Murumeele Elivirinyu Eni: “Masu Oopacerya a Nuulumo na Muluku” Wira Mpacerihe Ovaanela
1. Ekaruma xeeni esya ennikhaliherya olaleerya?
1 Kongresu ovinre niinano yaahikumiheriwa elivirinyu eni: “Masu Oopacerya a Nuulumo na Muluku”. Elivirinyu ela ekumihiwe wanipacerya wa Biibiliya a niinano a Tradução do Novo Mundo (Englexi). Ninrowa orumeela sai ekaruma ela okathi woolaleerya? Okhala wira khula mwaha wookhalana soolepa saya ntoko eliivuru Raciocínios, nto enoowerya onikhaliherya vanci wira nipacerihe ovaanela.
2. Ninrowa orumeela sai elivirinyu “Masu Oopacerya a Nuulumo na Muluku” okathi woolaleerya?
2 Mwa ntakiheryo, pooti orumeela nikoho 8 nto khiyahimya so: “Nnaaxukurya atthu voohipisa maana anamunceene anniikoha wira: ‘Niireke Muluku tonikumiherya ohaawa wa apinaatamu?’ [Mittetthe sikina ti vooreerela omooniherya nikoho nlo mwaneene etthoko.] Munoonela sai? [Nwehererye waakhuliwa.] Biibiliya onnaakhula nikoho nlo”. Musome mBiibiliyani yoolepa wala soolepa siromoliwe ni muthokorerye hoothe. Akhala wira mutthu owo onnisiveliwa ekeekhai, pooti omooniherya makoho 20 ari epaaxina 1, ni onvekela wira othanle nimosa wira mwathokorerye mukwaha wootthikela. Wala pooti onvaha eliivuru enirumeela ahu wira nimusomihe Biibiliya.
3. Ninrowa orumeela sai elivirinyu “Masu Oopacerya a Nuulumo na Muluku” mittetthe seiye anamunceene ahineettela aya eKristau?
3 Makoho 4, 13, 14, 15, 16, ni 17 pooti ovareleya muteko vanci mittetthe seiye anamunceene ahineettela aya eKristau. Mwa ntakiheryo, pooti orumeela nikoho 17 nto khiyahimya so: “Nnaaxukurya atthu moohipisa nivaraka muteko onikhaliherya itthoko. Niireke munnikupali wira imusi sinnikumana mixankiho sinci olelo-va? [Nwehererye waakhuliwa.] Atthu anci athelanne ahoona wira miruku iya ti soovareleya muteko, seiyo sini: “Muthiyana amuttittimiheke iy’awe”. [Khimuntthuneya ohimya wira masu awo anikhuma va aÉfeso 5:33. Akhala wira munimulaleerya muthiyana, pooti oromola masu a aÉfeso 5:28.] Munoonela sai, niireke wiiwelela miruku iya waamukhaliherya itthoko?”
4. Exeeni ekhanle anyu oopaka muhinatthi omaliha ovaanela ni mutthu ohineettela eKristau?
4 Muhinatthi omaliha ovaanela, muleihane moota wootthikela ovaanela ekwaha ekina. Woonasa wene, pooti otthikela ovaanela murumeelaka soolepa sikina siri muhina mwa nikoho mwaavaanela anyu. Wanikisa, mmuleele mutthu owo wira itthu mwaalavula anyu sinikhuma mBiibiliyani. Moovarihana ni mwaha mwaavaanela anyu wala moota mutthu owo onimoonela awe Biibiliya, munvahe eliivuru yooreerela.—Moone esuplemento ya Orummwa Ahu wa Omwene, Dezembro 2013.