Nirumeeleke Sai Masu Oogravariwa a Iliivuru Sahu?
1. Ohiya iliivuru soolempwa paahi, enamuna xeeni ekina ya iliivuru erina ahu?
1 Anamunceene onnaasivela omurumeela jw.org wira yiixutte osoma moovara murima masu a ekeekhai. (Mus. 12:10) Niireke nyuwo mootoko orumeela masu oogravariwa a iliivuru sahu? Eyo enooniiriha owiriyana soohimmwa sinceene siri webi saiti ahu. Nto mureerelo xeeni anrowa aya oniphwanyiha masu awo oogravariwa?
2. Nirumeeleke sai masu oogravariwa a iliivuru sahu wira niphwanye mureerelo ahu ni wa emusi ahu?
2 Nirumeeleke Hiyo ni Emusi Ahu: Owiriyana masu oogravariwa a Biibiliya, irevista, wala eliivuru ekina okathi oneetta ahu mukwaha wala nivaraka miteko sahu, sinoonikhaliherya orumeela saana okathi ahu. (aÉf. 5:15, 16) Hiyo pooti orumeela masu awo okathi wa omulompa Muluku vatthokoni nittharihelaka muliivuruni mwahu. Orumeela masu oogravariwa okathi onipaka ahu yoosoma ahu pooti onikhaliherya olokiherya inamuna sahu sa osoma, vanceenexa vakhala wira nniixutta nttaava nsya.
3. Atthu xeeni a mmuttettheni mwahu anrowa ottottela mureerelo masu oogravariwa a iliivuru sahu?
3 Nirumeeleke Okathi Woolaleerya: Atthu anikhala mmuttettheni mwahu, vanceenexa yaale oowaatteliwa miteko woonasa wene yamweemererya owiriyana masu oogravariwa. Wala hiyo pooti waaphwanya atthu anilavula nttaava nikina yaawo vaarowa waakhweyerya weemererya ekeekhai vaakhanle wira alaleeriwe erumeeliwaka “elavulelo” aya. (Mit. 2:6-8) Mapuro makina atthu onnaasivela owiriyana masu oogravariwa. Mwa ntakiheryo, atthu a nloko na Hmong, anniwiixuttiha amiravo soolema saya yaaleelaka paahi ni masu oolavuliwa ni atthu ale anniwiriyana ni ephoole mpakha wiiwexexa ele enihimmwa. Nave maloko manceene a wÁfrica annisiveliwa wiixutta itthu awiriyanaka paahi itthu iyo sihimmwaka ni ale anisuwela.
4. Makoho xeeni anitthuneya ahu wiikoha voohimya sa waakhaliherya atthu a mmuttettheni mwahu?
4 Niireke atthu a mmuttettheni mwanyu vaamwaasivela owiriyana masu oogravariwa a nttaava naya? Niireke aakhala atthu aniwoona anyu wira yaamuttottela mureerelo eliivuru yoogravariwa enaaroihela anyu murumeelaka e-mail? Niireke vanweryaneya obaxari eliivuru yoogravariwa khumpaka CD nto khiyanvaha mutthu onisiveliwa ekeekhai a mmuttettheni mwahu vamosa ni eliivuru yoowimpirimiriwa? Khula eliivuru, ebroxura, erevista, wala etratato yoogravariwa yoomalela eninvaha ahu mutthu onimulaleerya ahu ehaana olempwa murelatoorioni ntoko eliivuru ekaiwale. Masu oogravariwa apakeliwe onikhaliherya okathi onipaka ahu yoosoma ni waala ipyo sa ekeekhai ya Omwene okathi onilaleerya ahu.—1 aKor. 3:6.