Mutakiheke Waamini Waya
1. Eliivuru xeeni ninrowa ahu osomaka okathi wa Yoosoma ya Biibiliya ya Muloko okhuma esumana 19 ya Outubro?
1 Okhuma esumana 19 ya Outubro 2015, ninrowa osomaka eliivuru eni Mutakiheke Waamini Waya, okathi wa Yoosoma ya Biibiliya ya Muloko. Eliivuru eyo ennithokorerya sowiiraneya sa atthu 14 alopwana ni athiyana oowaamini aniromoliwa mBiibiliyani. Eliivuru eyo ennaalavula atthu awo oowaamini anakhala ntoko akumi mmuupuweloni mwahu, eyo enrowa onikhaliherya owoona atthu awo okhala a ekeekhai yaarina mixankiho okathi yaamurumeela aya Yehova. Nave enninooniherya etthu ekhanle ahu oowiixutta ni soohimmwa iyo ni moota woorumeela mweekumini mwahu olelo-va.—aHéb. 6:12.
2. Mutthokiherye ipakeliwo sa eliivuru eni Mutakiheke Waamini Waya.
2 Ikhalelo sa eliivuru eyo: Eliivuru eyo enniruuha okathi ni maapha anooniherya mapuro anrowa onikhaliherya osuwela nipuro ni okathi khula mutthu oniromoliwa aakhala awe. Ohiya-vo, khula muru wookhalana ekaaxa eni: “Muupuwele Ela . . . ’’, yeeyo enrowa onikhaliherya wuupuwelela yoohimmwa eyo ni oweha etthu yoovareleya muteko ekhanle ahu oowiixutta. Nave eliivuru eyo yookhalana ilatarato sinceene sirina ikoore sooreera, sowooneya ni soothanleliwa saana sinrowa onikhaliherya onivara murima ele enihimmwa.
3. Ninrowa opaka exeeni wira nittottele mureerelo osommwa wa eliivuru ela?
3 Munrowa Ottottela Sai Mureerelo?: Epaphelo eri wanipacerya elempwale ni Nikhuuru Noolamulela enninitumererya ni masu ala ani: “Murumeele muupuwelo anyu; mwiihele muhina mwa ele eniiraneya. Mweererye woona ele yoona aya atthu awo aniromoliwa mBiibiliyani. Nwehe moonelo yaarina aya atthu awo ni moota mwaarowa anyu woonela mwaha mmosaru yaarina aya”. Ekeekhai wira vahimmwaka wira nirumeeleke muupuwelo ahu, khentaphulela wira ninrowa woothereryaka itthu sihinivarihana ni ele eri mBiibiliyani, masi onihimmwa owerya woona ni otthokiherya itthu sinihimmwa saawiiraneela atthu awo. Opaka eyo onitthuneya okathi wira nuupuwelele. (Neh. 8:8) Vakhala wira yoosoma eyo enipacerya eriyari ya muru, ole oniiriha ohaana opacerya wuuluula ele yaalavuliwe esumana evinre owo pooti olavula mwa isekuntu 30 mpakha 60 paahi. Woonasa wene pooti opaka nikoho nimosa wala manli wanikisa wa khula yoosoma vakhala wira muru owo khorina nipuro nni “Muupuwele Ela . . . ”
4. Xeeni vanitthuneya ahu osoma eliivuru Mutakiheke Waamini Waya?
4 Hiyo ninkhala olumwenku khula nihiku oniphavelasa opwetexa waamini wahu mwa khula enamuna. Nto eliivuru ela ni mpantta ole onivikaniha okumiheriwa erevista Owehaweha yoowo orumeeliwe wira epakiwe eliivuru ela, tthiri yoovaha ya Yehova wira onikhaliherye olipiha waamini wahu. (Yak. 1:17) Vano nrowe nittottele mureerelo nihicompaka khula Yoosoma ya Biibiliya ya Muloko ni ovaha ikomentaario sowaatta mpakha vaniwerya ahu.