Okawa Efolyeeto ya Nlattulo na Wuupuwelela Okhwa wa Yesu Okhuma 2 a Abril
1. Mitano ninrowa okawa silini efolyeeto ya nlattulo, nto xeeni vanaalattula ahu atthu khula mwaakha?
1 Okhuma 2 mpakha 17 a Abril, nnookawaka ifolyeeto sa nlattulo na niira nootepa otthuneya vamwaakhani, eyo piiyo, Wuupuwelela okhwa wa Kristu. Iyaakha sivinre, anamunceene yaawo yaasiveliwe ekeekhai yaahaakhulela orowa niira nna. Mwa ntakiheryo, nihiku nimosa na Wuupuwelela okhwa wa Yesu, muthiyana mmosa aahitelefonari ofiliyaali, khuhimya so: “Kinoophiyaru-va owaani, nto koophwanya efolyeeto vamukhora. Kinniphavela orowa niira nno, masi kaaphavela osuwela okathi ene”. Munna ole aahimuleela moota woosuwela okathi ene orumeelaka efolyeeto eyo. Wookiseryani, muthiyana ole aahimmye so: “Kinoorowa niira nno!”
2. Nihimyeke exeeni naakawaka efolyeeto ya nlattulo?
2 Nihimyeke Exeeni: Okhala wira ninrowa okhalana okathi vakhaani wookawa ifolyeeto iyo, ti vooloka ohipisa empa emosa. Hiyo pooti ohimya so: “Ehaali. Nimphavela waavaha atthu a vatthokoni vanyu efolyeeto ela ya nlattulo na niira nootepa otthuneya ninrowa wiiriwa olumwenku wotheene, Ettiminku, 17 a Abril. [Munvahe efolyeeto eyo mwaneene etthoko.] Nihiku nno, nnuupuweleliwa okhwa wa Yesu. Mwaha onikhuma mBiibiliyani, wa mahala, onrowa wooniherya moota woottottela mureerelo yowoopola ya Yesu. Efolyeeto ela, ennooniherya opuro ni okathi onirowa aya wiiriwa muthukumano owo mmuttettheni mwahu”.
3. Ninrowa waalattula sai atthu anceene?
3 Akhala wira muttetthe anyu ti muulupale, axitokweene animooleelani wira pooti ohiya efolyeeto opuro wookhalela itthoko soohikhala atthu. Nave-tho, muhaaliyale ale animakela anyu waaxukurya mwaalaleeryaka, amusi anyu, ale anivarana anyu muteko, ale aneettana anyu oxikola, ni otheene yaale anaasuwela anyu. Vaavo vanikawa ahu ifolyeeto sa nlattulo woomalani wa esumana, pooti okawa hoothe ni irevista vaakhalelaka vale. Niireke wira nyuwo munookela opioneero wookhaliherya mweeri wa Abril wira mwiirele mpantta ekampaanya ela yoohakalaliha?
4. Xeeni vaniphavela ahu wira ale anisiveliwa ekeekhai arwe Yuupuwelele okhwa wa Yesu?
4 Tthiri, otheene anisiveliwa ekeekhai anirwa niira na, animwiixutta itthu sinceene! Awo animwiiwa ophenta wuulupale wa Yehova mwaha wookumiherya yowoopola. (Yoh. 3:16) Nave-tho, animwiixutta moota Omwene wa Muluku onirowa aya waareeliha apinaatamu. (Yes. 65:21-23) Atthu awo, anooleeliwa wira alavulane anamathoonyerya wira yaavekele yoosoma ya Biibiliya wira asuwele itthu sinceene. Nto, mavekelo ahu toowi ale a murima saana yaakhulele ekampaanya ela ni arwe Yuupuwelele okhwa wa Yesu!