AMIRAVO ANNIKOHA
Biibiliya Onrowa Okikhaliherya Sai?—Mpantta 2: Mwiirihe Yoosoma Anyu ya Biibiliya Okhala Yoovara Murima
Mmiravo mmosa oniihaniwa Will ohimmye so: “Omusoma Biibiliya pooti okhalaka ntoko etthu yooxankiha. Otepexa wene akhala wira khamunisuwela enamuna ya omusoma Biibiliya”.
Niireke munniphavela osuwela etthu enrowa wookhaliheryani osiveliwa omusoma Biibiliya? Akhala wira ti siiso, mwaha ola onimookhaliheryani.
Mwiiriheke Yoosoma Anyu Okhala Yoohakalaliha
Mwiiheleke muhina mwa yowiiraneya munisoma anyu. Wira nwerye opaka eyo muhaana opaka itthu sinittharelana:
Muthanleke yowiiraneya ya mBiibiliyani muniphavela anyu osoma. Nyuwo pooti othanla osoma yowiiraneya emosa ya mBiibiliyani iversiikulu sa Evangelyo. Wala nyuwo pooti othanla osommwa wa Biibiliya woovara murima ori va jw.org.
Musomeke yowiiraneya eyo ya mBiibiliyani. Nyuwo pooti osoma yowiiraneya eyo mekhinyu wala ni amusi anyu aahiiso ni apatthani anyu. Mmosa pooti osoma mpantta wa mulipa onitthokiherya yowiiraneya eyo nave akina pooti osoma ipantte sa atthu akina aniheliwa muhina mwa yowiiraneya eyo.
Mmananihe otthara malakiheryo anittharelana:
Mpake etesenyo ya yowiiraneya eyo moovarihana ni moota itthu siiraneyale aya. Khula mpantta mulepe moota itthu siiraneyale aya.
Mpake etesenyo ya ekwaaturu. Mwa ntakiheryo, okathi munisoma anyu yowiiraneya ya mutthu oororomeleya, mulepeke moota mikhalelo mutthu owo aarina awe sinivarihana aya ni mareeliho aaphwannye awe.
Mwiirihe yowiiraneya eyo okhala ya niinaano. Muhimye itthu siiraneyale mwa inamuna soovirikana. Mukhaleke ntoko wira “munaakoha” atthu anilavuliwa vanceene yowiiraneya eyo ni atthu akina yaawenhe itthu iyo siiraneyaka.
Muupuweleke yowiiraneya ya mutthu aapanke yoothanla yoohiloka moota aarowa awe ottottela mureerelo vaakhanle wira aahipaka yoothanla yooloka. Mwa ntakiheryo, muupuwele yowiiraneya ya Pedru okathi aamukhoottale awe Yesu. (Marko 14:66-72) Etthu xeeni Pedru aakhanle awe oopaka okathi aakhanyereriwa awe?
Akhala wira muniphavela opaka etthu ekina, mulepeke yowiiraneya eyo murumeelaka yowiiraneya emosa enilavuliwa mBiibiliyani. Muheleke muhina itthu yowiiraneya eyo sinniixuttiha aya.—aRoma 15:4.
Mwiiriheke mpantta munisoma anyu mBiibiliyani okhala wekeekhai!
Mutokoseke!
Akhala wira munootokosa itthu sikina sa yowiiraneya eyo, munoophwanya itthu sikina sa efaita yinceene. Okathi mukina, nuulumo nimosa paahi na yowiiraneya emosa ya mBiibiliyani pooti wookhaliheryani vanceene.
Mwa ntakiheryo, Mulikanyihe yoolepa ya Matheyo 28:7 ni Marko 16:7.
Xeeni Marko incererye awe wira moohipisa Yesu aarowa wakhumelela awiixutti awe “ni Pedru”?
Nwehe ela: Marko khaakhanle okathi itthu iyo siiraneya aya. Nto vanikhala ntoko wira Pedru tamulenle Marko.
Itthu sa faita sivithiwe: Yesu aaphavela onweha Pedru. Xeeni osuwela eyo yaamuhakalalinhe aya Pedru? (Marko 14:66-72) Yesu oonihenrye sai wira aari mpatthani ekeekhai a Pedru? Munrowa otthara sai ntakiheryo na Yesu na okhala mpatthani ekeekhai?
Vaavo mpantta munisoma anyu muniiriha anyu okhala woovara murima ni munitokosa anyu itthu sikina sa yowiiraneya eyo, munoosiveliwaka omusoma Biibiliya!