AMIRAVO ANNIKOHA
Biibiliya Onrowa Okikhaliherya Sai?—Mpantta 1: Mmusuwele Oratteene Biibiliya
“Kaaphavela opacerya omusoma Biibiliya, nuumala onweha moota innunwe awe, kaahikhulumuwa!”—Briana, orina iyaakha 15.
Niireke nyuwo murina moonelo ntoko wa Briana? Akhala wira ti siiso, mwaha ola onimookhaliheryani!
Xeeni vari aya vooloka omusoma Biibiliya?
Niireke munnixanka vaavo munuupuwela anyu omusoma Biibiliya? Akhala wira ti siiso, muhixanke. Biibiliya eliivuru erina ipaaxina sinivikana 1.000 ni ileetera sawe ti saamukhaani, nave khorina ilatarato. Mwaha waivaavo, pooti woosivelakani vanceene oweha iviidiyu ni TV.
Masi nkahaya muupuwele ela: Vaakhanle wira moophwanya ekaaxa ya faita yinceene ya khalai, niireke khimwaarowa weemela wira nwehe itthu sikhanle mukaaxani mmo?
Biibiliya ori ntoko ekaaxa eyo ya faita yinceene. Owo ookhalana itthu sa faita yinceene sinrowa wookhaliheryani:
Opaka soothanla sooloka
Wiiwanana ni anamuyari anyu
Okhalana apatthani ooloka ni eekeekhai
Ovilela oriipiwa murima
Vaniweryaneya sai eliivuru ya khalai onikhaliherya olelo-va? Mwaha woowi “soolempwa sotheene sinikhuma wa Muluku”. (2 Timootheyo 3:16) Eyo enitaphulela wira miruku sa mBiibiliyani sinikhuma nipuro noororomeleya.
Biibiliya ori ntoko ekaaxa eyo ya faita yinceene
Munrowa owerya sai omusoma Biibiliya?
Yoopacerya: Omusoma Biibiliya okhuma wanipacerya mpakha wanikisa. Opaka eyo, enimookhaliheryani osuwela muhupi wotheene wa mBiibiliyani. Sookhala inamuna sinceene sa omusoma Biibiliya. Nrowe niwehe inamuna piili:
Nyuwo pooti osoma iliivuru 66 sa mBiibiliyani ntoko silempwale aya, eyo piiyo, Maphattuwelo mpakha Wiisuupulula.
Nyuwo pooti omusoma Biibiliya moovarihana ni moota itthu siiraneyale aya.
Nwehe ela: Apendise A7 a Biibiliya Tradução do Novo Mundo, yookhala elista enooniherya moota itthu siiraneyale aya mookumini mwa Yesu.
Ya nenli: Osoma mpantta wa mBiibiliyani onivarihana ni muxankiho murina anyu. Mwa ntakiheryo:
Niireke muniphavela okhalana mpatthani eekeekhai? Musome yowiiraneya ya Davidi ni Yonathani. (1 Samuweli, ikapiitulu 18-20) Nuumala-vo mpake esersiisiyu ya mBiibiliyani eni: “Moota Wookhalana Apatthani Eekeekhai” wira nwehe ele yowiiraneya eyo eniwiixuttihaayani.
Muniphavela osuwela moota wookhootta soweeha? Musome yowiiraneya ya Yosefe wira nwehe etthu aapanke awe wira okhootte yoweeha. (Maphattuwelo, ekapiitulu 39) Nuumala-vo mpake isersiisiyu sa mBiibiliyani sini: “Moota Wookhootta Yoweeha, Yosefe—Mpantta 1” ni “Yosefe Aahoottheriwa—Mpantta 2” wira nwehe moota yowiiraneya awe enrowa aya wookhaliheryani.
Niireke muniphavela osuwela moota ovekela onrowa aya wookhaliheryani? Musome yowiiraneya ya Nehemiya. (Nehemiya, ekapiitulu 2) Nuumala-vo, mpake esersiisiyu ya mBiibiliyani eni: “Muluku Aahaakhula Nivekelo Nawe” wira nwehe ele ntakiheryo na Nehemiya ninwiixuttihaayani.
Mweererye opaka ela: Okathi munrowa anyu omusoma Biibiliya, mwaavye opuro woomaaleleya wira ehikhale etthu enrowa owaakanyeryani.
Ya neeraru: Osoma yowiiraneya ya mBiibiliyani wala Esalimo, nuumala-vo nwehe moota enrowa aya wookhaliheryani. Vaavo munisoma anyu, nyuwo pooti wiikoha so:
Exeeni emwiirinhe Yehova oruma olempwa etthu ela mBiibiliyani?
Enkiixuttiha exeeni voohimya sa omutthu wa Yehova ni moota onipaka awe itthu?
Kinrowa ovarihela sai muteko mookumini mwaka?
Mweererye opaka ela: Mukhalane yoolakela! Muthanle nihiku munrowa anyu opacerya omusoma Biibiliya.