Waakhuliwa wa Makoho a mBiibiliyani / Diabo ni Malaikha Ootakhala / Niireke Diabo Ookhala?
Waakhuliwa wa mBiibiliyani
Aayo, Diabo ookhala tthiri. Yena “namalamulela a olumwenku ola”, nihimye so, nlaikha nootakhala nimurukunuwenle Muluku. (aEefeso 6:11, 12) Biibiliya onnooniherya mikhalelo sa Diabo, orumeelaka maihaneliwo ni otthokiheriwa onittharelana:
Satana, nintaphulela “Nwanani”. — Yobi 1:6.
Diabo, nintaphulela Mutthu ‘oohapuxa’. — Wiisuupulula 12:9.
Enowa, ninnirumeeliwa mBiibiliyani ohimmwaka “Nawoothe”.—2 aKorinto 11:3.
Namatteha-ttheha wala ooweehererya. — Matheyo 4:3.
Nawoothe.— Yohani 8:44.
Khahiyo yoophavela yoopaka itthu soonanara
Mwa moonelo wa atthu akina, Satana, Diabo, paahi yoophavela ya opaka itthu sootakhala eri mweerutthuni mwahu. Hata vari siiso, Biibiliya onnimuromola Yehova ovaanelaka ni Satana. Okhala wiira Muluku toowaarya ni toohittheka, khaakhanle oolavula ni mpantta mmosa woohiloka wa erutthu awe. (Otumererya 32:4; Yobi 2:1-6) Mwa enamuna emosaru, Satana aahimweehererya yoowo ahaarina etampi. (Matheyo 4:8-10; 1 Yohani 3:5) Nto Biibiliya onooniherya wiira Diabo tthiri ookhala khahiyo ethoonyeryo ya itthu sootakhala.
Niire nihaana otikinihiwa okhala wiira atthu anceene khanikupali wiira Diabo ookhala? Nnaari, Biibiliya onihimya wiira Satana onnirumeela inamuna sootheene sowoototha wiira ophwanye itthu oniphavela awe. (2 aTesalonika 2:9, 10) Etthu emosa-emosa onrumeela awe, ori ottiyela miyuupuwelo sa atthu anceene, wiira ehikupaliki wiira yena ookhala. — 2 aKorinto 4:4.
Miyuupuwelo sikina sihinsuwanyeya voohimya sa Diabo
Etthu yoowothiwa: Lúcifer nsina nikina na Diabo.
Ekeekhai: Nuulumo na Eheeberi aBiibiliya akina ataphuleliwe aya “Lúcifer” enitaphulela etthu “yoowaarya”. (Yesaya 14:12) Ela enooniherya wiira nuulumo nna enihimmwa emusi aahiiso nihimo na mamwene, a oBabilonia. Nihimo nlo yaari atthu oowiixinnuwiha, ti nthowa naya Muluku aarowa awe opwetexa (Yesaya 14:4, 13-20) Nuulumo noowi “yoowaarya” naahirumeeliwa wiira niramusive nloko na mamwene a oBabilonia, nuumala epooma ele oxinttiwa.
Etthu yowoothiwa: Satana oninvarela muteko Muluku, sintoko “advogado onimuhimyana mutthu ottheka.
Ekeekhai: Diabo nwanani a Muluku, khahiyo murumeyi awe. Satana, Diabo, khonaaphavela ni onniwootherya atthu animurumeela Muluku. — 1 Pedru 5:8; Wiisuupulula 12:10.