Murumeeleke Esaite Ahu Okathi Woolaleerya​—“Waakhuliwa wa Makoho a mBiibiliyani”

Epantte eni: “Sowiixuttiha sa Biibiliya” ya jw.org, yookhalana opuro oni: “Waakhuliwa wa Makoho a mBiibiliyani”. Nalimalela epantte ela enaakhula makoho, nnoowerya waaleela atthu wira esaite ahu ennaakhula makoho aya emurumeelaka Biibiliya. Nave-tho, makoho ala pooti orumeela wira nipacerihe olaleerya. Nithanleke nikoho nnaasivela atthu, ninvekeleke mutthu owo ohimya moonelo awe, ni omooniherya ele Biibiliya onihimya awe nimurumeelaka jw.org. Nuumala-vo, nimuleeleke opuro niphwannye ahu soohimmwa iyo. Enamuna ekina ori onvekela osoma makoho awo musaiteni. Mwaarawe mutokweene mmosa ooweetteetta a wEstados Unidos onnikhumela saana vaavo onimukoha awe mutthu oriki: “Anamunceene anniikoha wira: ‘Niireke Muluku tonikumiherya ohaawa wahu?’ Munniphavela osuwela waakhuliwa waya mwa isekundu 51 paahi?” Nuumala-vo onnirumiha moolumo oogravariwa a nikoho nlo omurumeelaka selulari awe. Wanikisa, onnihula muru 11 wa eliivuru Biibiliya Oniixuttiha Exeeni.