okhala wira iliivuru sahu sihaana efaita, nihihiyeke ni atthu yaale ahinivaha efaita.—Math. 7:6.
Ninrowa osuwela sai wira mwaneene etthoko onnisiveliwa ekeekhai? Mwaha wa weemererya ovaanela ni hiyo, eyo enooniherya wira onnisiveliwa ekeekhai. Akhala wira onniwiriyana naalavulaka, waakhula makoho, ni ovaha ikomentaario, eyo enooniherya wira onniphavela ekeekhai. Aawiriyanaka vaavo vanimusoma ahu Biibiliya, eyo enooniherya wira onnittittimiha Nuulumo na Muluku. Ikwaha sinceene, pooti omukoha akhala wira onoosoma eliivuru eyo eniphavela ahu onvaha. Anamalaleerya ahaana okhala a miruku wira asuwele akhala wira mutthu owo onnisiveliwa ekeekhai. Mwa ntakiheryo naalaleeryaka mphironi, khivanireerela ovaha irevista, ibroxura, wala iliivuru wa khula mutthu onivira. Naahisuwele saana wira mutthu owo onnisiveliwa ekeekhai, pooti onvaha epaphelo ya nlattulo wala etratato.
Nave-tho, iliivuru sinikuxa awe namalaleerya mmulokoni ohaana oowerya okawa oratteene mmuteko awe woolaleerya, ohiya moophavela waakhela soovaha paahi. Musurukhu onivahiwa ni atthu, khahiyo anithuma iliivuru sinaavaha ahu. Masi, anikhaliherya muteko wotheene woolaleerya onivariwa olumwenku wotheene. Pooti nikhalanaka musurukhu vakhaani wala munceene, masi ohela efaita ihapari sooreera onooniiriha ovaha ni murima wotheene itthu sirina ahu wira nikhaliherye soophavela sa Omwene. (Mar. 12:41-44; 2 aKor. 9:7) Opaka eyo, enooniiriha okuxa paahi iliivuru sinitthuneya, ohiya ophavela ophwanya musurukhu onivahiwa ni atthu.
[Eponto yuulupale epaaxina 2]
Anamalaleerya ahaana okhala a miruku wira asuwele akhala wira mutthu owo onnisiveliwa ekeekhai