Mutthariheleke Mweettelo Onimusivela Yehova

Yehova Muluku onnihimya mweettelo onaareerela apinaatamu. Mwa ntakiheryo, owo oohimya wira ekasamento etthu ehinimala eriyari ya mulopwana ni mwaarawe. (Mat 19:4-6, 9) Owo onnikhoottiha khula enamuna ya orupihana woohiloka. (1 aKor 6:9, 10) Owo onninivaha malakiheryo a moota woowara ni wiiphwaneliha eniwiiriha arumeyi awe okhala oovirikana ni atthu akina.​—Otu 22:5; 1 Ti 2:9, 10.

Olumwenku wa mahiku ala, atthu anceene khaniphavela ottharihela malakiheryo a Yehova. (aRo 1:18-32) Awo annittharihela muupuwelelo wa atthu voohimya sa mawarelo aya, wiiphwaneliha ni mweettelo aya. Anamunceene annaatumererya akhwaaya wira apakeke itthu simosaru soohiloka ni waaramusa ale aneettela malakiheryo oovirikana.​—1 Pe 4:3, 4.

Hiyo nikhanle Anamoona a Yehova, nihaana ottharihela malakiheryo a Yehova moolipa murima. (aRo 12:9) Moota xeeni? Hiyo nihaana owiixuttiha atthu akina ele enimusivela yena. Nave hiyo nihaana ottharihelaka malakiheryo yaawo mweekumini mwahu. Mwa ntakiheryo, okathi onithanla ahu ikuwo ni inamuna sowiiphwaneliha, hiyo nihaana wiikohaka so: ‘Niireke mawarelo aka anittharihela malakiheryo a Yehova, wala a olumwenku ola? Niireke mawarelo ala annikisuwanyeiha okhala Kristau onimoova Muluku’? Okathi onithanla ahu eprograma ya TV, wala efilme wira niwehe, nihaana wiikohaka so: ‘Niireke eprograma ela ennimusivela Yehova? Mweettelo xeeni enitumererya aya eprograma ela? Niireke itthekulelo iya sinookiiriha ophavela opaka etampi? (Esa 101:3) Niireke eprograma ela enoowiiriha ottheka atthu a vatthokoni vaka wala akina?’​—1 aKor 10:31-33.

Xeeni varyaaya vootthuneya vanceene wira hiyo nitthariheleke malakiheryo a mweettelo onimusivela Yehova? Voohipisa Kristu Yesu onrowa waapwetexa atthu a maloko otheene aniira itthu sootakhala. (Eze 9:4-7) Atthu yaale aniira itthu sinimusivela Muluku paahi tanrowa ohala. (1 Yoh 2:15-17) Vano hiyo nintthuneya ovarexexa mweettelo onimusivela Yehova wira atthu anoona mweettelo ahu wooloka anvuwiheke Muluku.​—1 Pe 2:11, 12.

NWEHE EVIIDIYU ENI: MUKHALE MPATTHANI A YEHOVA—MULOPWANA MMOSA, MUTHIYANA MMOSA, NUUMALA-VO MUTHOKORERYEKE MAKOHO ALA ANITTHARELANA:

• Xeeni varyaaya va miruku ottharihela mweettelo onimusivela Yehova?

• Xeeni anamuyari anitthuneya aya opacerya owiixuttiha anaaya mweettelo onimusivela Yehova ayariwakaru?

• Moota xeeni amiravo ni aalupale anrowa aya waakhaliherya atthu akina ottottela mureerelo oreera murima wa Muluku?