Ekampaanya Enilattula Okhwa wa Yesu, 22 a Março

Mwaakha ola, ekampaanya yowaalattula atthu wira yuupuwelele okhwa wa Yesu, enipacerya eSaabadu, 22 a Março. Hiyo ninnitumereriwa wiirela mpantta. Wuumalani wa esumana, nihaana okawaka-tho irevista vaareerelaka. Esaabadu yoopacerya ya Abril, ninrowa ophavelexa okawa nlattulo ohiya opaceriha soosoma sa Biibiliya. Masi, namphwanya mutthu onisiveliwa ekeekhai, pooti opaceriha yoosoma ya Biibiliya. Mutokweene oniweherya muteko woolaleerya pooti oweha vaareerelaka okawa ipaphelo sa nlattulo mapuro otheene aniphwanyaneya atthu, akhala wira eyo enookhaliherya waaphwanya atthu anci. Mpake elista ya ale aniphavela anyu waalattula: amusi, apatthani omutekoni, oxikola, ale animakela anyu waaxukurya ni atthu otheene munaasuwela anyu, wira mwaavahe epaphelo ya nlattulo. Ninnilipelela wira anamunceene animoorwa wira yuupuwelele ophenta wuulupalexa wa Yehova ni wa Yesu.​—Yoh. 3:16; 15:13.