Nlattulo Nooluluwanya

1. Enipacerya silini ekampaanya ya okawa nlattulo na kongresu?

¹ Akhala wira noolokiherya yoolya ya vameekhaaya wira naavahe amusi wala apatthani ahu, yeeyo yaatthuneya wiimananiha ni orumeela musurukhu munceene, hiyo naamwaalattula moohakalala atthu awo. Moolikanasa onnivariwa muteko munceene wira elokiheriwe efesta ya omunepani yeeyo enrowa opakiwa okongresuni onaattamela. Sihalaka isumana tthaaru wira apacerye akongresu ahu, Yehova onninivaha eparakha ya waalattula akina wira erowe. Exeeni enrowa onikhaliherya waalattula atthu awo moohakalala?

2. Exeeni enrowa oniiriha wiimananiha wiirela mpantta ekampaanya?

² Hiyo nnimwiimananiha wiirela mpantta ekampaanya akhala wira nnimuupuwelela mooxukhurela mureerelo oniphwanya ahu mwaha wa wiixuttihiwa ni Yehova omuthukumanoni. (Yes. 65:13, 14) Nihaana wuupuwelela ele yaakumihenrye aya ekampaanya ahu eyaakha evinre. (Nwehe ekaaxa eni Ennikumiherya Mireerelo.) Atthu akina nnaalattula ahu annoorwa masi akina nnaari. Moohicala moota anamunceene anoonela aya, nto wiimananiha wahu okathi wa ekampaanya ononvuwiha Yehova ni wooniherya oreera wawe murima.​—Esa. 145:3, 7; Wis. 22:17.

3. Nlattulo ninrowa okaiwaka sai?

³ Nikhuuru na axitokweene nihaana ovaannelela moota nlattulo nikhanle aya ookaiwa mapuro otheene, inupa sihikhanle atthu, wala okaiwaka okathi woolaleerya mapuro anvira atthu anceene muttetthe owo. Wuumalani wa esumana vaareerelaka irevista pooti okaiwa hoothe ni nlattulo. Nuumala ekampaanya, hiyo ninrowa okhala ootteeliwa murima osuwela wira moohakalala nihiirela mpantta, ni wira atthu anceene anootakaahana ni hiyo vaweryaneya vale wira nilye eyoolya ya omunepani Yehova okumihenrye awe!

[Ekaaxa epaaxina 4]

Nihimyeke Exeeni?

Nuumala omukhomasa mutthu owo, waaniheryasa muhimyeke so: “Niri ekampaanya ya olumwenku wotheene ya okawa nlattulo na niira nla nootepa otthuneya. Voohimya sa nihiku, okathi ni opuro, woolempwa va nlattuloni vo”.

[Ekaaxa epaaxina 4]

Ennikumiherya Mireerelo

• Iyaakha vakhaani sivinre, murokora mmosa yoowo iirela mpantta ekampanya, aaniikoha akhala wira vaanitthuneya wiimananiha wira aalattule atthu. Owo uupuwela so: ‘Kiireke atthu animweemya orowa okongresuni?’ Esaabadu vaasiisu, aahimoona mulopwana a etiini Sique. Okhala wira aakilanthi opuro aattamenle awe, owo aahiphavela omuleela nsina nawe. Waaniheryasa yaamwiirinhe orwa okongresuni mwaha wa nlattulo aakhenle awe. Owo aahikhalana makoho manceene yaawo murokora ole aatthuneya awe waakhula. Aahihimya wira aahisiveliwa ni eprograma ni aahitikinihiwa mwaha wa mawarelo ni mweettelo wa atthu yaari opuro ole. Nto nihiku nimosaru nenle, murokora ole aahivaanela-tho ni anamathelana yaakilanthe waattamela opuro awe. Awo yaaroolattuliwa nto khurowa okongresuni ni ekaaro. Kongresu ole aahaasivela nto khumpaka palano oorwa-tho nihiku naatttarelana. Murokora ole aahoona efaita erina aya ekampaanya ahu.

• Kongresu a eyaakha evinre, mulopwana mmosa ni amwaarawe yaawo ari mapioneero ookilaatheya, yaahilakela omuleela masina aya mulopwana mmosa oowunnuwela yoowo aari ni amwaarawe. Anamathelana ale yaahitthokiherya wira ole waari mukwaha woopacerya orwa opuro ole. Mapioneero ale yaahaakoha wira: “Tani oolattunleni?” Awo yaakhunle so: “Nihiku nimosa naaphwannye nlattulo vamukhora va enupa ahu!” Awo yaahisoma ni khumaleliha olepa opuro yoole onooniherya moota woovekela eliivuru. Anna akina yaari okongresuni iwe yaahikawana eyolya aya ni anamathelana ale. Nto kongresu ole aahaasivela vanceene nto khuttika nihiku nanenli. Yaahipakiwa mareheryo wira axukuriwe anamathelana ale ni waakhaliherya wira yiixutte ekeekhai.