Ekampaanya ya Olattula Wuupuwelela Okhwa wa Yesu Enipacerya 17 a Marso
1. Ekampaanya xeeni enrowa opacerya 17 a Marso?
1 Khula mwaakha, ninnithukumana wira Nuupuwelele okhwa wa Yesu. (1 aKor. 11:26) Tivonto nimphavela ahu wira atthu akina, arwe asuwele moota Yehova onooniherya awe ophenta orweela mwa eyoopoli. (Yoh. 3:16) Mwaakha ola, ekampaanya yowaalattula atthu wira Yuupuwelele okhwa wa Yesu enrowa opacerya eSaabadu 17 a Marso. Munniitthokiha wira mwiirele mpantta vanceene ekampaanya ela?
2. Okathi wookawa ipaphelo sa nlattulo nlavuleke sai?
2 Etthu Yoohimya: Ti vooloka ohilavula itthu sinceene. Hiyo pooti opacerya so: “Ehaali? Nimphavela waavaha atthu a vatthokoni vanyu efolyeeto ela ya nlattulo na niira nootepa otthuneya ninrowa wiiriwa olumwenku wotheene, 5 a Abril. Onrowa olavuliwa mwaha onikhuma mBiibiliyani, yoowo onrowa otthokiherya mureerelo onikumiherya aya okhwa wa Yesu ni ele onipaka awe vano. Efolyeeto ela, ennooniherya opuro ni okathi onrowa aya wiiriwa muthukumano owo mmuttettheni mwahu”. Okathi onrowa ahu olaleeryaka wanimala wa esumana, nihaana-tho okawaka irevista.
3. Ninrowa owerya sai waalattula atthu anceene?
3 Mwaalattule Atthu Anceene: Yoophavela ahu ori waalattula atthu anceene akhala wira vanniweryaneya. Nto, muhiliyale waalattula ale anaasomiha anyu Biibiliya, mutonko anyu waalaleerya, amusi, apatthani oomutekoni, apatthani ooxikola, anamwaattamanani, ni atthu anaasuwela anyu. Axitokweene a mmulokoni anoovaha malakiheryo a moota wookawa mmuttettheni mwanyu motheene. Khula mwaakha, ekampaanya ya waalattula atthu wira Yuupuwelele okhwa wa Yesu ennikumiherya mireerelo. Mwa ntakiheryo, okathi muthiyana mmosa aakela awe nipuro niiriwa Niira nna mmwaisana, mutthu mmosa ahiivahererya omuthoonyerya namalaleerya aamulattunle. Masi muthiyana ole aahihimya wira khaamusuwela mutthu opuro ole, nto aalattuliwe ni mutthu mukina aalaleerya khuta empa nihiku nenne voosiisu.
4. Exeeni enniiriha oluttuweliwa wiirela mpantta ekampaanya?
4 Waaniheryasa atthu yaale anrowa anyu waalattula pooti orwa Wuupuwelela okhwa wa Yesu. Pooti atthu akina ahiphavelaka, wiilipiha wanyu onoovaha onamoona. Ifolyeeto sa nlattulo munrowa anyu okawa sinoolaleya wira Yesu Mwene muulupale. Oluttuweliwa mmuteko ola, onimwaasuweliha atthu otheene a mmuttettheni mwanyu, anamalaleerya akhwiinyu, nto vanceenexa Yehova, wira munnixukhurela vanceene eyoopoli ya Yesu.—aKol. 3:15.