MAKHALELO A MAKRISTAU
Nilokiherye Inamuna Sahu Soolaleerya—Olaleerya Nimurumeelaka Telefoni
XEENI VARI AYA VOOLOKA OPAKA EYO: Olaleerya nimurumeelaka telefoni enamuna yooloka ya “olaleya voomalela ihapari sooreera”. (Mit 20:24)a Eyo enninikhaliherya omulaleerya mutthu vaavo makhalelo ahu ahinneemererya aya omuxukurya mutthu owo
MOOTA WOOPAKA EYO:
Mwiilokiheryeke oratteene. Muthanleke mwaha wooreerela. Muupuweleleke etthu munrowa anyu ohimya nuumala-vo mulepeke muupuwelo owo. Mulokiheryeke moolumo vakhaani mutthokiherya aka etthu ewiirinheni oligari vakhala wira mwaneene-etthoko ohaativari eprograma enihimya wira muhiye mensagem. Vannikhweya vakhala wira munoopaka eyo vameesa, wira nwerye opweha itthu sotheene munrowa anyu ophavela orumeela, mwa ntakiheryo sintoko: telefoni anyu, tableti anyu orina aplikativo JW Library® wala jw.org®
Mukhaleke omaaleleya. Mulavuleke ntoko munilavula anyu khula nihiku. Mutheyeke ni murumeeleke matata, maitho ntoko muri ohoolo wa mutthu owo. Muhimaaleke okathi munceene. Olaleerya ni atthu akina nave onimookhaliheryani okhala oomaaleleya. Vakhala wira mwaneene etthoko onnookohani etthu, mutthikele olavula ele okonhe awe ni nsu noorunya, wira emukhaliherye ole onivarana anyu muteko owerya ophwanya waakhuliwa waya
Muhiyeke nikoho ninrowa wookhaliheryani otthikela ovaanela. Vakhala wira mutthu owo ohooniherya osiveliwa, nyuwo pooti ohiya nikoho wira mwaakhule nihiku nikina. Nave, nyuwo pooti wiivahererya mmuroihelaka mmansinyu eliivuru wala omwinviyarela mmurumeelaka e-mail aahiiso correio. Wala nyuwo pooti omukoha vakhala wira mutthu owo onneemya omwinviyarela eliivuru wala eviidiyu mmurumeelaka mensagem aahiiso e-mail. Vaareerelaka, nyuwo pooti omuleela mutthu owo wira yookhala Eprograma ya Omusoma Biibiliya Onlaine va jw.org
a Akhala wira muttetthe anyu olaleerya ni telefoni etthu eneemereriwa, muhaana ottittimiha malamulo awo voohimya sa myaha sa omwaneene.