“Mukhaleke Mophentani Mwa Muluku”
1. Yoolakela xeeni erina aya eliivuru “Mukhaleke Mophentani Mwa Muluku”?
1 Ninnihakalala wooleelani wira okhuma esumana 5 ya Novembro, 2012 ninrowa othokoreryaka eliivuru “Mukhaleke Mophentani Mwa Muluku” mwa Yoosoma ya Biibiliya ya Muloko! Ewarakha ya Nikhuuru Noolamulela elepelinwe ale animphenta Yehova enimala ni masu ani: “Tthiri ninnikupali wira eliivuru ela, enrowa wookhaliheryani wira nvikaniheke weettela ekeekhai okumi anyu wotheene, wira ‘mukhaleke mophentani mwa Muluku, muroromelaka . . . ovahiwa ekumi yohimala’.—Yuda 21.
2. Moota xeeni eliivuru ela enrowa aya onikhaliherya?
2 Ele Enrowa Ahu Wiixutta: Ninrowa ovarihela sai muteko malakiheryo a Biibiliya mmyaha ntoko apatthani, otthekula, wattittimiha makhulupale, othelana, malavulelo ni soolema soohiloka? Yowuupuxerya ya murima ahu enoovarihana ni malamulo a exariya ari mBiibiliyani. (Esal. 19:8, 9) Vaavo ninrowa ahu otepaka wiiwexexa iphiro sa Yehova, nto omwiiwelela wahu okumi wotheene onooniirihaka ophavela omuhakalaliha.—Mir. 27:11; 1 Yoh. 5:3.
3. Xeeni vanitthuneya ahu wiimananihaka okomentari khula yoosoma?
3 Mwiilipihe Wira Muhicompele: Okathi munitthokiha anyu yoosoma, mphaveleke onvuwiha Muluku eriyari ya atthu oothukumana. (aHéb. 13:15) Muloko wotheene onrowa othokorerya eliivuru ela hoothe. Okhala wira ipantte sa yoosoma sinrowa oyevaka, nohaana oreheryaka saana wira naweryeke okomentari. Ikomentaario sahu sootthokiheya saana, sinoowiiriha akina ophenta ni ovara miteko sooreera, ni wiiriha yoosoma okhala yoohakalaliha ni yoovara murima. (aHéb. 10:24) Nave, ohakalala wahu onimuncerereya vaavo ninrowa ahu olavulaka yiixuntte ahu.
4. Nthowa xeeni vanitthuneya ahu wiiwelela sooruma sa Yehova?
4 Masu Yesu aalavunle awe ohiyu wookiserya valaponi, annooniherya wira wiiwelela sooruma sa Yehova ni okhala moophentani mwa Muluku etthu yoovarihana. (Yoh. 15:10) Nto nikhaliheriwaka ni eliivuru ‘Omphenta Muluku’, nnoowerya ovikaniha wiiwelela malakiheryo a Biibiliya mookumini mwahu, ni ‘okhala mophentani mwa Muluku’.—Yuda 21.