Ekampaanya Yeeyo Enikumiherya Mireerelo

Sihalaka isumana tthaaru wira kongresu opacerye, miloko sinirowa okhalana-tho ekampaanya yowaalattula ale anisiveliwa ekeekhai wira arowe okongresuni. Tthiri, aakhala mathowa oolooka anniiriha okhalana ekampaanya ela ya vamwaakhani. Ale aneemya nlattulo ni anarwa okongresuni, ikwaha sinci annitikinihiwa ni myaha sinikumihiwa mBiibiliyani, idepartamento sootthokiheya saana sinikhaliheriwa ni anna owiivahererya, ni mweettelo wooloka ni wiiraana onooniherya ahu. (Esal. 110:3; 133:1; Yes. 65:13, 14) Hata vari siiso, niireke ekampaanya ahu ennikumiherya mireerelo, hata mapuro yaale atthu anisiveliwa ekeekhai anitthuneya aya weetta mukwaha woorakama wira arowe okongresuni?

Nuuvira kongresu a edistritu a 2011, efiliyaali emosa yahaakhela ewarakha ya muthiyana aaphwanyale epaphelo ya nlattulo vamukhora vawe. Owo aamakela wiipitha okathi Anamoona a Yehova yaaphiya aya owannyawe. Owo olempe so: “Miyo kaahikhalana enupa yooloka, iyaka oophenta, ni kuupuwela wira kaahikhalana itthu sotheene saarowa okihakalaliha. Masi mooriipiha murima, miyo nkaahakalala, ni veekeekhai okumi aka khiwaarina yoolakela. Nto kaahilakela weetta ikiloomo 320 wira kawiriyane eprograma ya eSaabadu”. Owo aahisiveliwa vanci ni kongresu mpakha omuligarela iyawe ni omuhimeerya wira aarowa orupa weiwe wira owiriyane-tho eprograma ya Domingo. Owo onihimya so: “Miyo kaahiwiriyana myaha sotheene, kahaasuwela Anamoona a Yehova anceene, ni kaaphavela wira muthukumano ole ohimale”. Nuutthikela owaani, owo aahipacerya omusoma Biibiliya ni nuuvira myeeri 4, owo aahikhala namalaleerya oohibatiziwa. Owo onimaliha oriki: “Kinnihakalala vanci mwaha woophwanya epaphelo ya nlattulo vamukhora vaka. Vano okumi aka tthiri wookhalana yoolakela”!

Atthu akina anirowa waakhela epaphelo ya nlattulo animoorwa. Tivonto, mwiirele mpantta mooluttuweliwa ekampaanya ela yootthuneya. Akhala wira sinoohala ipaphelo sa nlattulo, murwaane okongresuni, ni murumeele okathi wa olaleerya moohiilokiherya.

[Ekaaxa epaaxina 5]

Ninrowa Okawaka Sai Epaphelo ya Nlattulo?

Wira nikawe ipaphelo iyo muttetthe ahu wotheene, nihilavuleke itthu sinci. Hiyo pooti olavula so: “Ehaali? Ninkawa ipaphelo iya sa nlattulo seiyo sinkaiwa olumwenku wotheene. Nto ela ti yawinyu. Munoophwanya soohimmwa sinci mpapheloni mmo”. Mooniheryeke ohakalala. Mwaakawaka ipaphelo sa nlattulo wanikisa wa esumana, nihaana-tho ovaha irevista vaareerelaka.