MUTAKIHEKE WAAMINI WAYA | YOSEFE

“Onwerya Otaphulela Khahiyó Muluku?”

YOSEFE onneetta opuro wooriipela, oretthenle ene ni oviheriwa mwaha wa muteko munceene. Nsuwa nooviha nimmana exiri, ninnaapaha anamutthukiwa. Vanikhala wira owo onnisuwela khuta mutari ni khuta etijolo ya opuro ole. Masi ola tokhanle opuro wa Yosefe. Ekeekhai wira onnittittimihiwa mapuro ale, masi, owo nlelo namutthukiwa.

Woonasa wene, Yosefe onnuupuwelela oryeene mmyaakoni soorakama sa oHebroni, akukhulaka inama sa apapawe! Owo aarina iyaakha 17 vaavo apapawe, Yakobe, yaamurumme aya weetta mukwaha woorekama. Masi mukwaha ola onnimukumiherya maxakha. Mwaha wa nrima na axinnawe, awo yaahimunyokha mpakha ophavela omwiiva nto khimutumiha ntoko epottha. Owo aahiroihiwa wEjiitu, weiwo aarumeela awe owannyawe mukhulupale a wEjiitu, Potifari. Nnaamwi aaroromeliwa, Yosefe aahootheriwa ni mwaara a pwiyawe wira aaphavela waathuphela, nto khiwaleliwa mukhatteya.a​—Maphattuwelo, muru 37, 39.

Yosefe vano orina iyaakha 28, ni ooviriha iyaakha sinivikana 10 oryeene epottha ni otthukweliwe ene. Itthu sinimwiiraneela, khahiyo ti saalipelela awe. Niireke aamutaphuliwa? Niireke aamwaaweha-tho apapawe oowuuluvala wala muhima awe amphenta awe, Beniyamini? Nto aarowa okhala mukhatteya mme mpakha silini?

Niireke mootoko oxanka ntoko Yosefe? Ikwaha sikina, itthu sinniiraneela pooti ohikhala seiye naalipelela ahu. Tthiri, pooti okhumela mixankiho sinikhala ntoko khasinimala. Nto nrowe niwehe moota nikhanle ahu ootakiha waamini wa Yosefe.

‘YEHOVA AANIKHALA NI YOSEFE’

Yosefe aanisuwela wira khaarowa oliyaliwa ni Muluku awe. Nto eyo yaanimulipiha. Hata oryeene mukhatteya mwa elapo ekina, Yehova aanimureeliha Yosefe. Ninsoma so: “Vano Apwiya yanikhala ni Yosefe, khumureriha. Mulupale a mukhatteya ahisiveliwa ni yowo”. (Maphattuwelo 39:21-23) Vaavo Yosefe aimananiha awe ovara muteko, Muluku awe aanivikaniha omureeliha. Tthiri vaari voolipiha osuwela wira okathi wotheene Yehova aanikhala ni yena!

Niireke Yehova ammukumiha Yosefe mukhatteya mme? Yosefe khaasuwela, masi moohaaniherya aanivikaniha onvekela Muluku. Ntoko sinimakela aya wiiraneya, waakhuliwa iwo waahirwa mwa enamuna yahaalipelela awe. Nihiku nimosa, aarumeyi anli a Farawo yaahitthukiwa mukhatteya mme. Mmosa aari mulipaolawiha yoowurya; mukina ari mulipa-oowoxa iphau.​—Maphattuwelo 40:1-3.

Muulupale a mukhatteya aahimuroromela Yosefe nto khumuruma waakhapelela anamutthukiwa ale yaari oottittimiheya.bOhiyu omosa oowanli aya yaahiloha etthu yootikiniha. Vasiisu, Yosefe aahoona wira murima aya khiwaakhanle saana. Nto aahaakoha so: “Xeni oripiwa murima olelo?” (Maphattuwelo 40:3-7) Waaniheryasa olavula wawe wooreerela, waahiwiiriha omuroromela wira amwaataphulela ele yaalonhe aya. Yosefe khaasuwela wira ovaanela iwe wanwerya orukunuxa okumi awe. Nto vaakhanle wira Yosefe khoonihenrye oreera murima, niireke alopwana ale yanwerya ovaanela ni yena? Oreera murima wa Yosefe ohaana oniirihaka wiikoha so: ‘Kinnooniherya omwaamini waka Muluku, kaaphentaka atthu akina?’

Alopwana awo anli yaahimuleela wira yaxankihen’ye mwaha wa itthu yaalonhe aya ni khuhikhalanaka mutthu oowaataphulela. Atthu a wEjiitu yaanivaha efaita yuulupale sooloha, nto ale yaahimya wira yaanitaphulela sooloha yaanittittimihiwa vanci. Alopwana ale khiyaasuwela wira oloha waya waakhuma wa Muluku a Yosefe, Yehova. Masi Yosefe aanisuwela. Owo aalipinhe so: “Onwerya otaphulela khahiyó Muluku? Nkakilèleni oloha wanyu”. (Maphattuwelo 40:8) Moolumo awo tootthuneya olelo-va wa asomi otheene a Biibiliya. Vaamuloka vaakhanle wira atthu otheene aneettela etiini anniyeviha! Nihaana opweha ottaiwene wiixinnuuha, nto khiyamuroromela Muluku, vaavo nimphavela ahu otaphuleliwa wa Nuulumo nawe, Biibiliya.​—1 aTesalonika 2:13; Yakobo 4:6.

Aapacenrye ohimya yooloha awe ari mulipa oolawiha soowurya. Owo aahihimya wira aalohenrye mwiri wa evidera waarina iritta tthaaru yoowo waimale ewuuva. Mihokorokho iyo saahittokottha, nto mulipa aalawiha soowurya aaniwamela mukoophoni mwa Farawo. Okhaliheriwaka ni Yehova, mowaakuveya Yosefe aahisuwela yootaphulela aya. Owo aahimuleela murumeyi ole wira iritta tthaaru aalohenrye awe, saataphulela mahiku mararu; yavira mahiku mararu Farawo ammutaphula ni omuttikiherya okhulupale awe. Mulopwana ole aahihakalala vanci mwaha wa otaphuleliwa oloha wawe. Nto Yosefe aahinvekela so: ‘Mukireerele murima, mukixonttele wa Farawó’. Yosefe aahitthokiherya wira aavariwe elapo awe ni khutthukweliwa ohitthenke.​—Maphattuwelo 40:9-15.

Mulipa oowooxa iphau, voonale awe wira Yosefe aahitaphulela vooreera, aahinvekela wira otaphulele oloha wawe. Owo aahiloha airen’ye ene ithokwa tthaaru sa iphau vamosa ni ipalame saathupa ethokwa vamuru vawe. Muluku aahimuleela Yosefe yootaphulela aya. Masi eyo khiyaarowa okhala ehapari yooreera wa mulipa oowooxa iphau. Yosefe aamulenle so: “Mataphulelo aya t’ala: ithokwa iyo ttharu sinthonyerya mahiku mararu. Yavirá mahiku mararu, mwené onoruma othikila muru anyu n’uthomeiwa erutthu anyu vamwirini; vano sinimorwa ipalame othupa erutthu anyu eyo”. (Maphattuwelo 40:16-19) Moolikanasa ni arumeyi otheene a Muluku, Yosefe moolipa murima aahuupulula ihapari sa Muluku, eyo piiyo, ihapari sooreera ni ihapari sa maphukelo.​—Yesaya 61:2.

Nuuvira mahiku mararu, masu a Yosefe yaahiiraneya. Farawo aahipaka niira na wuupuwelela oyariwa wawe. Yoolema ela khiyaapakiwa ni arumeyi a khalai a Muluku. Aahiruma ophukeliwa arumeyi ale. Nto mulipa oowooxa iphau aahiiviwa ntoko Yosefe aahimmye awe, masi mulipa oolawiha soowurya aahittikiheriwa muteko awe. Masi mooriipiha murima, murumeyi ole aahimuliyala Yosefe!​—Maphattuwelo 40:20-23.

“NKIHIYÓ MIYO”

Saahivira iyaakha piili. (Maphattuwelo 41:1) Muupuwele moota Yosefe aariipiwe awe murima! Waaniheryasa Yosefe aanuupuwela wira aamukhuma mukhatteya mme nuumala Yehova omusuweliha yootaphulela ya oloha ya arumeyi ale anli. Nto, vaavo nsuwa naakhuma aya khula nihiku, waaniheryasa Yosefe aaniroromela wira aamutaphuliwa, masi eyo khiyiiraneya, maana mixankiho sanvikaniha, nave opuro ole khiwaaturukeya. Woonasa wene iyaakha iye piili saari soovila vanceene wa Yosefe. Masi, owo khaatonko ohiya omuroromela Yehova. Ohiya otteettheya, Yosefe aahivikaniha ovilela ni omananiha okhala oolipa okathi wotheene.​—Yakobo 1:4.

Okathi ola wooxankiha ti vootthuneya ovilela vanceene. Nto wira nihitteettheye, nihaana ovilelaka, opixa murima, ni okhalana murima woomaaleleya, nimuroromelaka Muluku. Ntoko aamukhalihenrye awe Yosefe, owo onoonikhaliherya oxintta otteettheya ni ovarexexa nlipelelo nahu.​—aRoma 12:12; 15:13.

Mulipa oolawiha soowurya aahimuliyala Yosefe, masi Yehova nnaari. Ohiyu omosa, Yehova aahimwiiriha Farawo okhalana sooloha piili soohiliyaleya. Yoopacerya, aahoona inyompe 7, sooreera ni sooneneva, ni aahoona-tho sikina 7, soohiirya ni sowootta. Vano inyompe iyo soowootta saahimiryakasa iye sooneneva. Ya nenli, mwene aahiloherya-tho makala 7 oosareya epyo. Masi yaahikhala-tho makina 7 oowuuma, ni oophepuwa yaawo yahimiryakasa makala 7 ooreera. Vasiisu, murima wa Farawo waahimuriipa. Nto aahiwiihaniha asuweli ni anahako othene a wEjiitu, wira etaphulele oloha iwe. Masi khaavo aawenrye. (Maphattuwelo 41:1-8) Khaninsuwela akhala wira alopwana awo yarootikinihiwa vanceene wala yaarina miyuupuwelo soovirikana. Masi, Farawo aahixanka ni aahivelavela maana aaphavela osuwela yootaphulela aya.

Okathi yoowo, mulipa oolawiha soowurya aahimuupuwela Yosefe! Yowuupuxerya ya murima yaanimulemela, nto aahimuleela Farawo voohimya sa mmiravo ooloka yoowo aari mukhatteya, yoowo mwa iyaakha piili aataphulenle saana oloha wawe, ni oloha wa mulipa oowooxa iphau. Moohipisa Farawo aahirumiha wiitthaniwa Yosefe.​—Maphattuwelo 41:9-13.

Muupuwele moota Yosefe saakhanle awe nuumala orweeliwa wira orowe wa mwene. Moohipisa aahiwara ikuwo sooreera, aahimettha mputu ni ereru, moovarihana ni yoolema ya wEjiitu. Moohaaniherya, aahinvekela Yehova vanceene wira omukhaliherye! Moohipisa, aahirowa enupa yooreera ya mwene! Ninsoma so: “Vano mwené ahimuhimerya wira: ‘Miyo koloha, nto khavo owenrye okitaphulela. Vano kihìwa wira munnisuwela otaphulela soloha’”. Yosefe aahooniherya-tho wiiyeviha ni omwaamini Muluku, oriki: “Nkihiyó miyo: Muluku t’osuwenle otaphulela vomukurunuxa murima mwené”.​—Maphattuwelo 41:14-16.

Yehova onnaaphenta atthu oororomeleya ni oowiiyeviha. Nto aahimukhaliherya Yosefe wira osuwele etthu yeele asuweli ni anamaxitta yahaawerya aya. Yosefe aahitthokiherya wira yooloha ya Farawo yaataphulela etthu emosaru. Mwaha wa omwiiriha oloha ikwaha piili, Yehova aaphavela wooniherya wira mwaha ole waamwiiraneya tthiri. Inyompe sooneneva ni makala ooreera oosareya ipyo saathoonyerya iyaakha 7 sa eyoolya yinceene wEjiitu. Vano inyompe sowootta ni makala oophepuwa saathoonyerya iyaakha 7 sa etala yaarowa okhumelela nuuvira iyaakha sa eyoolya. Etala eyo yaamuhonona elapo ele.​—Maphattuwelo 41:25-32.

Farawo aanisuwela wira Yosefe aahitaphulela saana oloha iwe. Masi, aarowa opaka exeeni? Yosefe aahitumererya opakiwa etthu. Farawo aahaana omphwanya mutthu “òloka n’a miruku” wira akhale mukhulupale aarowa othukumanyerya yoolya mwa iyaakha 7 sa oruwerya. Nto aahaana okawa eyoolya eyo okathi wa etala. (Maphattuwelo 41:33-36) Osuwela wa Yosefe ni itthu saamwiiranenle, saahimwiiriha ophwanelela ovara muteko ole, masi mwaha wa wiiyeviha wawe owo khaikumihenrye. Nave-tho Yosefe aanimwaamini Yehova. Akhala wira nnookhalana waamini, khaninrowa okhalana nrima ni wiivuwiha. Nnookhalana murettele ni omuhiyerya Muluku myaha sotheene.

“NINKELA OMPHWANYA VAI MUTTHU . . . NTOK’OLA?”

Farawo ni arumeyi awe yaahoona wira palano a Yosefe aari a miruku. Nave-tho mwene ole aahisuwela wira moolumo a miruku a Yosefe yaakhuma wa Muluku awe. Tivonto, aahaahimeerya arumeyi awe wira: “Ninkela omphwanya vai mutthu òsareya miruku sa Muluku ntok’ola?” Nto aahimuleela Yosefe wira: “Okhala wira Muluku òhosuwelihani itthu iya sothene, khavo-tho mutthu mukina musuweli nnamiruku ntoko nyuwo. Nyuwo mwettiheke etthoko aka: atthu aka othene animwìwelelaka molumo anyu: miyo kovikaneni mwaha w’omwene pahi”.​—Maphattuwelo 41:38-41.

Farawo aahiira ntoko saahimyale awe. Moohipisa Yosefe aahiwarihiwa ikuwo sooreera. Farawo aahinwariha muxikoni mukuhu wa eweero, munela a omwene, khunweliwa mukaaroni mwawe ni khunvaha okhulupale wira ovire elapo yotheene ni omaliherye ipalano sawe. (Maphattuwelo 41:42-44) Mwa nihiku nimosa paahi, Yosefe aahikumihiwa mukhatteya nto khuroihiwa opalaasio. Owo aavennye ntoko namutthukiwa masi aarumpe ntoko namalamulela a nenli a wEjiitu. Tthiri waamini wa Yosefe waari wookhalela! Yehova aahoona otakhala wotheene wamphwanya murumeyi awe. Nto aahiphuka ohaaxiwa iwo mwa okathi ni enamuna yooreerela. Yehova khahiyo paahi uupuwela ophuka itthu soohiloka siireliwa awe Yosefe, masi-tho, aamukhapelela okumi wa muhoolo wa nloko na Isarayeli. Mwaha wa muhoolo nnimoona moota eyo yiiranen’ye aya.

Okathi onoophwanyayani soweeha, waaniheryasa itthu sootakhala seiyo sinkhala ntoko khasinimala, muhikhumuwe. Mmuupuweleke Yosefe. Owo aari mutthu ooreera murima, oowiiyeviha, oovilela ni oowaamini; tivonto aareelihiwa awe ni Yehova.

[Inoota]