Ekampaanya ya Olattula Wuupuwelela Okhwa wa Yesu, Enipacerya 1 a Marso
1. Ninrowa opacerya silini olattula Wuupuwelela Okhwa wa Yesu, ni xeeni mwaakha ola ekampaanya enirowa aya opisa vakhaani?
1 Namathanu, 1 a Marso, ninrowa opacerya ekampaanya ahu ya waalattula akina wira arwe Wuupuwelela Okhwa wa Yesu. Wuupuwelela nno, onirowa wiiraneya 26 a Marso; eyo enitaphulela wira ekampaanya eyo enirowa opisa vakhaani ovikana myaakha sivinre. Eyo enirowa waavaha okathi anamunceene wira elattuliwe, vanceenexa miloko seiye sirina mittetthe soolaleerya suulupale.
2. Ninrowa okuxaka sai ifolyeeto sa nlattulo vamosa ni moota wookawa mmuttettheni mwahu?
2 Mwiitthokihe: Axitokweene anirowa ovaha malakiheryo wa moota woovara muteko ola muttetthe wotheene, ohela muhina akhala wira ifolyeeto iyo sinirowa ohiiwaka itthoko soohikhala atthu. Akhala wira ifolyeeto iyo sinoohala nuumala okaiwa khula enupa mmuttettheni, pooti okaiwa mapuro makina aniphwanyaneya atthu. Mutokweene oniweherya muteko woolaleerya, ohaana ottittimiherya wira ifolyeeto sa nlattulo simalelihiwe olempwa, ni sipwehiwe opuro ninkuxa ahu iliivuru wala irevista wira anamalaleerya arumeeleke. Masi, ifolyeeto sotheene sihipwehiwe vabalkauni-vo okathi omosaru. Nto, nihaana okuxaka paahi seiye ninrowa ahu okawa esumana eyo.
3. Exeeni enitthuneya ahu wuupuwelaka okathi ninkawa ahu ifolyeeto sa nlattulo?
3 Nihimyeke Exeeni? Ti vooloka ohaattiha soohimya, maana eyo enoonikhaliherya waaphwanya atthu anci. Epaaxina 6, yookhalana olaleerya wookhweya onrowa onikhaliherya moota wookawa mmuttettheni mwahu. Masi, khinnitthuneya waakuvexa akhala wira mwaneene etthoko toopatthaneya wala ookhalana makoho. Vaavo ninrowa ahu okawaka ifolyeeto sa nlattulo wuumalani wa esumana, nihaana okawa-tho irevista vaareerelaka. Nihiku 2 a Marso, ninrowa ophavelexa okawa ifolyeeto sa nlattulo ohiya opaceriha soosoma sa Biibiliya.
4. Xeeni oryaaya vootthuneya oluttuweliwa ekampaanya ya olattula Wuupuwelela Okhwa wa Yesu?
4 Ninnilipelela wira anamunceene animoorwa wira Yuupuwelele Okhwa wa Yesu. Mwaha onirowa olavuliwa, onootthokiherya ti pani okhanle Yesu. (1 aKor. 11:26) Ohiya-vo, onirowa otthokiherya moota okhwa wawe onnikhaliherya aya. (aRom. 6:23) Nave-tho, onirowa ottittimiherya otthuneya waya omuupuwelela Yesu. (Yoh. 17:3) Nto, nrowe niluttuweliwe ekampaanya ela!