Murumeele Esite Ahu Okathi Woolaleerya
Mwaatumererye Atthu Orumeela Esite Ahu: Atthu akina anoovelela olavula ni hiyo wala weemererya iliivuru sahu, anniphavela waasuwela Anamoona a Yehova vaavo aniweha aya esite jw.org, vatthokoni vaya. Nto, nihaana waaleelaka atthu Web site ahu ola khula okathi wooreerela.
Mwaakhule Makoho: Ikwaha sikina, mwaneene etthoko wala mutthu mukina onisiveliwa ekeekhai, pooti onikoha etthu voohimya sa Anamoona a Yehova wala sookupali sahu. Mowaakuveya mwaakhule nikoho nawe mmurumeelaka selulari wala komputadore. Masi ti vootthuneya osoma yoolepa mBiibiliyani. Akhala wira khamurina selulari orina Internet, pooti omutthokiherya mutthu owo moota woomurumeela jw.org, wira ophwanye mmensawe waakhuliwa waya.—Murowe opuro oni: “ENSINOS BÍBLICOS/PERGUNTAS BÍBLICAS RESPONDIDAS”, wala “QUEM SOMOS/PERGUNTAS FREQUENTES”.
Munvahe Mwaha Wala Eliivuru Mutthu Onimusuwela Anyu: Mbaxari mwaha wala eliivuru erina PDF wala EPUB murumeelaka e-mail, wira munvahe mutthu mukina. Wala mbaxari eliivuru yoogaravariwa enanwiriyaniwa wira muhele mudiskuni. Khula okathi muninvaha anyu mutthu ohibatiziwe eliivuru yoomalela, ebroxura, wala erevista, muhaana olepa murelatoorioni mwanyu. Itthu munibaxari anyu, muhinvahe mutthu ohinimusuwela anyu, wala yoolemelexa. Nnakhala ohela esite ekina. Murowe opuro oni.: “PUBLICAÇÕES”.
Mooniherye Sowiiraneya Isya sa Anamoona a Yehova: Ela enimwaakhaliherya ale animusoma Biibiliya ni akina munaalaleerya anyu ovaha efaita ni osuwela muteko ahu elapo yotheene ni wiiraana wahu wa eKristau. (Esal. 133:1)—Murowe opuro oni: “NOTÍCIAS”.
[Eponto yuulupale epaaxina 5]
Mweererye Orumeela Esite Ahu
1 Murowe opuro oni: “Publicações”, mphwanye eliivuru muniphavela anyu, ni mukilikari ebotau enivarihana ni eformatu eniphavela anyu.
2 Mukilikari ebotau “MP3”, wira nwehe elista ya miru sa erevista wala eliivuru. Mukilikari muru wa mwaha owo wira mbaxari wala ebotau ela wira nwiriyane munternetini.
3 Muthanle nttaava nikina opuro oni: “Exibir”, mphavelaka obaxari eliivuru ya nttaava nenlo.