“Mwaakhaliherye Ale Ahiniwerya Osoma Saana”
1. Muxankiho xeeni onikhalana ahu wira niwiixuttihe Biibiliya atthu ahiniwerya osoma?
1 Atthu anceene ahiniwerya osoma saana, annoovelela omusoma Biibiliya wala iliivuru sikina, hata aphavelaka wiixutta masu a Muluku. Waavaha eliivuru Biibiliya Oniixuttiha Exeeni mukwaha woopacerya, woonasa wene khonirowa okumiherya mireerelo. Nto ninrowa waakhaliherya sai? Nihaakoha anna a ilapo sinivikana 20 yaawo ahimmye moota anaakhaliherya aya atthu awo. Moone malakiheryo avanhe aya.
2. Nirumeeleke iliivuru xeeni wira naakhaliherye atthu ahiniwerya osoma saana?
2 Akhala wira ole onimusomiha ahu Biibiliya khonisoma saana wala khonisuwela, pooti orumeela ibroxura sini: Munwiriyaneke Muluku ni Munwiriyaneke Muluku Wira Mphwanye Ekumi Ehinimala. Pioneero a wEstados Unidos onnimooniherya mutthu owo ibroxura soopiili, nto khiyamukoha tiivi eniphavela awe. Efiliyaali ya oQuênia enihimya wira ibroxura iya sinnikhaliherya vanci elapo ele. Maana wAfrika okhweya owiixuttiha atthu murumeelaka myaha ni ilatarato ohiya orumeela makoho ni waakhuliwa. Mutthu onisuwela osoma saana, pooti omusivela wiixutta murumeelaka makoho ni waakhuliwa. Masi, ole ohinsuwela osoma pooti ohisiveliwa. Akhala wira mutthu owo onnisuwela osoma vakhaani, anna anceene annipaceriha yoosoma arumeelaka ibroxura sini: Ihapari Sooreera Sinikhuma wa Muluku!, wala Munoowerya Okhala Mpatthani a Muluku!, ni Eliivuru Aka ya Miyaha sa Biibiliya.
3. Nipake exeeni wira nikhumeleke saana okathi wowiixuttiha atthu ahinisuwela osoma?
3 Waattottopela: Atthu ahinsuwela osoma pooti wuuliwa muru, ni ohiivaha efaita. Nto wira yiixutte ekeekhai, etthu yoopacerya ori waakhaliherya atthu awo wira yiivaheke efaita. Anamunceene ahinsuwela osoma aakhalana miruku ni anniwerya wiixutta etthu. Nto mwaattitimiheke ni waavaha efaita. (1 Ped. 3:15) Awo anoosiveliwa ovikaniha omusoma Biibiliya akhala wira animoona wira wiimananiha waya onnivahiwa efaita ni annirowa vahoolo. Nto mwaattottopeleke vanceene.
4. Ninrowa waatumererya sai ale ahinsoma saana wira alokiheryeke yoosoma aya?
4 Hata mutthu owo ohisomaka saana, nimutumereryeke wira olokiheryeke yoosoma awe. Anna akina a wAfrika do Sul, annaatumererya ale anaasomiha aya wira yaavekeleke nikhaliheryo amusi aya wala apatthani anisoma saana. Munna mmosa oGrã-Bretanha onnaakhaliheya ale onaasomiha awe olokiherya yoosoma aya owooniheryaka eliivuru awe mapuro yaakhunle awe. Munna onikhala wIndia onnaatumererya awo oweha ilatarato sa yoosoma enittharelana, ni wuupuwelela ele enitaphulela aya.
5. Nipixeke sai murima okathi oniiriha ahu yoosoma ya Biibiliya?
5 Mpixeke Murima: Hata murumeelaka iliivuru soovirikana, mmukhaliherye ole onimusomiha anyu woona ni wiiwexexa iponto suulupale. Wanipacerya, pooti opaka yoosoma ya 10-15 minutu. Muhisomeke itthu sinci okathi omosaru; masi pooti othokorerya ittima vakhaani. Mpixeke murima akhala wira owo onisoma vakhaani-vakhaani. Waaniheryasa, onimwiixutta osoma saana vaavo oninnuuherya awe omphenta Yehova. Wira mmukhaliherye opaka eyo, okhuma wanipacerya mmulattuleke wira orowe omuthukumanoni.
6. Ninrowa waakhaliherya sai atthu wira yiixutte osoma?
6 Akhala wira ale anaasomiha anyu anooxutta osoma, anoorowa vahoolo momunepani moohipisa. (Esal. 1:1-3) Anna anceene annaakhaliherya ale anaasomiha aya arumeelaka ebroxura eni: Mwiilipiherye Wiixutta Osoma ni Olepa, wanikisa wa khula yoosoma. Akhala wira owo ookhumuwa, woonasa wene munoowerya omulipiha mmooniheryaka itthu sikina sixuntte awe. Mmuleeleke wira Yehova onooreeliha wiimananiha wawe, ni mmutumererye onvekela nikhaliheryo. (Mir. 16:3; 1 Yoh. 5:14, 15) Anna akina oGrã-Bretanha annaatumererya ale anaasomiha aya okhalana soolukama saamukhaani ni soorowa vahoolo, ntoko: omwiixutta alfabeto, ophwanya ni osoma soolepa sa Biibiliya, ni wanikisa waya osoma iliivuru sinikumihiwa mBiibiliyani sookhweya. Waakhaliherya atthu wiixutta osoma, onihela muhina waatumererya ophavela opaka eyo, ohiya paahi owiixuttiha.
7. Xeeni vahinitthuneya ahu woovelela waalaleerya ale ahinsuwela osoma?
7 Yehova khonaathanya atthu ahisomme. (Yobi 34:19) Owo onitokosa murima. (1 Wah. 28:9) Nyuwo mookhalana iliivuru sinci mukhanle anyu oorumeela wira mpacerihe soosoma sa Biibiliya. Nuumala-vo, nyuwo munoowerya othaamiherya yoosoma eyo murumeelaka eliivuru Biibiliya Oniixuttiha Exeeni, mmukhaliheryaka wiiwexexa saana Soolempwa.
[Eponto yuulupale epaaxina 4]
Atthu ahinsuwela osoma pooti wuuliwa muru, ni ohiivaha efaita. Nto wira yiixutte ekeekhai, etthu yoopacerya ori waakhaliherya atthu awo wira yiivaheke efaita
[Ekaaxa epaaxina 4]
Akhala wira ole onimusomiha anyu Biibiliya khonisuwela osoma:
• Wanipacerya, murumeeleke ibroxura Munwiriyaneke Muluku, Munwiriyaneke Muluku Wira Mphwanye Ekumi Ehinimala, wala eliivuru ekina enireerela.
• Mmuttittimiheke ni omuttottopela vanceene.
• Mpakeke yoosoma yoohipisa, ni muhithokoreryeke itthu sinceene okathi omosaru.
• Mmukhaliherye wiixutta osoma.
Okathi onipacerya awe osiveliwa ekeekhai, ni ophavela wiixutta itthu sikina, nto pooti othaamiherya yoosoma eyo murumeelaka eliivuru Biibiliya Oniixuttiha Exeeni.
[Ipaaxina soohikhala etthu 5,6]