Mwaaleeleke Atthu Akina Itthu Musomme Anyu

Yoosoma ya Biibiliya ya mutthu mwaneene, pooti onlipiha. Masi nnoorowa otepa olipa, vakhala wiira ninnaaleela akina itthu nsomme ahu. Miruku 11:​25, onihimya so: “Ole onimulipiha mukhwaawe, nuuwo onoolipihiwa”.

Okathi nnaaleela ahu atthu akina itthu niixuntte ahu, vannikhweya wuupuwela iponto suulupale ni otepa wiiwexexa mwaha owo. Ohiya-vo, waaleela atthu akina itthu niixuntte ahu, onninihakalaliha okhala wiira itthu iyo pooti waakhaliherya atthu awo. — Mit. 20:35.

Mweererye ela: Esumana enirwa, mweererye omuleela mutthu mukina itthu mwiixuntte anyu. Nyuwo pooti omuleela mmusi anyu, munna aahiiso murokora a mmulokoni, mutthu munivarana anyu muteko, munisomana anyu oskola, visiinyu anyu aahiiso mutthu munimphwanya anyu mwaalaleeryaka. Mweererye omuleela murumeelaka moolumo anyu, mwa enamuna yookhweya ni yoowiiwanyeya.

Muhiliyale ela: Nyuwo munnimuleela mutthu ele mwiixuntte anyu wiira mmulipihe, ohiya ophavela ohimmwa. — 1aKor. 8:1.