Web Site Ahu a Internet, Opakiwe Wira Onikhaliheryeke Hiyo, ni Akina
Yesu ooniruma olaleya ihapari sa Omwene “mulaponi mothene, wira maloko othene esuwele”. (Math. 24:14) Wira nikhaliheriwe ‘ovara muteko’ owo moomalela, isite watchtower.org, jw-media.org, ni jw.org, sootakaahiwa wira ekhale esite emosa paahi: jw.org.—2 Tim. 4:5.
“Mulaponi Mothene”: Atthu anceene mulaponi, annirumeela Internet. Awo annirumeela Internet wira yaakhaliherye osuwela itthu siniiraneya mulaponi, ni enirumeeliwa vanceenexa ni amiravo. Esite ahu ennaakhaliherya atthu anirumeela Internet ophwanya waakhuliwa woororomeleya wa makoho anikhuma mBiibiliyani. Nave, enniwiiriha osuwela nikhuuru nootthokiheya na Yehova, ni waakhweiherya oveka yoosoma ya Biibiliya moohiliva etthu. Internet enniiriha ihapari sa Omwene ophiya mpakha mapuro yaale atthu aniiwa aya vakhaani ihapari.
“Maloko Othene”: Wira naalaleerye atthu a “maloko othene”, nihaana okumiherya ekeekhai ya Biibiliya, ni mattaava oovirikana. Ole onihula esite jw.org, onniphwanya soohimmwa sa mattaava oowiiraka 400, ovikana isite sikina sa mulaponi.
Murumeele Saana: Esite ela jw.org, khepakiwe paahi wira yaakhaliheryeke ale ahikhanle Anamoona. Epakiwe wira erumeeliweke-tho ni Anamoona a Yehova. Akhala wira munnirumeela Internet, ninnootumereryani olimalela esite ela. Malakiheryo anittharelana annooniherya moota woorumeela.
[Eponto yuulupale epaaxina 3]
Mweererye Orumeela Esite Ahu
1 Mulepe jw.org, opuro onirumeela anyu wira nwehe Internet mukomputadoreni mwanyu.
2 Nuumala ohula esite jw.org, mutthitte miru saamukhaani, imenu, opções, ni ilinki.
3 Mweererye oweha esite jw.org mmurumeelaka selulari. Ejanela enihuleya ti yooyeva moovarihana ni selulari owo, masi mwaha aya onoolikana ni ohula mukomputadoreni.